Бугарскиот премиер Бојко Борисов синоќа во Брисел во изјави за новинарите порачал дека Македонците треба уште да созреат за да добијат датум за почеток на преговори за приклучување на ЕУ, јави бугарската новинска агенција „БГНЕС“.
-Тие треба уште многу работи да поправат. Не ме разбирајте погрешно, но сè додека се спори дали е Гоце Делчев Бугарин или Македонец – таа ситна тема за едни херои што всушност биле за Бугарија и за Македонија, за родниот крај, и најубавите наши песни се сврзани со нив. И постојано опозицијата ме прашува што прави Комисијата. Нека созреат – порача Борисов пред почетокот на седницата на Европскиот совет во Брисел.
Тој потоа го дообјаснува својот став за „непријателството“ од земјава и неговите очекувања за компромиси.
– Не можам тоа да го дозволам – Бугарија направи се и тие се вивнаа во небото. Сега тие ќе треба да прават компромис во Комисијата и во антибугарската реторика – рече Борисов, мислејќи на заедничката македонско-бугарска Комисија за историските прашања и учебниците.
