Не се точни наводите дека Основното јавно обвинителство за гонење организиран криминал и корупција и Основното јавно обвинителство Скопје одбиваат соработка со Специјалното јавно обвинитество, се вели во реакцијата на двете обвинителства на денешното соопштение на СЈО.

„Досега на сите барања доставени од Јавно обвинителство за гонење кривични дела поврзани и кои произлегуваат од содржината на незаконското следење на комуникациите овие две обвинителства постапиле соодветно и навремено. Сите првично побарани предмети се доставени со севкупната расположлива документација во законски утврден рок, за што јавноста беше информирана“, стои во реакцијата.

Од ОЈО Скопје велат дека во врска со кривичните пријави што беа поднесени против лица од СЈО, обвинителството испратило покани до нив за да дадат искази, но специјалната обвинителка Катица Јанева не ги доставила до лицата за кои биле наменети. Јанева, според обвинителството, побарала првин детално да биде известена за причините за повикување, a потоа ќе ги врачи поканите.

„Во тој контекст, ја подржуваме иницијативата за воведување ново кривично дело – попречување на правдата, за да се отстранат опструкциите со кои се соочува Основното јавно обвинителство – Скопје во своето постапување, а кои во иднина може да се појават и во надлежно постапување и на другите обвинителства“, стои во реакцијата на ОЈО Скопје.