Најмалку девет лица утринава загинаа, а 64 се ранети во експлозија на автомобил-бомба, на чија мета се најде седиштето на полицијата во Џизре, на југоистокот на Турција, соопштија болнички извори.
Турските медиуми јавуваат дека зад нападот стојат припадниците на Работничката партија на Курдистан (ПКК), која во Турција, САД и во ЕУ е на листата на терористички организации.
Телевизиската станица НТВ наведува дека возила на итната помош се наоѓаат на местото на експлозијата, од каде се издигнува огромен облак чад.
Владата во Анкара ја обвини ПКК за серија напади изведени месецов на југоистокот на земјата.
Организацијата презеде одговорност за најмалку еден напад, и тоа на полициска станица.
Џизре се наоѓа во провинцијата Ширнак, која се граничи со Сирија и со Ирак. Во таа област мнозинството жители се Курди.
