Еден од седуммината уапсени во денешната полициска акција со оперативно име „Молња“, според сознанијата на МВР, додека се пукало во Диво Насеље на 9 мај, планирал да мобилизира група и да изврши напади на повеќе локации во Скопје, изјави помошникот-министер за внатрешни работи Иво Котевски на денешната прес-конференција.
Како што информираше Котевски, акцијата била спроведена во селата Отља, Брест, Арачиново и Матејче. Осомничените, според МВР, се товарат за помагање, терористичка организација и за тероризам.
МВР по наредба на судија на претходна постапка извршило претреси на пет локации во Отља, две во селото Брест и на една во Матејче, каде, според Котевски, биле пронајдени карти на голема Албанија на униформи на УЧК, рамки за куршуми, мапи, пиштол, ловни пушки, детектори за метал, куршуми, лисици за врзување и фотографии на припадници на УЧК.
За време на акцијата, како што соопшти Котевски, не се регистрирани никакви инциденти. Тој додаде дека поголемиот дел од осомничените од претходно ѝ се познати на полицијата и против нив биле поднесувани кривични пријави, а на дел веќе им биле изречени затворски казни.
Упасените имале контакти со групите од Диво Насеље и Гошинце, но не учествувале во нападите, туку дејствувале како помагачи и логистика.