Во својата 96-та година од животот, денеска почина Атанас Коларовски, знаменитиот играорец и кореограф од првата генерација на ансамблот за народни песни и игри „Танец“.
Атанас Коларовски е роден во Драчево, Скопско, во 1926 година. Со формирањето на Државниот ансамбл „Танец” станал негов член и речиси дваесет години бил уметнички директор, кореограф и играорец-солист.
Неговиот живот се опишува како неверојатно богат и успешен. Во 1970 година се преселил во Соединетите Американски Држави каде продолжил со својата активност како инструктор, пренесувајќи им го богатството на македонскиот музички и играорен фолклор на генерации вљубеници од целиот свет.
„Коларовски е автор на повеќе врвни кореографии за „Танец“, меѓу кои и на антологиските „Драчевка”, „Калајџиско” и „Невестинско”. Тој остави длабока и неизбришлива трага на целокупната македонска култура, а неговите творби го внесоа во вечниот македонски незаборав“, соопштија од „Танец“.
