Опозицискиот СДСМ повторно ги повика порталите „Република“, „Курир“ и „Радио Слободна Македонија“ да дадат одговор за начинот на кој се финансираат.
Од партијата наведуваат дека порталот „Република“ остварил приход поголем од 1,1 милион евра, приходот на „Курир“ изнесува 1,3 милиони евра, додека на „Радио Слободна Македонија“ во 2013 година само со еден вработен остварило 242.000 евра приходи.
„Со недели молк, нема одговори за начинот на финансирање на овој провладин медиум. „Република“ и другите медиумски „курири“ на уредникот во заминување Никола Груевски не кажуваат од каде им се милионите на нивните сметки. Зошто и „Република“, како и „Курир“, молчи за милионските приходи? Никола Груевски и фамилијата преку пропаганда на медиумските „курири“ се обидуваат да ги сокријат криминалот и корупцијата во последните 10 години“, стои во соопштението од СДСМ.
Од партијата се наведува дека транспарентноста, непристрасноста и објективноста се клучни професионални и етички новинарски стандарди и оти јавноста очекува одговори за начинот на кој се финансираат овие медиуми, кои за три години оствариле приходи од три милиони евра!
„Според податоците од Централниот регистар, „Радио Слободна Македонија“ во 2013 година само со еден вработен остварило 242.000 евра приходи. Како е можно со само еден вработен да се оствари приход од 242.000 евра? Заедно со 2014 година, вкупниот приход на „Радио Слободна Македонија“ изнесува повеќе од 617.000 евра. Јавноста знае дека еден од сопствениците на „Радио Слободна Македонија“ е фирмата НВСП. Сопственик на НВСП е Владислав Стајковиќ, близок до братучедот на Груевски, Сашо Мијалков“, стои во соопштението.
Од партијата наведуваат дека НВСП е основач на агенцијата за обезбедување СГС, зад којашто стои лично Мијалков.
Во соопштеното се наведува дека порталот „Курир“ две недели молчи за поврзаноста на фирмата „ЕМ Медиа ДОО Скопје“, сопственик на „Курир“, со Сашо Мијалков, преку фирмата НВСП на Стајковиќ.
„Вистината за Македонија, исто така, откри дека фирмата НВСП на Стајковиќ е дел од провизијата од 540.000 евра што братучедот на Груевски, Мијалков, ја бара за набавување опрема за прислушување од Израел. Од каде им се милионските приходи на медиумите што ги уредува Никола Груевски? Дали пропагандата по нарачка на Никола Груевски, за прикривање на криминалот и на корупцијата во изминатите 10 години, се плаќа со пари на граѓаните?“, стои во соопштението.
