Вкупно 236 судии утре ќе гласаат за избор на двајца нови членови на Судскиот совет, информира Судскиот совет. Од нив, 16 судии ќе гласаат во изборната единица во Врховниот суд, а 220 судии на 12 избирачки места од апелационото подрачје на Скопје и управните судови.
Единствен кандидат за член на Судскиот совет од Врховниот суд е врховниот судија Наќе Георгиев, додека на листата за член од скопското апелационо подрачје има двајца кандидати: Антоанета Димовска, судија од Граѓанскиот суд во Скопје и Лазар Нанев судија од Основниот суд во Кавадарци.
Големи беа реакциите во однос на Георгиев, откако за него Судскиот совет ја прекина постапката за нестручно работење од времето кога бил претседател на Апелациониот суд во Штип. На затворена седница, членовите на Советот одлучија дека постапката за негово разрешување, за која 6 месеци не било одлучувано, била неоснована. Во однос на ова, Блупринт групата за реформи во правосудство минатата недела побара итно да се прекине со постапката за избор на нови членови во Судскиот совет.
Во спротивно, како што изјавија, како крајно средство, судиите кои треба да гласаат на изборите за членови на Судскиот совет, од судовите во Апелациското подрачје Скопје и Врховниот суд, ќе треба да го бојкотираат процесот за избор на членови, поради нелегитимноста на Судскиот совет на РСМ.
„И покрај реакциите од домашните и меѓународните организации и експерти за несоодветното постапување на Судскиот совет во изминатиов период, сепак нивното работење укажува дека се продлабочува јазот и недовербата која постои помеѓу нив и македонската јавност.Последен пример е постапката за избор на нови членови во ССРСМ од редот на судиите каде како кандидати се утврдени судии за кои се водеше и се води постапка за утврдување на нестручно и несовесно работење“, пишуваше во соопштението на Блупринт групата.
Итно да се прекине постапката за избор на нови членови во Судскиот совет, бара Блупринт групата
Но, и покрај реакциите, избори во Судскиот совет ќе има.
Судиите утре ќе можат да го остварат своето избирачко право од 8 часот до 15 часот. По затворањето на гласачките кутии, ќе се избројат резултатите и ќе се направи записник во избирачките места.
„Целиот изборен материјал потоа ќе се носи во Судскиот совет на РСМ, каде Комисијата за избори сукцесивно ќе ги објавува прелиминарните резултати и ќе направи записник. Кандидатите имаат право на два приговора: за начинот на гласање и за објавените резултати,а по истекот на законските рокови, резултатите стануваат конечни“, информираат од Судскиот совет.
Врховната судијка Мирјана Радевска-Стефкова и апелацискиот судија Зоран Герасимовски поднесоа оставки од функциите во Судскиот совет по низата скандали кои ја тресеа оваа институција, а по контроверзното разрешување на поранешната претседателка Весна Дамева.
