Рускиот претседател Владимир Путин предупреди на „проблеми“ со соседна Финска откако таа се приклучи на НАТО оваа година, во интервју објавено на државната телевизија „Россија“, пренесе Гардијан.
Финска, која дели 1.340 километри граница со Русија, се приклучи на НАТО во април годинава. Во последните недели, Хелсинки ја обвини Москва за „хибридна војна“ со туркање на барателите на азил преку граничните премини (Русија тоа го негира), што доведе до затворање на сите гранични премини, освен еден.
Западот „ја вовлече Финска во НАТО. Дали имавме некакви спорови со нив? Сите спорови, вклучително и територијалните во средината на 20 век, одамна се решени“, рече Путин.
„Таму немаше проблеми, сега ќе има, бидејќи ќе создадеме воен округ Ленинград и ќе концентрираме одредена количина воени единици таму“, додаде тој.
