Комисијата за транспорт и за комуникации при Либералната партија смета дека треба да му биде овозможено на секој ТВ-субјект кој има финансии, желба и кадровска екипираност да истрча на медиумскиот пазар.
Од ЛП велат дека сегашната методологијата за доделување национални ТВ-концесии на медиумите е прилично рестриктивна и непазарна и остава простор за манипулации.
– Приватните медиуми се приватни компании кои својата програмска понуда ја дефинираат врз основа на понудата и на побарувачката на пазарот. Државата не смее да врши селекција за тоа кој медиум ќе има поголема или помала гледаност, односно кој медиум ќе опстане, а кој нема – вели Александар Левески, претседател на комисијата за транспорт и комуникации на ЛП.
Според комисијата, на секој заинтересиран инвеститор треба да му биде овозможено да инвестира во бизнисот за кој смета дека може да биде профитабилен, вклучувајќи го и телевизискиот бизнис. Притоа на таквиот инвеститор треба да му биде овозможено да емитува програма за која смета дека ќе биде гледана.
