Бугарскиот премиер Бојко Борисов на денешната средба со македонскиот претседател, Ѓорге Иванов изразил загриженост за ситуацијата во земјава и потенцирал дека таа може да се разреши само преку дијалог меѓу сите политички партии, се наведува во соопштението од неговиот кабинет.
„За време на разговорот премиерот Борисов изрази загриженост за ситуацијата во соседна Македонија. Како добар пријател на Република Македонија, Бугарија се залага за искрени односи меѓу двете држави. Сметаме дека до разрешница на кризата може да дојде само со дијалог меѓу сите политички партии и спроведување на неопходните реформи во интерес на сите граѓани, како и запазување на постигнатите договори“, стои во соопштението на бугарската влада за средбата.
Борисов и Иванов се согласиле за интензивирање на преговорите околу билатералниот Договорот за добрососедство и соработка, кои треба да дадат нов поттик во процесот на европските интеграции на Македонија.
Двајцата соговорници разговарале и на други теми, како мигрантската криза, Блискиот Исток и интеграцијата на Западен Балкан.
Борисов ја потврдил позцијата на Бугарија, за поддршка на европската и евроатлантската интеграција на Македонија.
„Убедени сме дека иднината на сите држави од Западен Балкан е во ЕУ. Ја потврдуваме подготвеноста и желбата да пружиме експертска помош на Република Македонија за конкретни прашања, поврзани со нашето искуство, со цел да се постигне суштински напредок на земјата кон членството во ЕУ и НАТО“, потенцирал Борисов.
Претседателот Ѓорге Иванов во Софија учествува на Самитот на шефови на држави и на влади на земјите членки на Процесот за соработка во Југоисточна Европа, каде денеска ќе има и свое обраќање.
Тој вчера имаше и средба со бугарскиот претседател Росен Плевнелиев.
