Соединетите американски држави јасно ѝ ставиле до знаење на мароканската влада дека се подготвени да обезбедат „значајна помош“ по разорниот земјотрес во близина на Маракеш, пренсе Си-Ен-Ен. Инаку бројот на жртви во земјотресот надмина 2.000 лица, а властите прогласија тридневна жалост.
„Имаме тимови за пребарување и спасување подготвени да ги распоредиме, кои можат да помогнат не само со таа активност, туку и со медицинска и други форми на помош“, изјави за новинарите заменик-советникот за национална безбедност на САД, Џон Финер.
„Ние сме исто така подготвени да ослободиме средства во вистинско време за да им помогнеме на Мароканците да закрепнат и да се справат со оваа ужасна трагедија што ги снајде“, додаде тој.
Оваа најава доаѓа по изјавата на американскиот претседател Џо Бајден, кој рече дека неговата администрација е во контакт со официјални претставници во Мароко.
„Работиме експедитивно за да се осигураме дека американските граѓани во Мароко се безбедни и сме подготвени да обезбедиме секаква неопходна помош за мароканскиот народ“, напиша Бајден.
Потресни сведоштва за светските медиуми даваат преживеани од земјотресот во Мароко во кој загинаа над 800 луѓе, а повредени се повеќе од 600.
Станува збор за најсилниот земјотрес во последниве 120 години што ја погодил оваа област.
50-годишната Фатима за Си-Ен-Ен изјавува дека нејзиниот дом во градот Асни во подножјето на планините Висок Атлас бил целосно уништен во земјотресот.
„Едвај имав време да ги грабнам децата и да истрчам надвор пред да ми се урне куќата пред очи. Се урна и куќата на соседот, а под урнатините беа најдени двајца мртви“, вели таа.