Федералната трговска комисија (ФТК) на САД поднесе тужба во обид да го блокира преземањето на „Мајкрософт“ на компанијата за игри „Активижн Близард“ (Activision Blizzard) преку договор вреден 69 милијарди американски долари, пишува „Блумберг“.
Според медиумот, американскиот регулатор поднел жалба побрзо од очекуваното бидејќи сакал да ги спречи европските колеги кои се подготвуваат да преговараат за потенцијален компромис со „Мајкрософт“.
Преземањето на „Активижн Близард“ бара одобрение од 16 институции, а најголеми пречки претставуваат американската ФТК, Управата за конкуренција и пазари на Велика Британија и Европската комисија. Трите меѓународни агенции се во близок контакт откако договорот беше најавен во јануари минатата година.
Федералната трговска комисија тврди дека договорот вреден 69 милијарди долари, најголемиот досега во индустријата за видео-игри, ќе му овозможи на „Мајкрософт“ да ги потисне конкурентите на својата конзола за игри „Ексбокс“ и на неговата брзорастечка претплата на содржини на бизнисот со клауд-игри.
ФТК ја поднесе жалбата само неколку часа откако официјални претставници на САД и ЕУ одржаа состанок за случајот, при што од ЕУ истакнале дека планираат да започнат разговори за решение со „Мајкрософт“.
Не се очекува официјалните лица од ЕУ и Обединетото Кралство да постигнат договор со технолошкиот гигант до април, додека американската Федерална трговска комисија се труди да преземе акција пред постигнувањето на договорот.
Во дел од предлозите на „Мајкрософт“ до европските претставници компанијата вели дека гарантира оти „Плејстејшн“ на „Сони“ во наредните 10 години ќе продолжи да има пристап до играта „Call of Duty“ која ја издава „Активижн Близард“.
