Папата повика на дијалог поради насилство во Ерусалим


Ватикан, 23 јули, 2017 - 15:47 (META) 

Папата Франциск изјави дека е вознемирен поради неодамнешните насилства во Ерусалим и повика на дијалог и на умереност за да се воспостави мир.

– Вознемирен ги следам тешките тензии и насилството во последните денови во Ерусалим. Чувствувам потреба да изразам повик на умереност и на дијалог – изјави папата, обраќајќи им се на верниците собрани на плоштадот Свети Петар.

Тој повика на молитва и надеж дека двете страни ќе излезат во пресрет со предлог за помирување.

Во судирот помеѓу Палестинците и израелската полиција во петокот во Ерусалим загинаа тројца Палестинци, а на Западното крајбрежје 19-годишен Палестинец со нож избодел тројца Израелци, по што бил убиен.

Израелската војска соопшти дека извршила големо апсење на Западниот Брег при што биле уапсени 29 лица, вклучувајќи и девет членови на екстремистичката група Хамас.


Утре состанок на Советот за безбедност на ОН поради конфликтот во Ерусалим


Њујорк, 23 јули, 2017 - 13:32 (META) 

Советот за безбедност на Обединетите нации ќе се состане в понеделник за да разговара за порастот на насилството помеѓу Израелците и Пакистанците.

Шведска, Франција и Египет побараа итен состанок на Советот за безбедност на ОН по конфликтот помеѓу Израелците и Палестинците во Ерусалим.

Заменик-амбасадорот на Шведска во ОН, Карл Скау, на „Твитер“ наведе дека целта на состанокот е „итен разговор за тоа како може да се поддржат повиците за спречување на ескалација во Ерусалим“. Во судирот помеѓу Палестинците и израелската полиција во петокот во Ерусалим загинаа тројца Палестинци, а на Западното крајбрежје 19-годишен Палестинец со нож избодел тројца Израелци, по што бил убиен.

Израелската полиција во саботата во Ерусалим се судри со Палестинците кои во знак на протест, организирале муслиманска молитва пред големото светилиште на Храмовна гора, кое го посетуваат и Евреи и муслимани.


Абас: Подготвен сум да соработувам со Трамп


Ерусалим, 2 јануари, 2017 - 17:10 (META) 

Палестинскиот претседател Махмуд Абас изјави дека е подготвен да соработува со новоизбраниот претседател на САД, Доналд Трамп, за решението на „две држави“ во конфликтот со Израел.

– Сакам да ја нагласам нашата волја да соработуваме со новоизбраната американска администрација. Да постигнеме мир, заснован на решението на две држави, како и на арапската мировната иницијатива и на меѓународните резолуции – рече Абас за време на одбележувањето на годишната на својата партија Фатах.

Абас им се заблагодари на САД што се воздржаа од гласање во Советот на безбедност при Обединетите нации и што со тоа отвориле пат за усвојување на резолуција против еврејското население на палестинска територија.

Абас 2017 година ја означи како година на меѓународно признавање на државата Палестина и рече дека едвај ја чека меѓународната мировна конференција во Париз закажана за 15 јануари.

Решението за две држави беше основа за директните мировни преговори помеѓу двата народи за време на неколкуте минати администрации на САД.


Израел веќе нема да ги враќа телата на убиените Палестинци


Тел Авив, 2 јануари, 2017 - 16:10 (META) 

Израел најави дека веќе нема да ги враќа посмртните останки на палестинските екстремисти, туку дека ќе ги погребува.

Одлуката е донесена како настојување на Израел да изврши притисок на Хамас да ги врати двајцата Израелци кои, како што се верува, се држат како заложници.

– Политичко-безбедносниот кабиент расправаше за политиката на третман на телата на терористите од Хамас убиени за време на терористички напади и одлучи дека нема да бидат враќани, туку ќе бидат погребани – наведе израелскиот премиер Бенјамин Нетанјаху.

Израелскиот безбедносни кабинет едногласно ја изгласа одлуката да престане враќањето на посмртните останки на екстремистите на Хамас.

Израел понуди размена на десетина жители на Газа за двајцата Израелци, но Хамас тоа не го прифати.


Концептот на две држави е единствениот пат за мир меѓу Израел и Палестина, порача Кери


Вашингтон, 28 декември, 2016 - 21:01 (META) 

Успехот на израeлско-палестинскиот мировен договор, базиран на концептот на две држави, е доведен во голема опасност, истакна денеска државниот секретар на САД, Џон Кери. Тој нагласи дека резолуцијата на Советот за безбедност на Обединетите нации, со која се осудува изградбата на еврејски населби на окупираните палестински територии, е во линија со американските вредности.

Минатиот петок, САД решија да не стават вето и беа воздржани при донесувањето на резолуцијата на Советот за безбедност на ОН, што предизвика жестоки реакции од Израел.

„Концептот на две држави е единствениот пат за постигнување на праведен и долгорочен мир меѓу Израелците и Палестинците. Тоа е единствениот пат да се осигури иднината на Израел како еврејска и демократска држава. Оваа иднина сега е доведена во опасност. Пријателите треба да си ја кажуваат вистината едни на други и пријателството бара заемна почит. Соединетите Држави гласаа во согласност со своите вредности, како што тоа го правеа и претходните администрации на САД во Советот за безбедност на ОН“, рече Кери, пренесува „Би-би-си“.

Американскиот државен секретар истакна дека САД нема да можат да го заштитуваат Израел ако биде дозволено концептот на две држави да биде уништен „пред нивни очи“.

„Израелскиот премиер (Бенјамин Нетанјаху, н.з.) во јавноста го поддржува концептот на две држави, но неговата актуелна владина коалиција има најдесна политичка ориентација во целата историја на Израел, со агенда која е водена од најекстремни елементи. Резултатот од ваквите политики на владата води во спротивен правец, води кон една држава“, посочи американскиот државен секретар.

Новоизбраниот претседател на САД, Доналд Трамп, денеска, во пресрет на говорот на државниот секретар Џон Кери за израелско-палестинскиот судир, на својот официјален твитер-профил напиша дека не смее да се дозволи Израел да биде „третиран со таков презир и со непочитување“, алудирајќи, меѓу другото, на резолуцијата на Советот за безбедност на ОН. Тој му порача на Израел „да остане силен“, бидејќи се ближи 20 јануари, денот кога Трамп и официјално треба да ја преземе функцијата претседател на САД.


Трамп: Израел не смее да биде третиран со презир и со непочитување


Вашингтон, 28 декември, 2016 - 18:46 (META) 

Новоизбраниот претседател на САД, Доналд Трамп, денеска, во пресрет на говорот на државниот секретар Џон Кери за израелско-палестинскиот судир, порача дека не смее да се дозволи Израел да биде „третиран со таков презир и непочитување“.

„Имаа (Израел, н.з) голем пријател во САД, но не повеќе. Почетокот на крајот беше ужасниот договор со Иран и сега ова (Обединетите нации)! Остани силен Израел, 20 јануари се приближува“, напиша Трамп на својот официјален твитер-профил.

Избраниот американски претседател во својата порака алудира на договорот околу нуклеарната програма на Иран, на кој жестоко се спротиставуваше израелскиот премиер, Бенјамин Нетанјаху, како и на неодамнешната резолуција на Советот за безбедност на ОН против еврејските населби на окупираните палестински територии.

Трамп наведува дека прави сè што може да ги „занемари“, како што ги нарекува, „запаливите“ изјави и препреки на претседателот на САД, Барак Обама.

„Мислев дека транзицијата ќе оди лесно, но нема“, вели Трамп.

Државниот секретар на САД, Џон Кери, денеска треба да го претстави планот на администрацијата на Обама во врска со судирот меѓу Израел и Палестина.


Хоспитализиран палестинскиот лидер Махмуд Абас


Рамала, 6 октомври, 2016 - 15:00 (META) 

Палестинскиот лидер Махмуд Абас (81) денеска е хоспитализиран во Рамала, каде му се вршат тестирања поради можни проблеми со срцето.

Претставник на болницата на Западниот Брег изјави дека на Абас му се врши катетеризирање на срцето, процедура при која катетер се уфра во крвниот сад за да се испита силата на срцето.

Палестински претставник соопшти дека Абас бил хоспитализиран бидејќи се почувствувал „заморен“.


Одложена конференцијата за израелско-палестинскиот мировен процес


Париз, 17 мај, 2016 - 10:44 (META) 

Францускиот претседател Франсоа Оланд денеска рече дека меѓународната конференција, предвидена за 30 мај во Париз, на која требаше да се поттикне израелско-палестинскиот мировен процес, е одложена за летово.

– Американскиот државен секретар Џон Кери не може да дојде на 30 мај. Конференцијата ќе се одржи летово. Оваа иницијатива е неопходна – изјави Оланд.

Конференцијата, која ја предложи Франција, треба да ги заживее мировните преговори.


Грција ќе ја признае Палестина како независна држава


Атина, 22 декември, 2015 - 10:16 (META) 

Грчкиот парламент денеска едногласно ја одобри одлуката да се признае Палестина како независна држава. Конечната одлука останува на грчката влада, која ќе треба да ги заврши сите процедури за да се направи овој историски чекор за признавање на Палестина.

Едногласната одлука дојде во присуство на лидерот на Палестина, Махмуд Абас.

Абас од вчера е во Атина и досега имаше средби со грчкиот премиер, Алексис Ципрас, и со претседателот, Прокопис Павлопулос, како и со претседателот на парламентот, Никос Вуцис.

Премиерот Ципрас го најави овој историски чекор вчера доцна попладне, со изјавата дека Грција планира да го замени терминот „палестинска самоуправа“ со „Палестина“ и најави засилена соработка меѓу Грција и Палестина.

Според Ципрас, со оваа соработка Грција може да одигра значајна улога како столб на стабилноста и мост за засилување на дијалогот и на соработката во регионот. Грчкиот премиер истакна дека Атина ги поддржува барањата да се запрат градбите на Западниот Брег и да се почитуваат исламските свети објекти во Ерусалим.


Кери: Две држави – Израел и Палестина – не е невозможен сон


Њујорк, 12 ноември, 2015 - 10:08 (META) 

Американскиот државен секретар, Џон Кери, денеска во седиштето на Обединетите нации рече дека решението, две држави за Израел и за Палестина не претставува невозможен сон.

„Ционистичкиот сон опфаќа концепт за Израел како еврејска демократија во која може да живеат сите нации. Тој сон може да опстане и со две држави, кои безбедно би живееле една со друга. Сите знаеме дека тоа не е невозможен сон – рече Кери на средба со израелските претставници во ОН.

Изјавата на Кери доаѓа неколку дена по посетата на израелскиот премиер Бенјамин Нетанјаху во Вашингтон, за време на која не е покажана голема волја да заживеат израелско-палестинските преговори.