Вицепремиерот за економски прашања, Кочо Анѓушев, имал средба со амбасадорката на Кина во земјава, Јин Ликсиан, на која било разговарано и за изградбата на двете делници на автопатиштата кои ги изведува кинеската компанија „Синохидро“ и се финансирани од заемот од кинеската „Ексим банка“.
Анѓушев на средбата рекол дека со измените на Законот за реализација на инфраструктурни проекти за изградба на автопатите Миладиновци – Штип и Кичево – Охрид биле надминати проблемите и е најдено компромисно решение што ќе овозможи продолжување и комплетирање на почнатите работи.
„Делниците се важни за компаниите во источниот и западниот дел на Македонија заради поквалитетен, побрз и побезбеден транспорт на луѓе и на стоки. Компаниите ќе бидат поконкурентни, со што ќе се придонесе до локален и регионален економски развој, но и до пораст на економијата на државата“, рекол вицепремиерот, стои во соопштението за средбата.
Во врска со економската размена меѓу двете земји, Анѓушев истакнал дека земјава ќе продолжи со наоѓање решенија, производите и услугите на македонските компани да се пласираат на кинескиот пазар, кој е со неограничен потенцијал за соработка.
