Јужноафриканската Република (ЈАР) поднесе тужба против Израел во Меѓународниот суд на правдата, во која бараат судот да ги класифицира операциите на Израел во Газа како геноцид, известува Гардијан. Израел ги отфрли обвинувањата.
„Делата на Израел за кои се жали Јужна Африка се од геноциден карактер бидејќи имаат за цел да доведат до уништувањето и искоренувањето на значителен дел од палестинската национална, расна и етничка група“, се вели во јужноафриканската апликација за отворање на постапката во судот во Хаг.
Вообичаено се потребни години за пресуда при ваквите тужби. Но, во апликацијата се бара Меѓународниот суд да се состане во текот на следните неколку дена за да донесат „привремени мерки“ кои би довеле до примирје.
Професорката за човечки права од Универзитетот во Бостон Сузан Акрам вели оти најтешкиот елемент за докажувањето на геноцид е „геноцидна намера“. Односно, треба да се докаже дека обвинетите не извршувале само воени операции или дека само се бранеле од напади, туку дека нивната конкретна намера била уништување на еден народ.
Сепак, Акрам смета оти постои значаен број на изјави од најмоќните израелски политичари кои би укажуваат геноцидна намера.
На пример, министерот за правда на Израел Јоав Галант на почетокот на конфликтот изјави дека „се бориме против човечки животни и делуваме соодветно“. Пратеник од партијата на премиерот Бенјамин Нетанјаху изјави дека „ќе направиме втора Накба“; „Накба“ е арапскиот назив за присилното раселување на палестинскиот народ во 1948 година.
Портпарол за Министерството за одбрана на Израел целосно ги отфрли оптужувањата на Јужноафриканската Република, велејќи дека тие немаат правна основа.
Во Газа, пак, продолжуваат офанзивите на Израел. Според министерството за здравство на Газа, најмалку 187 луѓе биле убиени во бомбардирања во текот на вчерашниот ден.
