Со нова регулатива ќе се зголемува безбедноста на Интернетот


Скопје, 6 февруари, 2019 - 20:26 (META) 

Министерството за информатичко општество и администрација подготвува закон за безбедност на мрежи и информациски системи. Во образложението објавено на Единствениот национален електронски регистар (ЕНЕР) се вели дека мрежата и информациските системи, а пред сè интернетот, играат суштинска улога во олеснувањето на прекуграничното движење на стоки, услуги и луѓе.

„Поради таа транснационална природа, значителни нарушувања на овие системи, без разлика дали се намерни или ненамерни и без оглед каде се случуваат, може да влијаат и врз Македонија. Затоа, безбедноста на мрежните и информациските системи е од суштинско значење за непречено функционирање на внатрешниот пазар. Имајќи предвид дека во  Македонија отсуствува правна регулатива во оваа област, се наметна потребата за изготвување на овој закон. Дополнително, со истиот се транспонира Директивата (ЕУ) 2016/1148 на Европскиот парламент и на Советот од 6 јули 2016 година во однос на мерки за висок општ степен на безбедност на мрежа и информациски системи низ Унијата, односно НИС Директивата“, пишува во образложението.

Како главна цел на предлог-законот се наведува ефикасно справување со предизвиците на безбедноста на мрежите и информациските системи во Република Македонија, во смисла на заеднички минимални капацитети за градење и планирање, размена на информации, соработка и заеднички безбедносни барања од областа на ИКТ.


Фондацијата “Метаморфозис” и МИОА со ново видео го одбележуваат Денот на побезбеден интернет


Скопје, 5 февруари, 2019 - 13:15 (META) 

Во над 140 земји од светот денеска се одбележува меѓународниот Ден на побезбеден интернет под мотото „Заедно за подобар интернет“. Одбележувањето на овој ден претставува повик за акција кон сите засегнати страни, со заеднички сили да помогнат во креирањето на подобар интернет за сите, особено за младите.

Фондацијата “Метаморфозис” во соработка со Министерството за информатичко општество и администрација (МИОА) го одбележуваат денот со ново едукативно видео за подигнување на свесноста кај младите за потребата од побезбедно и поодговорно користење на онлајн технологиите и мобилните телефони.

Сите заинтересирани можат да се вклучат во кампањата и да ја изразат својата поддршка преку тоа што:

1.Ќе речат „не“ на кибер-насилството

Онлајн насилството е широко распространет проблем и сосема е сигурно дека сите оние што се активни на социјалните медиуми имаат посведочено или биле жртва на ваков вид насилство. Но, добрата вест е дека младите од Европа се организираат против онлајн насилството преку кампања наречена #Togetherforrespect (Заедно за респект).

2. Ќе ја заштитат нивната приватност онлајн

Приватноста онлајн можеби изгледа смешно од оваа перспектива, но заштитата на личните податоци е неопходна за да може безбедно и сигурно да се ползуваат благодатите на онлајн светот. Податоците на граѓаните константно се прибираат од страна на платформите за социјални медиуми и разни апликации кои се користат на дневна основа. Ако не се обрнува доволно внимание на поставките за приватност, злонамерни лица можат да добијат пристап до податоците на граѓаните и да ги искористат за наштетување репутацијата или уцени.

3. Ќе научат да размислуваат на критички начин

Измамите на интернет добиваат екстремни пропорции и за оние кои ќе наседнат може да има сериозни последици. Освен измамите, многу поширок е проблемот за дезинформациите и лажните вести. Поради тоа, развојот на вештините за медиумска писменост е апсолутно неопходен.

На оваа веб страница се прикажани сите активности кои што се случуваат насекаде низ светот каде луѓе со слични идеи и предлози се обидуваат да го направат интернетот побезбедно место за сите.

Дополнителни ресурси за начините за заштита на децата и младите на интернет се достапни на веб-страницата на Проектот за Заштита и безбедност на децата и нивните права на интернет – CRISP (Children’s Rights on the Internet – Safe and Protected) или на „Безбедно на интернет“.

Активностите за Денот на побезбеден интернет може да ги следите и на социјалните медиуми преку #SID2019 и #SaferInternetDay.


Сугарески во Брисел побара поддршка од ЕУ за реализација на инфраструктурните проекти


Брисел, 10 декември, 2018 - 12:07 (META) 

Mинистерот за транспорт и врски Горан Сугарески присуствува на вториот Министерски совет на ЕУ за Западен Балкан што се оддржува во Брисел во рамки на Договорот за основање на транспортната заедница.

Во обраќањето пред присутните, Сугарески ја потенцираше важноста од примената на овој Договор, како основа за поврзување на Европската унија и земјите од Западен Балкан, а кој е во насока на економска соработка и интеграција на транспортниот сектор на земјите од регионот во оној на Унијата.

Сугарески посебен осврт даде на инфраструктурните проекти што се реализираат на пан-европските Коридори 8 и 10, како заложба на Владата за зајакнување ма економската позиција преку инвестирање во транспортната инфраструктура. Притоа, тој ја побара поддршката од Европската унија за финансирање на таквите проекти како предуслов за подобра кохезија со земјите од регионот и Европската унија, а во насока на постигнување на европските стандарди до 2030 година.

„Владата преку Министерството за транспорт и врски достави Апликација за инвестициски грант во износ од 5.136.000 евра за изградба на заедничката станица со Република Србија. Искрено, се надевам дека Апликацијата ќе биде одобрена од страна на Управниот комитет на ВБИФ, по што ќе започнат постапките за избор на изведувач и надзорен инженер. Соглано планот за набавки, се предвидува градежните работи да започнат до средината на 2020 година”, потенцираше министерот Сугарески.

Во рамки на Самитот, министерот Сугарески оставри и средба со Еврокомесарката за транспорт, Виолета Булц, на која средба се разговарше за поддршката на ЕУ за инфраструктурните проекти што се реализираат во Република Македонија. Покрај министерот Сугарески, на Самитот присуствуваат и министерите за транспорт и инфраструктура на земјите од Западен Балкан.


Свилановиќ: Кибернетичкиот простор, безбедносно жариште на Западен Балкан


Истанбул, 6 декември, 2018 - 13:48 (META) 

Новото безбедносно жариште и сериозен предизвик на глобално, регионално и локално ниво е кибернетичката сигурност, изјави денеска генералниот секретар на Регионалниот совет за соработка (РСС) Горан Свилановиќ на Третата регионална конференција за координација во борбата против тероризмот и насилниот екстремизам во Истанбул.

Тој додаде дека показател за тоа е и податокот дека само во 2017 година во шесте земји од Западен Балкан биле реализирани преку 400 кибернетички напади на институции.

Свилановиќ додаде дека Интернетот истовремено станал една од главните алатки на современите терористички организации за пронаoѓање, регрутирање и обука на новите членови, соопшти РСС

На конференцијата е претставена и Студијата „Ново виртуелно бојно поле – како да се спречи радикализацијата во рамките на кибернетичката безбедност на Западен Балкан“.

Студијата ја порача РСС, а ја финансираше Европската унија и таа е всушност сеопфатен пресек и анализа на кибернетичката безбедност и радикализација на интернетот во Албанија, БиХ, Косово, Македонија, Србија и Црна Гора.

Покрај Студијата е претставена и брошура и на македонски јазик, во која е направено визуелизирано резиме на наодите и препораките за унапредување на безбедноста во областа на кибернетичкиот простор.

На Конференцијата што ја организира РСС во соработка со домаќинот Турција, се зборува и за спречување на насилниот екстремизам и контрола на малокалибарското оружје.

РСС е меѓувладино извршно тело на земјите членки на Процесот за соработка во Југоисточна Европа, чиј основач и полноправен член е и Македонија.


Водата во Струга е небезбедна за пиење


Струга, 28 ноември, 2018 - 13:35 (META) 

Водата од градската водоводна мрежа во Струга и селата кои се приклучени на истата, не е безбедна за пиење, информираат од Центарот за јавно здравје (ЦЈЗ) Охрид.

Поради обилните врнежи од дожд кои деновиве го зафатија подрачјето на Општина Струга дојде до нарушување на квалитетот на водата за пиење од градската водоводна мрежа во Струга, по однос на параметарот матност.

Од извршените мерења на водата за пиење од градскиот водовод во Струга, од страна на екипи на ЦЈЗ Охрид, претпладнево, констатирана е зголемена матност во водата за пиење, со вредности значително поголеми од законски пропишаните.

Согласно процедурите, известени се надлежните институции и соодветните инспекциски служби за натамошно постапување. Од ЦЈЗ Охрид потенцираат дека во координација со надлежните институции континуирано ќе ја следат состојбата и навремено ќе информираа за состојбата со квалитетот на водата во градскиот водовод во Струга.


Во две од три тетовски села водата не е за пиење


Тетово, 20 ноември, 2018 - 10:01 (META) 

Поголемиот дел од жителите на селата на Oпштина Тетово и околните општини користат вода за пиење што не е чиста. Ова го покажуваат анализите на Институтот за јавно здравство (ИЈЗ) во Тетово, пишува „Порталб.мк“.

Во 68 отсто од вкупно 99 села на Општината Тетово заедно со општина Желино и Брвеница водата за пиење во месеците јули, август и септември не била за пиење, покажуваат официјалните податоци кои Порталб.мк успеа да ги обезбеди од Институтот за заштита на здравјето на Тетово (ЈЗУ).

„Анализите на водата во селата се вршени редовно и можам да кажам дека во повеќето од нив имаме лоши резултати. Ова е како последица од старата водоводна мрежа, недостаток на дезинфекција на резервоарите за вода, не прочистување на каптажите за вода и недостаток на оградување или заштита на изворите од каде се зема водата. Доколку се санираат овие сегменти би имале чиста вода за пиење. Не можам да кажам дека општините не прават ништо, бидејќи тие вршат хлорирање на водата, секогаш кога ние им препорачуваме“, вели докторот и управителот на ЈЗУ Тетово, Ратко Давидовски, кој не одговори, кои се селата во кои водата не е за пиење.

Вода

Мострите за анализа се земени од јавните чешми, чешми во џамиите, училиштата и др. Давидовски смета дека буџетот и финансиските средства се најголемата пречка поради која општините имаат ваква состојба на вода.

„Имаат проекти и се обидуваат да бидат поблиску до граѓаните, имаат ангажирани лица кои се занимаваат со ова прашање во секоја општина, но сметам дека немањето финансиски средства за целосно уредување на водоводната мрежа и резервоарите е главната пречка. Ние, сме вршеле повремени анализи, и можам да кажам дека на годишно ниво, владата финансира 300 анализи за Тетово, но ова не е доволно за да се има задоволителна здравствена заштита за жителите на Тетово и околните села. Општина Желино и Брвеница како и руралните општини имаат потпишано договори со ЈЗУ за контрола на квалитетот на водата за пиење. Секогаш кога ние им препорачуваме да се контролира квалитетот на водата, тие ги почитуваат нашите препораки. Општина Желино и Брвеница имаат проблеми со изворите бидејќи истите се наоѓаат во такви зони, не планински предели, и тоа го имаат сфатено тоа и водат грижа за оваа состојба“, вели Давидовски.

Инаку, во текот на претходниот месец, жителите на Тетово се пожалиле дека водата за пиење има необична миризба, но ЈЗУ, изјави дека се дозволува водата да се пие бидејќи тоа се случува заради мешање на двата извори од кои градот на Тетово се снабдува со вода.

Граѓаните, секогаш кога ќе почувствуваат дека водата не е во ред или пак има чудна миризба, можат да се јават до Општина Тетово, со цел општинските власти да порачаат анализи, да се констатира дали водата што се користи секој ден е безбедна за пиење или не.


Македонската делегација во Брисел го почнува подготвителниот скрининг за Поглавјето 24


Брисел, 12 ноември, 2018 - 9:58 (META) 

Македонија денеска го започнува подготвителниот скрининг за Поглавјето 24 насловен „Правда, слобода и безбедност“. Македонската делегација во Брисел ја предводи вицепремиерот за европски прашања Бујар Османи, во својство на главен преговарач и шеф на државната делегација за преговори со ЕУ.

Состанокот ќе трае три дена, за време на кои експертските тимови ќе ги разгледуваат седумдесетте страници од европското законодавство посветен на овие теми. До крајот на оваа година треба да се одржат уште три скрининг состаноци.


Вакцинирање и поставување чипови на кучињата бездомници во Западна Македонија


Тетово, 18 октомври, 2018 - 12:01 (META) 

Кучињата бездомници се честа слика во Западна Македонија, а најмногу можат да се забележат во Гостивар и Тетово. Денеска, градоначалникот на Општина Гостивар, Арбен Таравари, соопшти дека започнал процесот на вакцинација и поставување на чипови на кучињата. Првата официјална операција е извршена во Тетово, бидејќи од пријавените неколку фирми во тендерска постапка, ветеринарите кои ја добиле работата се токму од Тетово.

– Денеска на кучињата им се вршеше вакцинација и поставување на чипови. Тие се назначени со  градот и бројот на кучето кое што е третирано. Ќе се обидеме што поскоро да ги третираме сите кучиња во Општина Гостивар, за и граѓаните да можат да се чувствуваат безбедно – изјави Таравари.

Претседателот на Ветеринарната комора на Македонија, Томислав Николовски истакна дека со ова се започнува решавање на многу сериозен јавно здравствен, но и комунален проблем, односно дека на целиот процес ќе се пристапи систематски.

Во просторот на старата касарна во Гостивар е веќе започнат процесот за третирање на кучињата бездомници, но, како што кажа Таравари, не се завршени сите аминистративни работи, за целосно и официјално да се започне со работа, односно да се лиценцира центарот за третирање на кучињата.

Постојат и податоци кои покажуваат дека кучињата бездомници се носат од еден град во друг, но Таравари не сакаше да шпекулира, се додека не се добијат сигурни информации. Официјалната бројка на кучиња бездомници не е позната, но се смета дека има од 300 до 500 само во Општина Гостивар.


Матис пристигна во Скопје поради можното руско мешање во референдумот


Скопје, 17 септември, 2018 - 9:38 (META) 

Американскиот секретар за одбрана Џејмс Матис утринава слета на Скопскиот меѓународен аеродром и беше пречекан од министерката за одбрана Радмила Шекеринска и американскиот амбасадор Џес Бејли.

Според најавената агенда, Матис денеска ќе се сретне со Шекеринска, со премиерот Зоран Заев и со претседателот Ѓорге Иванов.

Портпаролот на Пентагон Ерик Пеон, вчера соопшти дека Матис ќе ги повика македонските граѓани да гласаат на референдумот и, исто така, ќе ги истакне петте милиони долари што ги обезбедува САД годишно за безбедносна поддршка.

-Русија се обидува да ги убеди Македонците дека Западот ќе ги напушти, дека Русија е стабилното влијание во регионот. Тоа едноставно не е вистина. Промената на името и влегувањето на земјата во алијансата ќе го намали влијанието на Москва. Зачленувањето на Македонија во НАТО е еден од најлошите кошмари на Русија – изјави Пеон за „Њујорк Тајмс“.

Во најавата на американскиот весник на посетата на Матис се цитираат западни дипломати, кои велат дека 40 нови сајтови се појавуваат дневно на Фејсбук да ги охрабрат луѓето да го бојкотираат референдумот. Овие сајтови, кои потекнуваат надвор од земјата, се вклопуваат во шемата на руското влијание на други избори, велат дипломатите.

Кога Матис ја најави посетата на Македонија минатата недела, тој кажа дека доаѓа да ја поддржи Македонија пред претстојниот референдум за името и за влез во ЕУ и НАТО, но и да ја изрази загриженоста од можно руско мешање во гласањето.

-Тоа ме загрижува… Тој вид пакост што Русија го практикува од Естонија до САД, од Украина и сега до Македонија, секогаш се прилагодува на специфична ситуација и отсекогаш бил неприфатлив – рече Матис најавувајќи ја посетата.


Бектеши: Еден милион туристи ќе ја посетат Македонија, предвреме ќе ја оствариме целта


Скопје, 14 август, 2018 - 14:02 (META) 

Според последните податоци  што вчера ги објави Државниот завод за статистика, зголемувањето на бројот на туристи продолжува во континуитет, па наместо до 2020 година, како што прогнозиравме, ние сме на прагот предвреме да ја оствариме зацртаната цел, годинава да оствариме еден милион туристи со три милиони ноќевања, изјави денеска министерот за економија, Крешник Бектеши.

Според Бектеши, учеството на туризмот во домашниот бруто-производ (БДП) се очекува да биде околу три проценти, имајќи предвид што проекцијата до 2020 година е тоа да биде четири проценти. Овој континуиран пораст на бројот на туристи, ќе значи и поголем девизен прилив.

– Ова е знак дека се движиме во вистинска насока, а политиките се одлично поставени. Влезот на Македонија во НАТО ќе значи и отстранување на последната бариера што често пати е споменувана од странските туристи кои ја заобиколувале нашата земја, а тоа е прашањето околу поголема сигурност и безбедност. Но, тоа ќе значи и засилени инвестиции во туристичката инфраструктура, што секако ќе придонесе за развој на туристичкиот сектор – потенцираше Бектеши.