Во големите шумски пожари што го опфатија хавајскиот остров Мауи досега загинале 67 луѓе, но се очекува бројката да расте, јави Си-ен-ен.
Гувернерот на сојузната држава Хаваи Џош Грин рече оти се очекува дека траурната бројка ќе расте. Тој објасни дека најголемиот дел од загинатите ги загубиле животите на отворено, а не во нивните домови.
На жителите на најтешко погодениот град, Лахаина, веќе им е дозволено да се враќаат во нивните домови, но според гувернерот Грин, таму ќе видат уништување какво што веројатно не виделе претходно во нивните животи.
Грин за Си-ен-ен објасни дека наредил сеопфатна истрага на постапувањето на државните органи во часовите по избивање на пожарите, вклучително и барање на причината зошто не се вклучиле сирените – ги има околу 400 – за да ги алармираат жителите на Мауи.
Гувернерот на островската држава вели дека посебна пречка претставувало тоа што огромниот шумски пожар, што потоа го опфатил овој град со историско значење и речиси целосно го уништи, е што пожарот едно време загаснал, а потоа откако пожарникарите отишле да интервенираат на други подрачја на Мауи, повторно се разгорел.
„Телекомуникациската опрема беше многу бргу уништена“, објасни Грин за причините зошто жителите на тесно-поврзаната заедница не можеле да се предупредуваат едни со други преку телефон.
Сепак, гувернерот на Хаваи вели дека „нема оправдување за никого“, иако бројните пожари што гореле на различни подрачја создале „многу флуидна ситуација на островите“.
Бројката од 67 загинати е најголема во природна катастрофа во сојузната американска држава откако големиот архипелаг го добил тој статус – во 1959 година. Претходно грдиот епитет го носеше градот Хило, во кој во цунами во 1960 година загинаа 61 човек.
