Почитувањето на правото е особено важно, соопштија денеска од Мисијата на Европската унија во Република Македонија, по вчерашната одлука на Советот на обвинители да одобри само седум од 14 обвинители што ги предложи специјалната обвинителка, Катица Јанева.
„Специјалниот обвинител беше договорен од четирите политички партии и беше назначен од Собранието и од Советот на обвинители. Во согласност со мандатот што ѝ е доделен, таа треба да ја добие неопходната поддршка за да ја врши својата работа“, соопштија од ЕУ.
Од Мисијата на ЕУ, истакнуваат дека Законот за специјален обвинител е јасен за тоа како таа треба да биде поддржана во спроведувањето на својата задача.
Со реакција на одлуката на Советот на јавни обвинители, денеска излезе и американскиот амбасадор, Џес Бејли, кој истакна дека на специјалната обвинителка треба да ѝ се дадат ресурсите што ѝ се потребни.
Советот на обвинители вчера одлучи да го намали бројот на обвинители што ќе работат во Специјалното јавно обвинителство, а државниот јавен обвинител, Марко Зврлевски, по седницата на Советот изјави дека Специјалното јавно обвинителство е политичко обвинителство и потврди дека се подготвува иницијатива за утврдување на уставноста на Законот за специјален обвинител.
