По долгогодишна пауза, телевизиите повторно ги вратија дебатите за дневно актуелните теми. Во последно време, дебатните емисии речиси исчезнаа од малите екрани и како форма и како суштина.
Сега, гледачите имаат голем избор. На телевизија „24 Вести“ ги има „Вин-вин“ и „24 Анализа“. На „Телма“ секој работен ден оди „Топ тема“. На „Алсат М“ ги гледаме „Патот кон“ и „360 степени“, а „Нова ТВ“ од денеска ја воведува „Нова дебата“.
Минатата пролет, за време на претседателските и парламентарите избори, дебатите и теливизиите што ги емитуваа се броеа на прсти. Сега, за новите случувања, почнувајќи од студентските протести, „бомбите“ на Заев, акцијата „Пуч“ и случајот со смртта на малата Тамара, уредниците на неколку телевизии организираат дебатни соочувања со универзитетски професори, политичари, новинари и со експерти.
Пред неполн месец на телевизија „Телма“ почна да се емитува дебатната емисија „Топ тема“, секој работен ден во 20.15 со Сања Васиќ, Александар Чомовски, Снежана Лупевска и со Боби Христов. Вчерашната „Топ тема“ му беше посветена на поранешниот претседател Борис Трајковски, по повод 11-годишнината од неговата смрт.
– Ја воведовме „Топ тема“ затоа што почувствувавме дека има потреба од таква емиисија. Првото искуство е одлично. Одлично е примена и добивме голема гледаност. Таа сега ни е најгледаната емисија. Изненадени сме пријатно од одѕивот на соговорниците. Иако сите нè уверуваа дека нема соговорници, се поикажа дека и ним и на гледачите им е потреба дебата – ни рече Сања Васиќ, одговорен уредник на „Телма“.
На телевизија „24 Вести“ се емитуваат емисиите „Вин-вин“ на Оливера Трајковска и „24 Анализа“. Вчера во „Вин-вин“ гостуваа претседателот на ЗНМ, Насер Селмани, и новинарот Бранко Героски, кои дебатираа за четвртата „бомба“ на Заев за прислушување на новинарите. Претходниот ден на „24 Анализа“ за прислушувањето и за упадот во безбедносните служби дебатираа универзитетските професори Владимир Пивоваров и Златко Кескоски.
На телевизија „Алсат М“ има две дебатни емисии кои третираат дневно актуелни теми. Емисијата „Патот кон“ ја води уредникот на телевизијата, Мухамед Зекири, и се емитува секој четврток во 21.45 часот. Во вчерашната емисија дебатираа две од прислушуваните новинарки, Јадранка Костова и Оливера Трајковска.
Емисијата „360 степени“ ја води новинарот Васко Попетревски и се емитува во понеделник, среда и во петок во 22.30 часот, а трае половина час во кој, најчесто двајца соговорници, даваат аналитички приод кон акутелни и релеватни теми.
Порталот „Нова ТВ“ од денеска воведува „Нова дебата“, во која прашања, освен новинарите, ќе може да поставуваат и корисниците на „Фејсбук“ и на „Твитер“.
– „Нова дебата” е веб, стрим и видео проект на „Нова Тв“ со кој ги искористуваме можностите на интернетот за да обезбедиме повеќе и поквалитетна јавна дебата меѓу домашната јавност. Наша цел е важните општествени и политички прашања да ги изложиме на јавна дебата и да овозможиме граѓаните да дискутираат. Ќе обезбедуваме актуелни гости, говорници и соговорници кои ќе ги изложуваме на аргументации, сомнежи и прашања поставени од нашите модератори и новинари, но и од твитерџиите, фејсбук-корисниците и останатата интернет-публика – вели Биљана Секуловска, генерален менаџер на „Нова Тв“.
Во првото издание на „Нова дебата“ ќе гостува Зоран Заев и ќе може да се следи во живо преку стрим на веб-страницата на порталот.
