Европската унија денеска објави дека има намера за Грција и за другите земји-членки да издвои 700 милиони евра итна хуманитарна помош за тие да се изборат со бегалската криза.
Планот за пружање помош во Брисел го изнесе еврокомесарот за хуманитарна помош и за управување со кризата, Христос Стилијанидес.
Како што пренесуваат светските агенции, средствата ќе бидат одобрени за наредните три години.
– За годинава ќе бидат издвоени 300 милиони евра и по 200 милиони евра во наредните две години – изјави Стилијанидес.
Портпаролот на Европската комисија, Маргаритис Шинас изјави дека новиот план е потребен за да се спречи хуманитарната криза.
Владата во Атина соопшти дека од ЕУ побарала итна помош од 480 милиони евра за сместување на 100.000 бегалци и предупреди дека приливот на мигранти се заканува дека ќе ги исцрпи државните ресурси.
