Македонија до крајот на овој век ќе има половина милион жители помалку, се наведува во последниот Извештај за перспективите на светското население на Обединетите нации, според кој земјата е на 29. место во групата од 43 држави што се соочуваат со проблемот на депопулација.
Во извештајот се наведува дека Македонија во 1950 година имала 1,2 милиони жители, а минатата година земјата имала околу 2.078.000 жители. Се проценува дека оваа бројка ќе се задржи и во 2030 година, но оти дваесет години подоцна, односно во 2050 година македонското население ќе се намали за 141.000 жители, или за 6,8 отсто помалку од 2015 година.
Според процените на ОН, во 2050 година Македонија ќе има 1,9 милиони жители, а на крајот на векот само 1,48 милиони.
Обединетите нации, исто така, проценуваат дека и другите земји од Западен Балкан ќе имаат помалку жители кон крајот на векот. Според нивните прогнози, Босна и Херцеговина која во моментов има 3,81 милиони жители во 2100 година ќе има 1,91 милиони, а Албанија од сегашните 2,89 милиони во 2100 година ќе има само 1,75 милиони население. Населението ќе се намали и во Хрватска, и тоа од сегашните 4,24 милиони на 2,61 милиони жители, додека во Црна Гора во 2100 година ќе живеат 437.000 жители, наспроти сегашните 626.000.
Опаѓање на бројот на населението ќе биде забележано и во Словенија, каде во 2100 година ќе има 1,69 милиони население, наспроти сегашните 2,06 милиони, додека во Србија од сегашните 8,58 милиони во 2100 година ќе има 5,33 милиони.
