По алармирањето на Порталб.мк за поплаките на студентите дека по патот за на Природно-математичкиот факултет во Автокоманда тие се мета на крадци, Универзитетското студентско собрание (УСС) преку социјалните мрежи ги извести студентите дека ќе има чувари на факултетот, а вежбите нема да се одржуваат по 16 часот, како и дека ќе се зголеми безбедноста на локацијата, известува Порталб.мк.
Студентите на Природно-математичкиот Факултет во Скопје минатата недела потпишале петиција со неколку барања до факултетот за да се зголеми безбедноста на студентите при одење на предавања.
Универзитетското студентско собрание (УСС) преку социјалната мрежа Инстаграм ги известило студентите дека е разговарано со деканот и се одлучило да се преземат мерки за да се зголеми безбедноста на студентите. Во соопштението се вели дека е побарано од полицијата да има почести контроли во близина на Факултетот, чуварите во нивните смени да ги контролираат просториите на Факултетот, додека вежбите повеќе нема да се одржуваат по 16 часот.
„Драги колеги, во однос на инцидентот на ПМФ, уште претходната недела и по наша иницијатива случајот беше пријавен во полиција и беше побарана засилена полициска контрола. Денес во координативен разговор со Деканот на ПМФ добиени се следните информации:
– обезбедувањето ќе прави обиколки во текот на смените
– вежбите нема да бидат одржувани по 16 часот
– ќе биде засилено обезбедувањето на локацијата“, се вели во соопштението на Универзитетското студентско собрание.
Тие исто така информираа дека деканот Даворин Трпевски ќе се сретне и со претставници на Министерството за внатрешни работи за да се засилат контролите.
Но, студентите за Порталб.мк рекоа дека освен соопштението на социјалните мрежи, ним никој не им рекол ништо од страна на Факултетот.
Студентите со години наназад се мета на крадци, кои ги напаѓаат по пат за на факултет и им ги крадат личните работи. Последниот случај беше пријавен и во Порталб.мк, при што еден студент потврди дека на 28 октомври под закана со нож му бил украден телефонот откако си одел од факултетот.
По изјавата на студентот и потврдувањето на случајот од страна на полицијата, Порталб.мк постави прашање за барањата на студентите до Министерството за внатрешни работи, Општина Гази Баба и Универзитетот „Свети Кирил и Методиј“.
Природно-математичкиот факултет се наоѓа во Општина Гази Баба во Скопје, односно во близина на Парк-шумата Гази Баба. Студентите за да стигнат до факултетот морат да се качат по скали каде што нема улично осветлување и безбедносни камери, при што од јуни оваа година пријавени се три случаи во кои студентите биле нападнати од крадци.
