Пакистан изврши одмазднички ракетни напади врз Иран, при што наводно загинале седум лица, јавуваат светските медиуми, откако во вторникот Иран изврши напади врз Пакистан.
Пакистан соопшти дека нападите погодиле „терористички засолништа“ во иранската провинција Систан-Балучестан, пренесува Би-би-си.
Убиени биле три жени и четири деца, соопшти иранската државна телевизија.
Реципрочните напади доаѓаат во време на зголемени тензии на Блискиот Исток со неколку кризи кои се преклопуваат.
Израел се бори против палестинската група Хамас во Газа и разменува оган во Хезболах поддржан од Иран во Либан. Групите поддржани од Иран во Ирак и Сирија ги напаѓаат американските сили, додека САД и Обединетото Кралство ги нападнаа Хутите поддржани од Иран во Јемен.
Пакистан и Иран долго време се обвинуваат меѓусебно за засолнување на милитантни групи кои вршат напади долж нивната заедничка граница.
Пакистанското Министерство за надворешни работи ги потврди своите напади, соопштувајќи дека дејствувале според „веродостојни разузнавачки информации за претстојните терористички активности“.
Во соопштението се додава дека земјата целосно го почитува суверенитетот и територијалниот интегритет на Иран, но нападите биле „манифестација на непоколебливата решителност на Пакистан да ја заштити и брани својата национална безбедност од сите закани“.
Пакистан жестоко го осуди иранскиот напад во вторникот, кој погоди област во провинцијата Балохистан, додека Иран тврдеше дека нападите биле насочени само кон сунитската муслиманска група Џаиш ал-Адл која извршила напади во Иран.
Претходно неделава, Иран нападна цели во Ирак и Сирија. Техеран тврди дека не сака да се вклучи во поширок конфликт, но групите што земјата ги поддржува ги засилуваат напорите да го таргетираат Израел и неговите сојузници за да покажат солидарност со Палестинците.
