Кристине Алтхаузер, германската амбасадорка во Македонија, смета дека според западноевропските стандарди, мора да има оставки пред да се спроведе транспарентна и целосна истрага за да се реши политичката криза, а интересите на земјата треба да надвладеат над партиските политики.
– Владата уште соодветно ги нема разгледано сериозните обвинувања што произлегоа од неодамнешниот развој на настаните и од објавените снимки, што еднакво ме иритира мене и другите западни набљудувачи на политичката сцена во Скопје. Според западноевропските стандарди, политичките последици се неизбежни во случаи на обвинувања од ваков обем и природа. За да бидам јасна како што беше мојот американски колега минатата недела, политичките последици значат, на пример, оставки како предуслов за да се спроведе неопходна, транспарентна и целосна истрага. Само преку веродостоен истражен процес, кој повторно ќе ја воспостави политичката и судската одговорност на носителите на јавни функции и на политичарите, може да се зачува евроатлантската перспектива на земјата – рече Алтхаузер.
