Претставници на 171 држава денеска во седиштето на Обединетите нации (ОН) во Њујорк ќе го потпишат договорот за климатските промени кој беше постигнат во декември 2015 година во Париз, изјави генералниот секретар на ОН, Бан Ки-мун.
– Ова е историски момент. Никогаш порано немало толку земји кои потпишуваат некој меѓународен договор во еден ден – изјави Ки-мун.
Францускиот претседател Франсоа Оланд повика светот да го примени договорот и најбргу што може да почне да го спроведува во практика.
Во седиштето на ОН ќе биде одржана церемонија на потпишување на глобалниот договор за борба против климатските промени. Земјите што денеска нема да потпишат, ќе имаат можност да го сторат тоа во рок од една година.
Церемонијата на потпишување на овој историски документ, која се одржува на одбележувањето на Меѓународниот ден на планетата Земја, следува четири месеци по усвојувањето на договорот за климатските промени во Париз кој е прв чекор кон обврзување на земјите во реализација на ветувањето за намалување на ефектот од стаклената градина.
