Турскиот премиер Ахмет Давутоглу порача дека нема да преговара за мир со курдските бунтовници сè додека тие не го положат оружјето.
Давутоглу ова го изјави во Мардин, град на југоистокот на земјата, каде го изложил владиниот план за обнова на мнозинско курдскиот регион, по завршувањето на операциите на безбедносните сили против екстремистите поврзани со Работничката партија на Курдистан (ПКК).
– Владате ќе се консултира со жителите на регионот за напорите да се оконча судирот – рече Давутоглу, додавајќи дека „тие со оружје нема да бидат прифатени како соговорници“.
Судирите меѓу турските сили и ПКК се обновија во јули минатата година, загрозувајќи го и онака нестабилниот мировен процес, покренат во 2012 година.
