Грчкото електростопанство ја купува ЕДС на вицепремиерот Анѓушев


Скопје, 11 јануари, 2018 - 15:48 (META) 

Грчката национална компанија за производство на струја, „Паблик пауер корпорејшн“ ППЦ (Public Power Corporation) ја почнала постапката за купување на компанијата „Енерџи деливери солушнс“ (ЕДС) на вицепремиерот Кочо Анѓушев, информираат од компанијата.

Од таму се додава дека, постапката за целосно купување на групацијата ЕДС со сите нејзини подружници на Балканот, ќе се реализира откако одобрение за тоа ќе издаде македонската Комисија за заштита на конкуренција.

ЕДС преку своите подружници работи во Словачка, Унгарија, Романија, Хрватска, Србија, Црна Гора, Косово, Македонија, Грција и Бугарија.

Со купувањето на еден од најголемите балкански трговци со струја, ППЦ ќе влезе и во бизнисот со трговија со струја и ќе го прошири своето портфолио.

„ППЦ е една од најголемите компании во Југоисточна Европа од областа на енергетиката, со вкупна актива од повеќе од 15 милијарди евра и годишни приходи од над 5 милијарди евра. Основната дејност на ППЦ е производство, дистрибуција и снабдување со електрична енергија во Грција за 7,3 милиони потрошувачи и има пазарен удел од околу 85 проценти. ППЦ е сопственик и на „Хедно“, која ја врши дистрибуцијата на струјата до потрошувачите во Грција, како и на ППЦ Обновливи извори  – една од компаниите пионери во Европа за производство на електрична енергија од обновливи извори“, се вели во соопштението.

 

 


КХВ: „Балкан петролеум“ не може да даде понуда за преземање на „Макпетрол“


Скопје, 29 декември, 2017 - 12:53 (META) 

Комисијата за хартии од вредност (КХВ), на денешната седница одлучи, на „Балкан петролеум“ да не му се издаде дозвола за давање понуда за преземање на „Макпетрол“, соопштуваат од таму.

Ваквата одлука, Комисијата ја донела откако на 18 декември, со допис од страна на друг државен орган, била известена дека, претходно е решено прашањето за случајот.

Од Комисијата информираат оти констатирале дека не се исполнети условите од Законот за преземање на акционерски друштва, според кои, проспектот и понудата за преземање треба да се изготвени во согласност со законот.

„Според член 21 став 2 од Законот за преземање на акционерски друштва, акционерите на целното друштво мораат да бидат целосно, точно и навремено информирани за понудата за преземање, за да имаат доволно време правилно да ја оценат понудата, да ги дефинираат своите интереси и да донесат одлука за прифаќање или одбивање на понудата за преземање“, се вели во соопштението на КХВ.

Случајот со компанијата „Макпетрол“ и обидот за преземање од страна на „Балкан петролеум“ беше заглавен во Комисијата за хартии од вредност, повеќе од една година.


Исламска држава ја презеде одговорноста за нападот во Камбрилс


Камбрилс, 19 август, 2017 - 14:06 (META) 

Исламска држава денеска ја презеде одговорноста за нападот во Камбрилс, во Каталонија, каде што петмина терористи со автомобил повредија петмина граѓани и еден полицаец, јавуваат светските медиуми.

Полицијата ги уби петмината терористи, а идентификувани се телата на тројцата од нив. Истовреме, безбедносните сили трагаат по возачот на комбето кој изврши напад во Барселона, односно влета на улицата Ла Рамбла и усмрти 14, а повреди 100 лица.

Исламска држава вчера ја презеде одговорноста и за нападот во Барселона.


Владата ги отвори седниците – дневниот ред и записниците достапни на интернет


Скопје, 17 август, 2017 - 21:04 (META) 

Јавноста од денеска има можност да ги види дневните редови и заклучоците од сите седници на Владата на нејзината официјална интернет страница.

Ваквата новина Владата ја соопшти попладнево, преку својот „твитер профил“.

На интернет-страницата е додадено ново „прозорче“ – „Седници на Влада“, каде во табела се наведени датумите, дневниот ред и записниците и соопштијата од седниците со можност за преземање на материјалите.

На страницата активни се и можат да се видат дневните редови на сите седници, функционираат и можат да се преземат сите записиници од досегашните 23 седници, освен записниците од 20. и последната 23. седница, одржана во вторникот, оваа недела, како и најголем дел од соопштенијата.

Претходната владина гарнитура, меѓудругото беше критикувана и поради штурите или немањето никакви информации од седниците, а термините на нивно одржување се чуваа во тајност, особено по инцидентот од крајот на октомври 2014 година, кога проектили со поголем калибар завршија во фасадата од зградата на Владата.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата „Отворено општество – Македонија“.


Естонија го презеде претседавањето со Европската Унија


Талин, 1 јули, 2017 - 11:16 (META) 

Естонија денеска го презеде шестмесечното претседателство со Европската Унија од Малта. Естонскиот премиер, Јури Ратас, и претседателот на Европската комисија, Жан Клод Јункер, вчера имаа средба на која разговараа околу програмата на естенското претседавање со ЕУ.

„Вашиот тим е подготвен и ги видовме големите напори кои ги вложивте во изминатите неколку месеци. Претседателството е во добри раце“, изјави Јункер, пренесува балканскиот сервис на „Радио Слободна Европа“.

Според претседателот на ЕК, историјата покажала дека претседавањата на помалите земји членки со ЕУ се секогаш успешни.

Јункер нагласи дека мотото на естонското претседавање со ЕУ, кое гласи „Единство преку рамнотежа“, оди со задачите и предизвиците со кои се соочува Унијата.

Ратас и Јункер разговарале на бројни теми, вклучувајќи го слободниот протек на податоци и обнова на статегијата на ЕУ за безбедност на интернет.

Ратас потсети дека Јункер уште на почетокот на мај изразил очекување дека естонското претседателство со ЕУ ќе донесе „значаен напредок“ особено околу прашањата од дигиталната технологија.

На состанокот Јункер и Ратас разговарале и за прашања околу одбранбената политика на Европската Унија.


Вучиќ положи заклетва, се степаа неговите поддржувачи и противници


Белград, 31 мај, 2017 - 13:16 (META) 

Досегашниот премиер на Србија, Александар Вучиќ, денеска положи заклетва пред пратениците во Собранието на Србија, со што и официјално ја презеде должноста претседател во наредниот петгодишен мандат.

На специјално изработен примерок на српскиот устав и реплика на Мирославовото евангелие, Вучиќ се заколна дека како претседател „сите свои сили ќе ги посвети на зачувување на суверенитетот и на целовитоста на територијата на Република Србија, вклучително и Косово и Метохија, како нејзини составни делови, како и во остварувањето на човековите и на малцинските права и слободи, на почитување и одбрана на уставот и на законите, на зачувување на мирот и благосостојбата на сите граѓани на Србија и на совесно и одговорно исплнување на сите свои должности“.

Во пресрет на свечената сединица на која Вучиќ ја положи заклетвата, во подземен премин на Теразије дојде до вербален судир и кратка тепачка помеѓу поддржувачите и противниците на новиот претседател, по што двете групи тргнаа кон зградата на српското собрание. Во моментот на судирот, кој бргу беше завршен, во подземниот премин беше и лидерот на опозициската Нова странка, Зоран Живковиќ, кој ги смируваше демонстрантите.

Пред собранието на Србија, Вучиќ беше пречекан од неколку илјади поддржувачи на неговата партија – Српската напредна странка (СНС), на кои тој, доаѓајќи на седницата, им вети дека „од ден на ден ќе чувствуваат подобрување“. Вучиќ рече дека како претседател „ќе ги чува мирот и стабилноста, како и иднината на сите деца“, а насобраните му возвратија со извиците „Вучиќ“, „Победа“, „Најдобар си“.

Свеченото стапување на функцијата претседател на државата завршува со формалното преземање на должноста од досегашниот претседател, Томислав Николиќ, во зградата на Андриќевиот венец, со смотра на почесната гарда на војската на Србија и со церемонијално предавање на државничките симболи.


Случајот „Маѓар телеком“ финишира во САД, кај нас заглавен во обвинителствата и во судовите


Скопје, 25 април, 2017 - 11:41 (META) 

Во Македонија во моментов се водат две постапки за „Маѓар телеком“, кои, иако се почнати поодамна, намерно или не, никако да мрднат од мртва точка.

Вчера поранешните директори на „Маѓар телеком“, Елег Штрауб и Андрас Балог, кои беа обвинети за водење тајни договори со премиер и со други лица од Македонија за да ја спречат конкуренцијата на телекомуникацискиот пазар, се спогодиле да платат парични казни, од 250.000, односно 150.000 долари, соопшти Американската комисија за хартии од вредност.

Исходот за „Маѓар телеком“ во САД доаѓа во време на тешка политичка криза во Македонија и блокада на институциите. Истовремено, СЈО прави обиди да изврши увид во компјутерскиот систем на „Телеком“, во рамките на истрагата за случајот „Таргет“, кој треба да утврди кој го вршел незаконското прислушување во земјава.

Исто така, вчера, обвинители на СЈО одржаа „работна средба на повисоко ниво“ со претставници на „Македонски телеком“, во врска со истрагата за масовното прислушување.

За давањето поткуп на високи државни функционери, Јавното обвинителство кон средината на 2015 година отвори истрага по допрен глас, откако јавно беше објавено сведочењето на поранешниот директор на Управата за безбедност и контраразузнавање (УБК), Слободан Богоевски, пред Окружниот суд во Њујорк, во кое тој тврди дека поранешните директори на „Маѓар телеком“ дале 2,5 милиони евра поткуп на тогашниот премиер Владо Бучковски и на претставниците на ДУИ, Али Ахмети и Муса Џафери, за да не влезе друг телекомуникациски оператор во Македонија.

Кон крајот на септември 2015 година, Богоевски беше повикан и четири часа даваше исказ во Јавното обвинителство.

Специјалната јавна обвинителка, Катица Јанева, во февруари минатата година побара да го преземе ово случај од Јавното обвинителство на Марко Зврлевски, кое одби да го даде предметот и топката ја префрли во Советот на јавни обвинители, тој да одлучува дали предметот ќе му биде даден на СЈО или не. Оттогаш, нема никаква разврска околу преземањето на предметот и покрај инсистирањето на СЈО.

Во Македонија се води и случај против поранешните директори на „Телеком“, Атила Сендреи, Ролф Плат и Золтан Кишјакус, кои се товарат дека склучувале фиктивни договори за консултантски услуги со кипарската консултантска куќа „Чаптекс холдингс лимитид“ и на тој начин го оштетиле „Македонски телеком“ за речиси 4 милиони евра, а буџетот на државата за околу 2 милиони евра, бидејќи Владата во „Телеком“ во тој период поседуваше 47 отсто од акциите.

Истрагата за овој случај почна во 2008 година, а три години подоцна, односно во 2011 година беше поднесено обвинение. Но, судењето за овој случај и по шест години никако да почне, а рочиштата постојано се одложуваат. Обвинетите досега ниту еднаш не се појавија пред македонските судови, иако против нив беше распишана и меѓународна потерница, а им беше одредена и мерка притвор.


Берни Еклстоун „исфрлен“ по 40 години, Формула 1 во рацете на „Либерти медиа“


Лондон, 24 јануари, 2017 - 10:40 (META) 

Берни Еклстоун, кој беше на врвот на Формула 1 речиси 40 години, сега е само почесен претседавач и советник на одборот на директори, откако „Либерти медиа“ го заврши преземањето на Формула 1 почнато во септември лани, јавија светските медиуми.

Функцијата главен извршен директор што ја извршуваше Еклстоун сега е во рацете на претседателот на компанијата, Чејс Кери. Еклстоун во понеделникот изјави дека е „исфрлен“.

– Бев отпуштен. Официјално. Повеќе не ја водам компанијата. Мојата позиција е преземена од Чејс Кери – рече Еклстоун за „Ауто мотор унд спорт“.

„Либерта медиа“ го почна преземањето на спортот во септември лани, а зделката беше завршена вчера. Сега „Либерти медиа“ ќе биде преименувана во „Формула 1 груп“.

Берни Еклстоун, поранешен шеф на тимот на „Брабам“, го почна пробојот во 70-тите години на минатиот век како претставник на колегите во преговорите со пистите, телевизиите и властите и полека се искачи до позиција на речиси апсолутна власт. Ја одигра пресудната улога во преобразувањето на Формула 1 од релативно споредна активност во еден од најгледаните спортови, покрај Олимписките игри и Светскиот куп во фудбал.

Еклстоун ја преобрази Формула 1 во спорт кој според една од најголемите медиумски групации на светот, сега вреди 8 милијарди американски долари. Тоа го стори зголемувајќи ја присутноста на Ф1 на телевизиите, присилувајќи ги да го пренесуваат целиот шампионат наместо да избираат само некои трки, што беше вообичаено до раните 1980-ти години.


Сириската војска го зазеде стариот дел на Алепо


Алепо, 7 декември, 2016 - 9:53 (META) 

Сириската војска денеска ја презела целосната контрола над стариот дел на Алепо, кој беше држен од бунтовничките сили, соопшти сириската опсерваторија за човекови права со седиште во Лондон, јавуваат светските агенции.

Сириската војска во стариот дел на градот, кој е втор по големина во Сирија, влегла вчера.

Како што јавуваат агенциите, бунтовничките сили во последните две недели изгубиле две третини од источните области од Алепо, кои беа под нивна контрола.

Десетици илјади цивили, како што пренесува „Би-би-си“, сè уште се наоѓаат во последните области од градот, кои ги држат опозициските сили.


Телекомуникацискиот гигант „Еј-ти енд ти“ го купува „Тајм Ворнер“ за 86 милијарди долари


Далас, 23 октомври, 2016 - 12:24 (META) 

Американскиот телекомуникациски гигант „Еј-ти енд ти“ (AT&T) објави дека ќе ја купи медиумската групација „Тајм Ворнер“ за сума од речиси 86 милијарди долари, јавуваат светските медиуми.

Зделката, која е една од најголемите оваа година, сè уште чека одобрување од регулаторите, пренесува „Би-би-си“.

Доколку преземењато помине, тоа ќе значи ставање под една капа на дистрибуциската мрежа на „Еј-ти енд ти“ со содржините од филмските студија на „Ворнер бродерс“ и кабелските телевизии „Ејџ-би-о“ и „Си-ен-ен“, поради што договорот најверојатно ќе биде многу внимателно анализиран од антимонополиските регулатори во САД.

„Еј-ти енд ти“ во моментов е трет најголем кабелски оператор во САД.

Рендал Стивенсон, кој истовремено е претседател на управниот одбор и извршен директор на „Еј-ти енд ти“, изјавил дека според него нема никакви регулаторни пречки и дека сите прашања, за кои постои загриженост, можат да се надминат.

„Ова е совршено совпаѓање на две компании со комплементарни предности кои можат да донесат свеж пристап во начинот на работа на медиумите и комуникациската индустрија за своите клиенти, дистрибутери и огласувачи“, изјавил Стивенсон.

Во изјавата од „Еј-ти енд ти“ било наведено дека целта на договорот е да им се даде на клиентите „неспоредлив избор, квалитет, вредност и искуство, кои ќе ја дефинираат иднината на медиумите и комуникациите“ и дека новата компанија „ќе го води новиот бран на иновации во медиумската и во комуникациската индустрија“.

Републиканскиот кандидат за претседател на САД, милијардерот Доналд Трамп, вчера, пред самото објавување на договорот, изјавил дека доколку стане претседател, ќе ја блокира зделката меѓу „Еј-ти енд ти“ и „Тајм Ворнер“.

„Тоа е концентрација на премногу моќ во рацете на малкумина“, рекол Трамп.