Активистите од „Енџелкетс санктуари“ (Angelcats Sanctuary) денеска споделија информација дека во скопската населба Тафталиџе граѓанин без да праша си зел две пластични изолирани кутии кои биле поставени пред трговски локал за да може бездомните мачки од оваа населба да имаат суво засолниште.
„На снимката од видео надзор поставена во локалот се гледа дека возрасен човек поминува, ги разгледува кутиите и си заминува. По извесно време истиот човек се враќа и без да праша никого ги товари кутиите на неговиот велосипед, иако бидејќи се големи му паѓаат, па пак ги става на велосипедот и си оди“, изјави за Мета.мк активистката Маја Поповска која повеќе од една деценија ги спасува мачките од суровиот живот низ скопските улици.
Таа нагласи дека во оваа населба има повеќе од 20 мачки, за кои тие како здружение, собирајќи донации, обезбедиле да се стерилизираат и да се заштитат од паразити, да ги хранат, а со мал грант од Цивика Мобилитас и помош од ентузијастите, минатата зима изработија 60 куќички за бездомни мачки.
Овие топли засолништа за мачките тие ги поделија на активистите и означени се со налепници дека се за бездомни мачки. Поповска вели дека земајќи ја предвид малата вредност на кутиите не верува дека би имало резултат ако за инцидентот пријават во полиција, но додава дека во Македонија луѓето кои не се активисти всушност не се свесни колку труд и финансии се потребни за да се обезбеди помош за уличните животни, вклучувајќи ги и мачките.
Според неа, мнозинството од нашите сограѓани воопшто не се заинтересирани за помош на беспомошните животни, а уште помалку за вдомување на бездомните мачки кои често се и со телесен хендикеп.
