За време на предизборниот молк Министерството за внатрешни работи (МВР) регистрирало неколку случаи, за кои информира дека се преземени и соодветни мерки од полициски службеници. МВР добило пријава за лице од Крива Паланка, кое на повеќе граѓани од овој град им делело бонови за точење на гориво на бензинска пумпа.
„Извршен е претрес на простории на бензинската пумпа, каде во присуство на Ј.Ј. и М.Ѓ. биле пронајдени пет бонови за гориво во вредност од по 1.000 денари со втиснат датум од 08.05.2024 и еден бон за гориво во вредност од 2.000 денари, шест фискални сметки, а во торбата која ја носел вработениот пронајдени се два бонови за гориво во вредност од по 1.000 денари и фискална сметка. Во полициска станица повикани биле Б.С., С.М., М.Ѓ. и М.Д., сите од Крива Паланка поради извршување на службен разговор и се преземаат мерки за расчистување на случајот“, информира МВР.
Оттаму информираат и дека вчера, Е.Д. од Крњево пријавил дека во домот дошле три лица од ДИК, со цел неговиот дедо да оствари право на глас од избирачко место бр. 2828.
„Е.Д. се сомневал дека не биле лицата од ДИК, бидејќи не биле претходно известени и требало да присуствуваат пет лица. СВР Скопје презема мерки и активности за расчистување на настанот“, наведено е во билтенот на МВР.
Во Тетово пак, имало пријава дека биле оштетени два банери со рекламен материјал од политичка партија кои биле поставени на кружен тек од улица „В.С.Бато“ со ул. „Маршал Тито“ во Тетово.
Вчера исто така, Ц.Т. од Неготино пријaвила кривично дело „повреда на слободата на определување на избирачите“, извршено од Л.Р. од Неготино.
„Околу 20,17 часот, Ц.Т. добила телефонски повик од Л.Р. за поддршка за гласање, на што Ц.Т. одговорила негативно. Потоа Л.Р. ѝ нагласила на Ц.Т. дека имала земено ИПАРД поддршка, по што го прекинала повикот. За настанот известен е надлежен јавен обвинител и ќе се преземат дополнителни проверки“, наведено е во извештајот на МВР.
Во непосредна близина на избирачко место во ОУ „Христијан Т.Карпош“ во с. Драгоманце општина Старо Нагоричане забележани биле расфрлани летоци од политичка партија. Летоците биле отстранети.
Во текот на изборниот молк пријавени се и неколку случаи за наводно агитирање и нудење поткуп, но по преземени мерки од страна на полициските службеници тие наводи до сега не се потврдени.
