Директорот на канцеларијата за Косово на владата на Србија, Марко Ѓуриќ, денеска изјавил дека не го признава законот за Трепча, кој синоќа го усвои собранието на Косово, и дека ќе предложи српската влада итно да побара заседавање на Советот за безбедност на ОН, поради кршење на Резолуцијата 1244.
Имено, законот за Трепча предвидува овој рударско-металуршки комбинат да стане акционерско друштво во кој косовската влада би имала 80 отсто од акциите, а 20 отсто од акциите би им припаѓале на работниците и на другите акционери.
На вонредна прес-конференција за новинарите, Ѓуриќ соопштил дека станува збор за обид да се заврши етничкото чистење, бидејќи Трепча е темелот на српското постоење на северот на Косово.
– Трепча ја изградија и ја одржаа голем број генерации Срби и тие што таму работеа. Тој што удира по Трепча ја прекршува и Резолуцијата 1244, бидејќи во неа експлицитно се спомнува Трепча и правото на работа – изјавил Ѓуриќ.
Тој истакнал дека одлуката која косовското собрание ја донела за Трепча е неважечка и од неа не произлегуваат никакви правни дејства ниту последици, а како неприфатливо го оценил молчењето на институциите на ЕУ.
Според Ѓуриќ, законот бил усвоен со игнорирање на волјата на српските претставници и институции на Косово, со што бил поништен коалицискиот договор, врз основа на кој српските претставници учествувале во заедничките институции.
Владата на Србија на оваа тема ќе расправа в понеделник.
