Тевдовски: Јавните финансии се во добра кондиција


Јавните финансии се транспарентни, јавниот долг е под контрола, а во процедура се и реформи за унапредување на јавниот финансиски систем. Ова го посочи министерот за финансии Драган Тевдовски на Конференцијата на Македонската aкадемија на науките и уметностите (МАНУ), зборувајќи за реформи во системот на јавните финансии.

Министерот посочи дека јавните финансии сега се во добра кондиција, но и дека се изготвени мерки за подобрување на системот.

-Преку нов закон за буџети, подобрен систем за јавни набавки, објавување на расходите на веб платформа и други мерки, ќе се подобри управувањето со јавни финансии. Со ова ќе се обезбеди стабилен и одржлив економски раст, а со тоа и подобар стандард за граѓаните – рече Тевдовски.

Тој додаде дека по долго време јавниот долг е ставен под контрола.

– После девет години имаме намалување на јавниот долг на годишно ниво. Долгот е ставен под контрола. Истовремено имаме подобрување ако се гледаат каматите и структурата. Значително е намалена каматната стапка на државните хартии од вредност. Ова е резултат на зголемување на довербата на инвеститорите. Таа доверба се покажа и при издавањето на еврообврзницата. Постигната е историски најниска камата од 2,75 проценти. Тоа е двојно па и трикратно помалку во споредба со претходно издадени еврообврзници – рече Тевдовски и додаде дека е зголемена и рочноста на издадените државни хартии од вредност, што го прави долгот поодржлив.

Тевдовски посочи и дека зголемувањето на транспаретноста им дава на граѓаните контрола над трошењето на државните пари.

– Транспарентноста е најдобриот механизам за поефикасно и ефективно управување со јавните финансии. Направивме низа чекори во оваа насока изминатиов период, што беше забележано од меѓунардните финансиски институции, но и Европската унија. Објавени се низа податоци и извештаи кои претходно не беа објавувани, направен е „Граѓански буџет“, а буџетските корисници имаат обврска да ги објавуваат договорите и анексите за јавни набавки, како и завршните сметки на своите веб страници. Преземени се и низа други мерки, а ќе се преземаат и во иднина. До крајот на годината граѓаните преку веб ќе можат да ги следат исплатите од Трезорот, а Буџетот ќе им стане подостапен преку веб-апликација и други алатки  кои ги подготвуваме – рече Тевдовски.

Министерот за финансии посочи дека една од клучните реформи во јавните финансии се прави во системот за јавни набавки. Со новиот закон е предвидена поголема транспаретност во јавните набавки, а во предвид ќе се зема економски најисплатливата понуда. Законот е усогласен со европските пракси.

Научната конференција која ја организираше Академијата беше посветена на идните предизвици на економскиот развој и економските политики кои се водат во Македонија. На конференцијата свое излагање имаа и премиерот Зоран Заев, вицепремиерот Кочо Анѓушев, претседателот на МАНУ Таки Фити, гувернерот на Народната банка Анита Ангеловска Бежоска, универзитетски професори и претставници на бизнис секторот.


МАНУ ќе прави напори да не се менува нејзиното име


Скопје, 11 септември, 2018 - 19:00 (META) 

Македонската академија на науките и уметностите (МАНУ) ќе се консултира со експерти за да се утврди дали постои можност за поголема флексибилност во однос на прашањето за преименување на оваа институција согласно одредбите од Договорот од Преспа, беше кажано вчера во научната расправа „Спогодбата од Преспа: Меѓународно значење и импликација врз евроатланските интеграции на Република Македонија“ што ја организираше МАНУ.

Претседателот на Академијата, Таки Фити, кој инаку го поддржува договорот за името, рече дека тој е најдобриот можен компромис што носи евроатлантска перспектива и економски развој и покрај тоа што во текот на преговорите МАНУ побара името со географска одредница да важи само за меѓународна употреба. Фити меѓутоа рече дека ќе се разгледаат сите опции за МАНУ да не го менува своето име.

Академик Владо Камбовски во разговор со новинарите по завршувањето на првиот дел од научната расправа „Спогодбата од Преспа: Меѓународно значење и импликација врз евроатланските интеграции на Република Македонија“ нагласи оти во Договорот јасно се дефинира каде се користи придавката.

– Таа се користи за јавните институции, чиј поим е доста широко определен, кои вршат јавни функции, но и јавните институции во сферата на културата,  образованието, науката. Ова останува евентуално предмет за натамошни разговори во духот на едно бона фиде толкување на таа одредба во однос на инстиуции кои се во независната сфера на општеството како МАНУ, поради нивното брендирање во светската, научната и културната јавност. Да можат да го задржат тоа име и придавката македонски – рече Камбовски, нагласувајќи оти за ова прашање ќе се разговара со други научни академии.

Премиерот Зоран Заев побара од МАНУ поддршка за договорот за името со Грција и за референдумот. Заев пред академиците рече дека овој договор го гарантира идентитетот и јазикот и со тоа земјата станува рамноправна со другите членки на НАТО и ЕУ

Американскиот амбасадор Џес Бејли рече дека на 30 септември, граѓаните имаат единствена можност да ја обезбедат иднината што ја сакаат.

-Знам дека повеќето граѓани и родители во Македонија ја гледаат ситуацијата и сакаат нивните деца да живеат во безбедна, просперитетна, инклузивна демократија. Тие сакаат да ја видат оваа земја како место на надеж. Мислам дека ова е единствен момент во историјата на Македонија да ја искористи оваа можност – порача амбасадорот Бејли.

За време на дебата, шефот на дипломатијата Никола Димитров и германскиот амбасадор Томас Герберих апелираа до опозицијата за конструктивност.


Почина академик Милан Ѓурчинов


Скопје, 25 јули, 2018 - 12:18 (META) 

На 90-годишна возраст вчера почина академик Милан Ѓурчинов, редовен член на Македонската академија на науките и уметностите.

Академик Милан Ѓурчинов е роден на 28 јули 1928 година во Белград. Во 1951 година дипломирал славистика на Филозофскиот факултет на Универзитетот во Белград, докторирал во 1960 година на Универзитетот „Кирил и Методиј“ во Скопје, а се усовршувал на универзитетите во Љубљана,  „Ломоносов“ во Москва и „Сорбона“ во Париз.

Академик Ѓурчинов бил професор на Филолошкиот факултет на Универзитетот „Св. Кирил и Методиј“ во Скопје, шеф на Катедрата за славистика, а во 1980 година ја основал Катедрата за општа и компаративна книжевност и бил нејзин раководител.

Академик Ѓурчинов беше критичар, антологичар, теоретичар на литературата и славист.

Погребот ќе се изврши на Градските гробишта „Бутел“ во Скопје утре во 11.30 часот, а неговите посмртни останки ќе бидат изложени во Капелата од 10.30 до 11.30 часот.

По повод смртта на академик Милан Ѓурчинов, Македонската академија на науките и уметностите и Филолошкиот факултет „Блаже Конески“ – Скопје во Свечената сала на МАНУ ќе одржат заедничка Комеморативна седница в петок со почеток во 11 часот.


Камбовски: Претседателот е должен да потпишува закони, а не да изнесува ставови


Охрид, 2 јули, 2018 - 13:51 (META) 

Уставна должност на претседателот на државата е да ги потпише законите и договорите што ги усвојува и ратификува Собранието, а не да изнесува лични ставови и толкувања, порача академик Владо Камбовски, пензиониран професор на Правниот факултет во Скопје, одговарајќи на прашања на новинарите во Охрид, каде учествува во работата на Летната школа по природно право. Настанот е организиран од Центарот за стратегиски истражувања при Македонската академија на науки и уметности.

Камбовски смета дека не треба да се попречуваат интегративните процеси на земјата кои се отворени со договорот за добрососедство со Бугарија и договорот за решавање на спорот за името со Грција, што треба да биде потврден на референдум, а потоа и во Собранието, по што потпис треба да стави и претседателот Ѓорге Иванов, кој рече дека нема намера да го потпише Договорот со Грција.

– Штом прифатиш да бидеш претседател и си дал заклетва дека ќе го почитуваш Уставот, тогаш нормално е дека треба да се однесуваш согласно таквата определба консеквентно. Ако е тој според Уставот должен, не се работи за слободна волја дали ќе го потпише или не законот, дали ќе има ваков или онаков став, тоа е друга работа, негова уставна должност, оттука и законска должност е да го потпише законот – рече Камбовски.


МАНУ на заедничко чествување со БАН на Свети Кирил и Методиј во Софија


Скопје, 8 мај, 2018 - 12:31 (META) 

Делегација на Македонската академија на науките и уметностите (МАНУ), предводена од претседателот Таки Фити, в четвток и петок ќе престојува во Софија во посета на Бугарската академија на науките (БАН).

Двете академии ќе организираат заедничко чествување на празникот на сесловенските просветители Свети Кирил и Методиј.

Притоа, в четврток во Институтот за економски истражувања на БАН, ќе бидат претставени два научноистражувачки проекта реализирани од страна на МАНУ и БАН.

Едниот проект, објавен на македонски и на бугарски јазик, ги третира прашањата поврзани со последиците од европската должничка криза врз интеграциските процеси на двете земји. Другиот проект е кофинансиран од ИПА-програмата на ЕУ и се однесува на градење капацитет за иновативност и конкурентност на претпријатија од Северниот плански регион на Македонија и од Ќустендилската област на Бугарија. Овој проект е објавен на англиски, на македонски и на бугарски јазик.

Во попладневните часови в четврток, еминентниот бугарски писател, академик Антон Дончев ќе го претстави преводот на бугарски јазик на романот „Балканвавилонци“ од академик Луан Старова.

Информациите за посетата се појавија во голем број бугарски медиуми, што зборува за голем интерес во бугарската јавноста за соработката со Македонија, по потпишувањето на Договорот за добрососедство меѓу двете земји.


МАНУ: Апсурдни, неодржливи, невозможни и неостварливи се предлозите за името


Скопје, 20 март, 2018 - 17:21 (META) 

Претседателот на Македонската академија на науките и уметностите (МАНУ), Таки Фити во своето експозе на годишното собрание на академијата апелираше за изнаоѓање заемно прифатливо решение за прашањето за името и ги охрабри властите на Македонија и на Грција да ја преземат одговорноста и храбро да се соочат со реалностите на времето.

Tој порача и дека решение за име за сеопшта употреба е неостварливо и дека не смее да се преговара за идентитетот.

Дефинирајќи ги ставовите на МАНУ во своето обраќање, Фити рече и дека спорот е всушност билатерален, а не интернационален и дека се преговара само за името, а не за идентитетските прашања, кои влегуваат во сферата на елементарни човекови права, за кои не се преговара. Тој се изјасни и против име на македонски јазик кое нема да биде преведено.

– Предлозите името Република Македонија, или евентуално име со географска одредница да се изговара како во македонскиот јазик и да се пишува само со латинско писмо, односно името на јазикот, македонски, исто така да се пишува со латинско писмо и да се изговара како што тоа се прави во нашата земја, се апсурдни и неодржливи. Прифаќањето на ерга омнес решение, едно име за севкупна, значи едно име и за меѓународна и за внатрешна употреба  би значело промена на уставот на Република Македонија, промена на имињата на нашите институции, ревизија на сите меѓународни договори, билатерални и мултилатерални во кои се користи уставното име на земјата, и тн. Според тоа, ваквото решение е фактички невозможно и неостварливо – рече Фити.


ВМРО-ДПМНЕ повикува да се формираат работни групи за законот за јазиците


Скопје, 23 јануари, 2018 - 19:57 (META) 

Најмалку што парламентарното мнозинство сега може да го направи е да го повлече предлог-законот за јазиците и да се направат работни групи од сите политички партии, со вклученост на експерти по уставно право и експерти-јазичари, како и МАНУ, за да се види се дојде до решение на оваа ситуација, рече Владимир Ѓорчев, член на Извршниот комитет на ВМРО-ДПМНЕ и в.д. координатор на пратеничката група на партијата.

Одговарајќи на новинарски прашања по денешната прес-конференција тој порача оти ВМРО-ДПМНЕ уште еднаш го повикува владиното мнозинство уште еднаш да направи чекор назад за да се види што ќе се прави со законот, откако претседателот на Република Македонија, Ѓорге Иванов, не го потпиша указот за стапување на сила на законот за јазиците што парламентарното мнозинство го усвои минатата седмица.

– Имаме закон кој што секојдневно на дневна основа, дури и експерти кои и до вчера но и денес се блиски до СДСМ, го критикуваат тој закон. Се работи за закон кој што засега голем број на луѓе во Република Македонија, го засега и целото општество – рече Ѓорчев.


Анѓушев: Состојбите во економијата не се најдобри, потребни се правилни решенија


Скопје, 20 декември, 2017 - 13:31 (META) 

Состојбите во економијата не се најдобри во моментов, но добро е да се прикажат вистинските состојби, за Владата да преземе конкретни и соодветни чекори за правилни економски решенија, рече вицепремиерот за економски прашања, Кочо Анѓушев на тркалезната маса во организација на Македонската академија за науките и уметностите на тема „Растот на македонската економија: состојби, проблеми и перспективи“.

Тој исто така додаде дека, потребно за економски пораст и развој се владеење на правото, за стопанствениците да се чувствуваат безбедно за своите инвестиции, како и стабилна политичка состојба, односно стабилност на земјата.

– Кога зборуваме за поддршка на стопанството, не е решение да поддржуваме монополи и да се задолжуваме за скапи, непродуктивни градежни проекти. Единствено решение е да се поддржат македонските компании да се развиваат, да бидат поконкуретни и да освојуваат нови пазари – нагласи Анѓушев.

Тркалезната маса во МАНУ се организираше во чест на одбележување на 90-годишнината на академик Никола Кљусев, поранешен премиер и доајен на македонската економска наука.


Конференција за ретки болести во МАНУ


Скопје, 11 ноември, 2017 - 9:51 (META) 

Македонската академија на науките и уметностите (МАНУ) денеска ја организира шестата конференција за ретки болести, на која учествуваат педијатри, интернисти, невролози, нефролози, лекари за семејна медицина, генетичари, биохемичари, биолози, лекари од Македонија и од Југоисточна Европа.

Од МАНУ истакнуваат дека благодарение на ваквите состаноци, на кои се прави размена на искуства и сознанија, повеќе болести што порано не се лекуваа во земјата сега се лекуваат.

Поддржувачи на конференцијата се Македонското лекарско друштво и Лекарската комора на Македонија.


Јубилеј на МАНУ – 50 години темелник на македонската наука, јазик, култура и историја


Скопје, 9 октомври, 2017 - 22:42 (META) 

Македонската академија на науките и на уметностите (МАНУ) даде голем придонес во изградбата на современата македонска држава, континуирано ја поттикнува и ја развива научната мисла и работи на негувањето и на унапредувањето на уметностите, изјави вечерва во Македонската опера и балет претседателот Ѓорге Иванов, на свечената академија посветена на 50-годишнината од основањето на МАНУ.

– Многу често, академиите се плод на независноста. Но, во нашиот случај, Академијата не само што ѝ претходеше, туку и создаде услови за независноста на Република Македонија. Академијата поттикнува и врши проучувања на прашања од битно значење за македонската национална култура и за општиот развој на нашата држава – истакна Иванов, кој е покровител на свечената академија.

Иванов рече дека неопходно е функционално партнерство меѓу државата и науката заради носење мудри одлуки и креирање политики темелени на научна основа. Тој рече дека Македонија е исправена пред големи предизвици за кои мора да се бараат решенија, но дека не смее да се отстапуваа од принципите за нашето постоење и опстојување.

Претседателот на МАНУ, Таки Фити, се осврна на почетоците на Академијата, истакнувајќи дека развојот на МАНУ потврдува дека уште од првите декади по формирањето, Академијата навлегла во фазата на нејзината зрелост и израсна во темелник на македонската наука, јазик, култура, историја и во еден од стожерите и симболите во државноста на Македонија.

Фити во име на МАНУ порача дека Македонија била и е мултикултурна земја и дека е потребна изградба на нов и обединет Балкан. Во тој контекст, Фити го поздрави Договорот за пријателство и за соработка на Владата на Македонија со Бугарија.

Во рамки на одбележувањето, на кое присуствуваа премиерот Зоран Заев, претседателот на Собранието, Талат Џафери, пратеници, министри во Владата, претседатели на академии на земјите од регионот и амбасадори, покрај музичката програма, беше прикажан и филмот „50 години МАНУ“.