Европските држави на Украина ѝ ветиле помош од вкупно 156 милијарди евра, што е повеќе од двојно од 70-те милијарди ветени од САД, соопшти во четвртокот Институтот за светска економија, пренесува германската новинска агенција ДПА.
Институтот Килски месечно објавува извештај за помошта на Украина. Во европската помош ги вбројува реализираната и ветена поддршка на членките на Европската унија, како и оние земји што не се членки, меѓу кои се Велика Британија и Норвешка.
Па така, новиот инструмент на ЕУ, таканаречениот Фонд за Украина, располага со 50 милијарди евра за периодот 2023-2027 година. Помеѓу другите линии на помош е и пакетот на воена поддршка вреден 10,5 милијарди евра, кои Германија ги вети за периодот 2024-2027 година
Институтот во извештајот ги вклучува и повеќегодишните програми за помош на Украина, на кои се обврзале Норвешка, Данска, Велика Британија, Швајцарија, Португалија и Литванија.
„Вредно за внимание е колку брзо Европа се префрли на трајна, повеќегодишна програма за поддршка на Украина“, оцени Кристоф Требеш од Институтот за светска економија кој е задолжен за извештајот за Украина.
„Во споредба со ова, САД сега сериозно заостануваат, бидејќи последните месеци немаат најавено некоја посериозна нова помош“, додаде Требеш.
