Силно невреме со пороен дожд, силен ветер, грмотевици и со град со големина на орев попладнево го погоди Скопје.
Градот кој интензивно паѓаше десетина минути, предизвика оштетувања на автомобилите, а на неколку места од силниот ветер се забележани паднати дрвја.
Според синоптичарите, изразено нестабилната воздушна маса доаѓа од Косово. Управата за хидрометеролошки работи попладнево предупреди дека поради најавите за локален пороен дожд и грмежи можна е појава на одрони и на свлечишта. Се препорачува внимателно движење покрај суводолиците каде е можно брзо надоаѓање на вода.
„Особено треба да се внимава на локации каде водотеците и суводолиците се пресечени од патишта и разни премини и каде има какви било стеснувања на водните правци“, се вели во соопштението од УХРМ.
Според најавите, во вечерните и во ноќните часови се очекува променливо облачно време, а наместа ќе биде нестабилно со локален пороен дожд и со грмежи. Локално се очекува процесите да бидат поинтензивни, во форма на невреме, со интензивен пороен дожд, електрични празнења, засилен ветер и со услови за појава на град.
Град со големина на орев го погоди Скопје pic.twitter.com/hSTmxKBdHP
— META.mk (@meta_agency) June 14, 2017
