Гигантите „Кока-Кола“ и „Мекдоналдс“ се приклучија на големиот број меѓународни компании што престанаа со работа во Русија поради руската инвазија на Украина, јави Би-Би-Си. На нив им се приклучи и „Старбакс“.
Гигантот за брза храна „Мекдоналдс“ соопшти дека привремено ги затвора своите 850 ресторани во Русија, а „Старбакс“ своите стотина кафулиња. „Мекдоналдс“ во писмо од генералниот директор до вработените зборува за „непотребно човечко страдање што се случува во Украина“, а „Кока-Кола“ ја нарече војната во Украина „трагична“. И трите компании ќе продолжат да исплаќаат плати на своите вработени во Русија.
Овие меѓународни гиганти се приклучија на списокот на десетици компании што престанаа да работат на рускиот пазар или го ограничија своето работење, како „Нетфликс“ и „Леви’с“.
Интересно е што „Мекдоналдс“ е една од првите американски компанија што почнала да функционира во Советскиот Сојуз и продолжила да работи во следните децении. Првиот ресторан за брза храна е отворен во 1990 година во Москва.
„Мекдоналдс“ ги затвори привремено и своите 108 ресторани во Украина, каде исто така ги исплаќа платите и донираше 5 милиони долари за фондот за помош на неговите вработени.
„Кока-Кола“, пак, со престанокот на продажбите во Русија се откажува од отприлика 2 отсто од своите вкупни приходи и профит. Компанијата во Русија има отприлика 20 отсто удел во бизнисот на полнење и дистрибуција на нејзините пијалоци, пишува Би-Би-Си.
„Старбакс“ затвора повеќе од 100 свои кафулиња во Русија, а сопственикот на локалната лиценца, кувајтската „Алшаја Груп“ ќе продолжи да ги исплаќа платите на своите 2.000 вработени.
Вчера и „Јуниверсал Мјузик Груп“ соопшти дека ги прекинува своите операции во Русија и го затвора своето претставништво.
„Унилевер“, гигантот за производи за хигиена и нега и за храна, соопшти дека ја прекинува трговијата со Русија и планира да сопре со рекламните активности и инвестиции во оваа земја, но ќе продолжи со продажба на основни производи за исхрана и хигиена што се произведуваат во Русија.
„Пепси“, кој е многу поприсутен на рускиот пазар од „Кока-Кола“ и е многу подолго на пазарот на просторот на денешна Русија отколку ривалот (влезен е во Советскиот Сојуз во текот на Студената војна и сега има 20.000 вработени во Русија), рече дека го прекинува производството и продажбата на Пепси и други глобални марки во Русија и запира со капитални инвестиции и рекламирање, но ќе продолжи да нуди други производи, како млеко, секојдневно неопходни дневнопотребни продукти и бебешка храна и беби-формула.
