Претседателот на стопанската комора на Кукуш, Павлос Тоникидис поднесе тужба до локалниот суд адресирана до сите одговорни за ситуацијата на Идомени поради двомесечната блокада на железничката пруга. Тоникидис во тужбата потенцира дека блокадата и нефункционирањето на железничката линија им создава огромна финансиска штета на извозниците, но и општо на сите трговци и бизнисмени од Кукуш.
Неделава тужба до сите одговорни за ситуацијата на Идомени до обвинителството во Солун поднесе и префектот на северна Грција, Апостолос Ѕиѕикостас реагирајќи и против затворената железничка линија, но и барајќи да се интервенира за да се спречат криминални активности кои можно е да се одвиваат во бегалскиот камп.
Тужбата на Ѕиѕикостас и неговото отсуство од потпишувањето на договор меѓу Солун и УНХЦР за обезбедување 660 станови во Солун за привремено сместување на бегалците наиде на критика на солунскиот градоначалник Јанис Бутарис, кој го обвини префектот за ксенофобично однесување.
„Некои кога ги гледаат нашите иницијативи коментираат дека се грижиме само за ‘странците’, дека глумиме хуманост за другите, додека Грците во кризата гладуваат. Националистичката мизерија и комплекси го прават човек слеп“, истакна Бутарис.
Затворената железничка линија, која не функционира над 60 дена според извозниците прави штета од над 6 милиони евра за транспортерите и компаниите кои извезуваат. Превозот наместо преку Скопје оди преку Софија, поради што се плаќа и дополнителна сума за товарење на возовите кон Софија и временскиот период за транспорт е многу подолг од тој преку Скопје.
Грчката влада ветува дека е прашање на недели додека се расчисти Идомени и се решат проблемите, но и натаму на нејзина сметка од сите страни доаѓаат критики што не се интервенира да се ослободи линијата и бегалците побрзо да се преместат во бегалските центри.
Весникот „Катимерини“ коментира дека владата очигледно не сака да применува сила за да се нормализира железничкиот превоз.
Според официјалните бројки на грчката влада денес во Идомени се регистрирани 8.956 бегалци, а во целата држава 54.172 лица.
