Премиерот Димитар Ковачевски денеска се сретна со неговиот колега од Словенија, Роберт Голоб. Како што информираат од владиниот кабинет, на билатерален состанок учествувале и министерот за земјоделство, шумарство и водостопанство, Љупчо Николовски, вицепремиерката и министерка за надворешни и европски работи на Словенија, Тања Фајон и министерката за дигитализација на Словенија, Емилија Стојменова Дух.
„На состанокот беше констатирано дека Северна Македонија и Словенија веќе 31 година развиваат искрено и цврсто пријателство, кое што резултира со продуктивна билатерална соработка“, наведено е во владиното соопштение.
Премиерот Ковачевски рече дека Северна Македонија го почитува ангажманот на Словенија во сите важни процеси за нашата држава, при НАТО интеграцијата, кога беше втората земја што го ратификуваше Протоколот за пристапување и посебно при отворањето на пристапните преговори со ЕУ, во јули, минатата година, по 17 години од добиениот кандидатски статус.
Двајцата премиери потпишаа заедничка декларација за зајакната соработка помеѓу Република Северна Македонија и Република Словенија, по што одражаа и заедничка прес конференција.
„Денеска направивме пресек на нашите севкупни односи. Разговараме и за други актуелни и важни регионални и меѓународни прашања, меѓу кои и за војната во Украина и за нашето сојузништво и обединетост по тоа прашање. Се договоривме и ќе се залагаме за зајакнување на билатералната соработка преку редовен политички дијалог, вклучително и преку одржување меѓувладина седница во текот на 2023 година за сите важни области за граѓаните“, рече Ковачевски.
