Денес ќе се гласа за нова резолуција во за примирје во Газа во Советот за безбедност на Обединетите нации (ОН), откако во петокот Русија и Кина ставија вето на нацрт-резолуција поднесена од Соединетите Американски Држави со која се бараше „итно примирје“, пренесува Гардијан.
Руски претставник во ОН изјави оти резолуцијата, наводно, не била доволно строга во своите барања за да се спасат палестински животи.
Според Агенцијата Франспрес, во новата резолуција повторно се бара „итно примирје“, но такво што ќе довело до „трајно издржливо примирје“. Дополнително, се бара ослободување на сите заложници кои Хамас ги зароби за време на нивниот напад врз Израел на 7 октомври, но и се бара непопречен проток на хуманитарна помош во Газа од страна на Израел. Последното барање доаѓа откако агенцијата на ОН за помош на палестински граѓани најави дека Израел спречува проток на хуманитарна помош во северот на Газа.
Резолуцијата е напишана од избраните членови на Советот за безбедност (односно не од големите пет земји кои имаат право на вето) кои сорабтувале со САД изминатиот викенд на пишувањето на нивната резолуција.
Инаку, потпретседателката на САД Камала Харис го предупреди премиерот на Израел, Бенјамин Нетанјаху, дека САД не би стоела зад копнена офанзива во Рафах, нешто што го кажа и државниот секретар.
„Каква било масовна воена операција во Рафах би била огромна грешка. Ја проучував мапата на регионот – нема каде да одат тие луѓе. А станува збор за милион и пол луѓе во Рафах кои се таму затоа што им било кажано да одат таму“, изјави Харис.
Претседателот на Франција, пак, Емануерл Макрон, предупреди дека дополнително раселување на граѓаните во Рафах би претставувало воено злосторство.
Бројот на убиени во Газа се качи до 32.333, а бројот на повредени е 74.694.
Истовремено, медицински работници во болниците во Газа ги опишаа условите за работа како „незамисливи“. Медицинските лица во болниците се справуваат со напади од израелските сили, недостиг на ресурси и прекумерен број на пациенти. На пример, Европската болница во близина на градот Хан Јунис моментално има 1.00 кревети, иако вообичаено има капацитет за само 200.
„Има околу 22.000 луѓе кои се раселени од другите делови на Газа, кои престојуваат во ходниците и во шаторите во болницата, бидејќи луѓето чувствуваат дека е посигурно да се биде овде отколку на кое било друго место“, изјави д-р Константина Илија Кариди, анестезиолог која е во посета во Газа.
