За да се стави крај на војната во Сирија, треба сите политички фактори, вклучувајќи ги и претставниците на Асад, да седнат на иста маса, вели високата преставничка за надворешна политика и за безбедност на ЕУ, Федерика Могерини.
– Сите релевантни играчи треба да седнат и да разговараат – изјави Могерини пред утрешниот состанок на шефовите на дипломатиите на земјите-членки на Европската унија во Брисел.
Покрај тоа, таа додаде дека ЕУ ги поддржува напорите на специјалниот пратеник на Обединетите нации, Стефан де Мистура, да иницира политички дијалог меѓу Асад и умерената опозиција.
Овој став беше поддржан од неколку претставници на земји-членки, кои пред состанокот рекле дека Асад не може да биде долгорочно решение за Сирија, но потребно е да се разговара со него за формирање преодна влада.
Кога ја прашале како ќе ја оцени руската воена интервенција во Сирија, Могерини рекла дека тоа е комплицирано прашање, за кое не може да има недвосмислен одговор.
– Борбата против таканаречената Исламска држава е нешто за кое сите може да се сложиме, но исто така има и негативни аспекти, како што е упадот на руските борбени авион во турскиот воздушен простор – истакна Могерини.
