Демонстрантите и полицијата се судрија на булеварот Свети Климент Охридски, пред зградата на Театар „Комедија“.
До инцидентот дојде откако лидерот на Достоинство, Стојанче Ангелов, кажа дека полицијата нема право да ги сопира граѓаните да го изразат својот револт бидејќи протестот е мирен и меѓу демонстрантите нема насилници. Тој апелираше старешината да ги повлече полицајците за демонстрантите да продолжат да се движат.
Демонстрантите, по повикот на Стојанче Ангелов на кратко се судрија со полицијата #Протестирам #П pic.twitter.com/9Xg8kORv9q
— META.mk (@meta_agency) April 19, 2016
Ангелов во еден момент ги повика демонстрантите да му се приклучат и да ѝ се спротивстават на полицијата. Демонстрантите тргнаа кон полицајците и настана мал судир, при што полицајците успеаја да ги одвратат граѓаните назад.
Атмосферата е тензична, а граѓаните извикуваат „Пуштете го народот“, „Долу диктатура“, „Слобода“.
Протестот почна во 18 часот, пред зградата на Специјалното јавно обвинителство, од каде маршот продолжи кон Собранието на Република Македонија. Движејќи се кон Собранието, демонстрантите застанаа пред Министерството за правда, каде фрлаа тврди објекти и кесички со боја.
Граѓаните извикуваат „Пуштете го народот“, „Долу диктатура“, „Слобода“ #Протестирам #П pic.twitter.com/dzTdaHbn9K
— META.mk (@meta_agency) April 19, 2016
По изразениот револт пред Собранието, демонстрантите се упатија пред зградата на Владата, а оттаму кон ЕУ-Инфоцентарот, каде и се случи малиот инцидент.
