Најмалку пет припадници на турските безбедносни сили загинаа во три одвоени бомбашки напади на курдските милитанти, извршени во близина на границата на Турција со Сирија и со Иран, јавуваат воени и безбедносни извори.
Еден војник е убиен, а уште шест се ранети во бомбашки напад што се случил утринава во Нусајбин, во близина на турско-сириската граница, соопшти војската.
Во бомбашки напад на Работничката партија на Курдистан на воено возило во близина на границата со Иран, се убиени двајца полицајци и еден војник, додека девет припадници на безбедносните сили се ранети, јавуваат безбедносни извори.
Уште еден полицаец загина, а тројца се ранети кога во провинцијата Маридин експлодирала бомба на патот, која ја подметнале милитантите. Експлозијата го разнела оклопното возило.
Турската војска соопшти дека вчера се убиени 23 курдски милитанти во судирите во Нусајбин, Јуксеков и во Сирнак.