Бројот на лица во земјава заболени од корона вирусот, од кои градови се, каде се лекуваат, колку се излечени досега и други релевантни и официјални податоци може да се следат на едно место преку веб-апликацијата која денеска ја објави македонската компанија ГДИ.
Мапата е копија на оригиналната мапа на „Џон Хопкинс“ универзитетот од САД, кој ги има ставено податоците и изгледот на мапата на располагање на сите заинетересирани страни.
На линкот може да се следат сите официјални информации кои ги објавува Министерството за здравство, а страницата се ажурира во реално време. Од компанијата најавуваат дека веќе работат и на мобилната верзија на апликацијата, а целта им е таа да биде што подостапна за граѓаните. Од апликацијата има и директен линк до страницата на Министерството за здравство.
Според генералниот директор на ГДИ, Дејан Крстевски, оваа апликација ја имаат и другите држави во регионот.
„Во овие моменти на криза, сакаме да помогнеме населението и институциите вистински и во реално време да ја следат состојбата со развојот на вирусот во Македонија. Кога ќе се уредат сите просторни податоци на едно место, полесно е да се избегне кризата и да се донесат вистински одлуки. Овозможува едноставен и прегледен приказ во служба на информирање на јавноста, но пред се е корисна алатка за оние кои носат одлуки и мерки за сузбивање на вирусот“, вели Крстевски.
