Безбедноста на државата е стабилна и нема индиции кои укажуваат на можно нејзино загрозување, беше заклучокот од денешната седница на членовите на Советот за безбедност. На седницата, како што информират од кабинетот на претседателот Стево Пендаровски, се разговарало за безбедносната состојба во државата и евро-атлантскиот регион.
„Покрај членовите на Советот за безбедност, на покана на претседателот Пендаровски на седницата присуствуваа и директорот на Агенцијата за национална безбедност и директорот на Агенцијата за разузнавање. Надлежните претставници на институциите информираа за тековните безбедносни прашања поврзани со земјата и поширокиот регион, вклучувајќи ја руската агресија врз Украина, случувањата на Блискиот Исток и состојбата на северот во Република Косово“, наведено е во соопштението од кабинетот.
На средбата било истакнато дека како членка на НАТО, Северна Македонија е во редовна координација со Алијансата и сојузниците по однос на активности кои се преземаат за зајакнување на безбедноста во евро-атлантскиот простор.
„На седницата на Советот за безбедност беше констатирана потребата надлежните институции да продолжат да ги следат состојбите и да изготвуваат можни сценарија согласно развојот на настаните, со цел навремено преземање на мерки и активности од нивна надлежност“, се додава во соопштението.
