Двокатните панорамски автобуси на ЈСП биле демонтирани за да се поправат другите


Скопје, 25 октомври, 2018 - 17:16 (META) 

За да ги одржува затворените двокатни автобуси, Јавното сообраќајно претпријатие (ЈСП) Скопје било принудено да вади делови од панорамските автобуси.  Од претпријатието велат дека мора така да се постапува поради тоа што не е обезбедено сервисирање за автобусите, известува „Порталб“.

Портпаролката на ЈСП Скопје, Деспина Трајковска, вели дека поголемиот број од новите градски автобуси кои се пуштаат во сообраќај постојано се расипуваат, а пак останатите се демонтирани и од нив се земаат делови за да се поправат автобусите што треба да се пуштат на линиите. Од претпријатието велат дека ваквата ситуација е наследена од претходното раководство.

– Повеќе од јасно е дека оваа состојба е пораади нискиот квалитет на купените возила пред само 7 години. Тие биле купени прескапо, а квалитетот не ја оправдува цената. Сепак, и покрај ваквата наследена состојба со возилата, раководството на ЈСП успева да го одржи јавниот превоз во нормален тек. Истовремено, за да се подобри квалитетот на јавниот превоз, ЈСП Скопје во соработка со Град Скопје веќе има преземено конкретни мерки за опремување на возниот парк со нови возила – велат од ЈСП за „Порталб“.

Јавното сообраќајно претпријатие Скопје секојдневно пушта во редовен сообраќај 272 градски автобуси. Од нив 200 се двокатни автобуси од Кина, од кои 20 отсто постојано се расипуваат. Од 16-те двокатни панорамски, само два се во функција.

Од обичните автобуси „Лаз“, од 80 во функција се 77. ЈСП има на располагање 20 од постарите автобуси, кои ги пушта на линиите кога ќе се расипат поновите.

Двокатните автобуси од Кина и 80 автобуси од Украина ја чинеа претходната влада околу 40 милиони евра. Набавката е извршена во 2011 година во времето кога министер за транспорт и врски беше Миле Јанакиески.

СЈО отвори нов предмет за набавката на 202 двокатни автобуси, поради сериозни сомнежи за штета на државниот буџет од пет милиони евра. Ги сомничи Миле Јанакиески, Снежана Филиповска – Павлеска како претседателка на Комисијата за спроведување на јавни набавки, и Игор Јанушев и Јулија Јанкуловска – Атанасова, како членови на Комисијата за спроведување на јавни набавки дека ги злоупотребиле нивните службени позиции и овластувања за кинеската компанија „Јутонг“ од Кина.


ЈСП: Неделен возен ред утре и две привремени нови линии


Скопје, 22 октомври, 2018 - 10:46 (META) 

Утре поради државниот празник 23 Октомври- Ден на Македонската револуционерна борба, автобусите од јавниот превоз ќе сообраќаат по неделен возен ред, информираат од ЈСП.

„Истовремено, сакаме да ве информираме дека од среда до недела во редовниот линиски превоз ќе бидат вклучени две привремени линии кои ќе сообраќаат до СЦ „Борис Трајковски“. Станува збор за линиите 100 и 200, првата ќе сообраќа од Ново Лисиче, а втората од Дексион.
И двете линии се воведуваат по барање на Скопски саем, за полесен пристап на посетителите на саемите „Технома“, Меѓународниот саем за градежништво и Саемот за недвижности и инвестиции „Реалекспо““, се вели во соопштението на ЈСП.


ЈСП: Линија 28 ќе сообраќа по скратена траса поради затворање на „Македонско село“


Скопје, 19 октомври, 2018 - 14:07 (META) 

ЈСП информира дека на линијата 28 ќе сообраќа минибус по скратена траса од понеделник 22 октомври.

„Наместо Транспортен центар, почетната станица на автобусите на посочената линија ќе биде почетната станица на линија 4А (улица„Лондонска“), а крајна станица и понатаму ќе биде Горно Нерези (Македонско село).  Причина за кратење на трасата, е затворањето на комплексот „Македонско село“ (затоа се менува почетната станица), а истовремено и натаму ќе се опслужуваат жителите на Горно и Средно Нерези“, информираат од ЈСП.


Град Скопје ветува дека ќе ја забрза постапката за снабдување еколошки автобуси


Скопје, 12 октомври, 2018 - 16:33 (META) 

Старите автобуси кои циркулираат повеќе од 30 години во Скопје спаѓаат меѓу најголемите загадувачи во градот. Со години граѓаните бараат нивна замена, додека Јавното сообраќајно претпријатие (ЈСП) и градот Скопје пред шест месеци ветија дека истите ќе бидат отстранети од употреба. Според информациите што ги обезбеди „Порталб“, ЈСП ја започна финалната фаза на снабдување 40 еко-автобуси кои директорот на претпријатието Кристијан Чушков ги најави пред шест месеци.

Портпаролката на ЈСП, Деспина Трајковска Димова вели дека процесот за набавка на 40 еко-автобуси со гас е во завршна фаза, поточно се чека одлука на меѓународната кредитна институција за кредитот со кој ќе се реализира набавката. Таа исто така известува дека веднаш по пуштањето на еко-автобусите во сообраќај ќе се отстранат од сообраќај старите градски автобуси.

-Процесот на набавка на нови автобуси е во тек, имено постапката е во завршна фаза за задолжување на ЈСП Скопје, кај меѓународната кредитна институција. Оваа институција ќе потпише тендер за набавка на нови автобуси. По завршувањето на тендерот, земајќи ја во предвид најповолната понуда, ќе се утврди точно колку возила, по која цена, и од која компанија и од која земја ќе ја спроведе набавката. По набавка на нови автобуси очекуваме постарите возила, коишто привремено сме принудени да ги пуштиме во сообраќај, конечно ќе бидат отстранети од редовните линии – изјави Трајковска Димова.

Градот Скопје цени дека замената на старите урбани автобуси со еко-автобуси ќе му помогне на градот да го избегне проблемот со загадувањето на воздухот. Оттаму велат дека ќе ја забрзаат тендерската постапка, со цел градот да има еколошки јавен превоз.

-Ние работиме да што побрзо ги завршиме овие постапки, бидејќи е во интерес на градот и неговите граѓани да имаат еколошки јавен превоз. Стари автобуси секако ќе се заменат со нови еко-автобуси затоа што знаеме колку ја загадуваат животната средина и со нивно отстранување ќе го решиме проблемот со загадениот воздух во градот – изјави портпаролот на Град Скопје, Валон Салиху.

Еколошките автобуси трошат двојно помалку гориво бидејќи работат со природен гас, а освен ова и испуштаат така произведуваат помалку штетни честички по здравјето на човекот ПМ10.

Овој проект беше ветен пред шест месеци од градоначалникот на Град Скопје Петре Шилегов и директорот на ЈСП, Кристијан Чушков.

Со набавката на 40 еко-автобуси ќе биде исполнето едно од барањата на граѓаните за еколошки транспорт и животна средина во земјата, а во случај на неуспех граѓаните ќе треба да бараат одговорност од градот Скопје и ЈСП.


Бесплатен јавен превоз за „Бела ноќ“


Скопје, 4 октомври, 2018 - 13:05 (META) 

По повод манифестацијата „Бела ноќ“, користењето на јавниот превоз ќе биде бесплатeн на сите линии кои сообраќаат кон центарот на градот, информираат од ЈСП.

„Бесплатниот превоз ќе важи од 19 часот во сабота (6.10.2018 година), до 6 часот во недела (7.10.2018 година)“, велат од таму.

Во сабота, 6 октомври, по 14. пат ќе се одржи 24-часовната манифестација „Бела ноќ“ и ноќта помеѓу сабота и недела, граѓаните ќе може бесплатно да посетат бројни културни настани во главниот град.

Годинава нема да се одржи 24-часовен филмски маратон во кино „Милениум“, но затоа ќе има проекции на филмови на кровот на ГТЦ во организација на ЕХО фестивал. И годинава ќе има разни концерти и изложби, како и театарски претстави. Преку ден ќе има и настани за најмалите.


Линијата број 25 од Транспортен центар до Водно со изменет возен ред


Скопје, 3 октомври, 2018 - 14:12 (META) 

Линијата број 25 која сообраќа од Транспортен центар до Средно Водно од претстојниот викенд (6-7 октомври) ќе има измена во возниот ред, информираат од ЈСП.

„Терминот за поаѓање на автобусот во 7.30 часот, се менува, односно поаѓањето сега ќе се реализира во 8 часот. Изминатиот период, терминот за поаѓање во 7.30 часот за време на викенди се должеше на барањето на планинарите и поради високите температури во летниот период“, се вели во соопштението.

Од ЈСП потсетуваат дека во викендите и за време на државните празници, возењето со автобусот на линијата 25 е бесплатно за сите граѓани, а истото важи и за сродните лини 25А и 25Б, кои сообраќаат до Средно Водно, а тргнуваат од Стара железничка станица, односно од Дом на печат.

Истото се однесува и за линијата 28 која вози од Транспортен центар до Нерези (Македонско село).


Јавниот автобуски превоз во Скопје од утре по зимски возен ред


Скопје, 31 август, 2018 - 12:27 (META) 

Автобусите на ЈСП и на приватните превозници во Скопје од утре ќе сообраќаат по зимски возен ред, соопшти ЈСП Скопје.

Возниот ред може да се види на веб страницата www.jsp.com.mk.


Владата на денешната седница ќе расправа за пругата Куманово – Бељаковце


Скопје, 22 август, 2018 - 9:51 (META) 

Владата на Република Македонија денеска во 9 часот ќе ја одржи 84 седница на која Македонски железници ќе информира за имплементацијата и состојбата на проектот „Рехабилитација на источниот дел од железничката пруга на Коридор VIII фаза 1 делница Куманово – Бељаковце“.

На денешната седница министрите во владата ќе ја разгледаат и Информацијата за потребата од склучување на Договор за грант меѓу Република Македонија и САД за развојната цел: „Република Македонија како просперитетно, самоодржливо и инклузивно демократско општество“.

На предлог на Министерство за надворешни работи точка на дневен ред ќе биде и информацијата за потпишување Договор меѓу Генералниот секретар на Обединетите нации и Владата на Република Македонија за обврска да се елиминира сексуалната експлоатација и злоупотреба.

Министерството за внатрешни работи ќе го претстави извештајот за извршените преговори со усогласен текст на Договорот меѓу Владата на Република Македонија и Владата на Република Косово за реципрочно признавање на возачки дозволи.

Министрите ќе ги разгледуваат и предлозите на Министерството за одбрана за испраќање на припадници на Армијата на Република Македонија за учество во мировната операција на Организацијата на Обединетите Нации „УНИФИЛ“, во Република Либан, како и за испраќање на припадници на Армијата на Република Македонија за учество во мировната операција „Одлучна поддршка“, во Исламската Република Авганистан.

Владата ќе ги разгледа и информациите за задолжување на ЈСП, со државна гаранција кон меѓународна кредитна институција, за набавка на КПГ автобуси.


Од утре „9-ка“ на нова траса поради изградбата на подземната сообраќајница под Јужен булевар


Скопје, 21 август, 2018 - 11:12 (META) 

Од утре во следните шест години, поради изградбата на подземната сообраќајница зад ТЦ „Рамстор“ и Стара железничка станица, односно под Јужен булевар, автобусите на линијата „9“ ќе сообраќаат по нова траса, извести Јавното сообраќајно претпријатие (ЈСП) Скопје.
Изградбата ќе ја изведува компанијата „Лимак“, која го гради деловно-станбениот комплекс долж улицата Јордан Мијалков.

Автобусите кои од Клинички центар одат кон Скопје Север отсега нема да се вклучуваат од улицата Јордан Мијалков во Јужен булевар туку ќе продолжуваат право сè до Урбан парк близу подвозникот, каде ќе вртат лево по сервисна уличка меѓу паркот и подвозникот и оттука ќе се вклучуваат на Јужен булевар и ќе продолжат по редовната траса.

Автобуската постојка што сега е на Јужен булевар кај Катната гаража „Македонска фаланга“ ќе се премести на улицата Јордан Мијалков и ќе биде поставена пред дирекцијата на „Македонски железници“.


Градските автобуси од утре може да задоцнуваат на „Партизанска“


Скопје, 13 август, 2018 - 16:48 (META) 

Јавното сообраќајно претпријатие (ЈСП) Скопје соопшти дека од утре до 3 септември, е можно да доцнат градските автобуси поради зафат на булеварот „Партизански Одреди“.

Во овој период ќе се вршат геодетски мерења и дупчења на потегот на булеварот од раскрсницата со булеварот 8 Септември до мостот Обединети нации, што може да го попречува нормалното движење, па поради тоа ќе има мали доцнења, иако возниот ред нема да претрпи измени, велат од ЈСП.