Скопското јавно претпријатие „Градски паркинг“ денеска ја пушти во употреба апликацијата „Parking.MK“ за зонско паркирање, која ќе биде достапна за користење на IOS и ANDROID уредите, информираа од ЈП „Градски паркинг“.
„Апликацијата е бесплатна за симнување, едноставна за примена и нуди низа поволности, меѓу кои, можност преку ГПС прецизно и точно да се утврди локацијата на возилото на корисникот, а со тоа и зоната на паркирање, потоа брзо и безбедно плаќање со наведување на дебитна или кредитна картичка, листа на историја со плаќања и слично“, информираат од ЈП „Градски паркинг“.
Тие велат дека ЈП „Градски паркинг“ ги приближува своите услуги до корисниците со едноставно, брзо и паметно плаќање.
По воспоставувањето на трите начини на поедноставено плаќање на паркинг услугите преку СМС порака, QR код и грепки, новината со мобилната апликација „Parking.MK“ ќе носи поголема леснотија за плаќање од корисниците.
