Членовите на Државната комисија за спречување на корупцијата (ДКСК) в понеделник се враќаат на работа, бидејќи в недела им завршува годишниот одмор, информираа од Комисијата за „Мета“.

Антикорупциската комисија беше во центарот на политичките препирки, откако пратениците на ВМРО-ДПМНЕ и на Коалицијата за подобра Македонија во вторникот поднесоа барање за мислење до ДКСК, велејќи дека собраниската седница за разрешување на јавниот обвинител Марко Зврлевски, почната на 5 јули и сè уште во тек, е во спротивност со член 8-а од Изборниот законик.

Според тој член, од денот на донесувањето на одлуката за распишување избори не може да се почне со постапка за вработување нови лица или постапки за престанок на работен однос во државни и во јавни институции, а воедно почнатите постапки се ставаат во мирување, освен во случај на итни и неодложни работи, тврдат од ВМРО-ДПМНЕ. Пратениците велат дека точката за разрешување на Зврлевски не е „итна и неодложна“ и бараат мислење од Антикорупциска комисија.

Според информацијата што ја добивме денеска од комисијата, можно е антикорупционерите да се зафатат со одговорот за ВМРО-ДПМНЕ најрано в понеделник.

Во досегашната расправа на шестата седница на Собранието за разрешувањето на Зврлевски, кој од СДСМ, кога оваа партија беше во опозиција, беше нарекуван еден од главните соработници на „режимот на Никола Груевски“, зборуваа главно пратениците од ВМРО-ДПМНЕ, кои тврдеа дека Зврлевски е професионалец без дамка врз кариерата во последните 30 години, а СДСМ сака да го смени поради политички причини, односно како одмазда за тоа што ги почнал случаите „Пуч“ и „Поткуп“ против претседателот на партијата, Зоран Заев.