!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Утре ќе се вади бродот „Мис Стон“ што потона во каналот Студенчишта


Охрид, 19 ноември, 2017 - 18:08 (META) 

За утре е закажано итно вадење на бродот „Мис Стон“ од каналот Студенчишта во Охрид, информираат од Општина Охрид.

Од Општината информираат дека на местото на настанот излегле претставниците на локалната самоуправа, надлежниот државен инспектор за животна средина од Охрид, кој направил вонреден инспекциски надзор, како и капетанот на охридската капетанија.

„Беше утврдено дека се работи за инцидент со бродот „Мис Стоун“, кој е полупотонат при што е излеано одредено количество нафта во водата на каналот. Во согласност со законската регулатива, Државниот инспекторат за животна средина ќе ги преземе сите законски мерки и веќе е отворен предмет во инспекциска постапка. Закажано е итно вадење на бродот од каналот со соодветна механизација, со што ќе се спречи понатамошно излевање на нафта во езерото, а со тоа и потенцијални последици за живиот свет во него и за животната средина“, велат од општинската администрација.


Нивото на Охридско Езеро е осум сантиметри над минималното


Охрид, 7 ноември, 2017 - 10:53 (META) 

Водостојот на Црн Дрим на мерното место Ложани е за шест пати понизок, а на Црна Река кај Новаци за речиси четирипати помал од просекот за ноември, покажуваат податоците на Управата за хидрометеоролошки работи (УХМР).

Водостојот и на другите реки во земјава е под просекот за ноември, а нивото на Охридското Езеро е осум сантиметри над дозволеното минимално ниво и изнесува 693,18 метри.


Охридско Eзеро порибено со сто илјади пастрмки


Охрид, 28 септември, 2017 - 17:26 (META) 

Охридско Езеро денеска беше порибено со 100.000 пастрмки, а оваа количина е дел од вкупно планираните 2.500.000, информираат од Министерство за земјоделство, шумарство и водостопанство (МЗШВ).

Порибувањето почна на 11 септември и ќе се спроведува до првата половина на октомври. Вкупната финансиска поддршка за годинешната Програма за рибарство и аквакултура изнесува 90 милиони денари.

„Во насока на заштита и одржување на рибниот фонд, како и заради планско експлоатирање на рибите, а во согласност со Законот за рибарство и аквакултура, рибите од риболовните води од Охридското Eзеро се доделени на концесија. Со оглед на тоа дека концесијата за вршење стопански риболов на сегашниот концесионер за Охридско Eзеро истекува наредната година, на почетокот на 2018 година е предвидено започнување на постапка за доделување на нова концесија за наредниот шестгодишен период“, се вели во соопштението на МЗШВ.


ЕЛЕМ секојдневно на интернет ќе објавува податоци за нивото на Охридско Езеро


Скопје, 27 септември, 2017 - 14:47 (META) 

ЕЛЕМ на својата официјална веб-страница почна да ги објавува податоците за нивото на Охридско Езеро, информираат од компанијата.

„На линкот http://www.elem.com.mk/?p=6755 посетителите ќе можат секојдневно да го следат нивото на езерото, а покрај моменталната состојба, се поставени и податоци за минималната и за максималната кота. Објавените податоци се според сопствените мерења на компанијата, што АД ЕЛЕМ, подружница ХЕС „Црн Дрим“ ги врши со водомерна летва во близина на градското пливалиште во Струга – велат од ЕЛЕМ.

Од компанијата додаваат дека новите содржини на веб-страницата се за да обезбедат поголема транспарентност во работењето, како и во интерес на засегнатата јавност.

Директорот на ЕЛЕМ, Драган Миновски, при посетата на Охрид викендов изјави дека производството на електрична енергија од акумулациите „Глобочица“ и „Шпилје“ не смее да влијае негативно врз водостојот на Охридското Езеро, а со тоа и врз езерскиот еко-систем.


Годината беше сушна, затоа водостојот на Охридско Езеро е намален, велат од ЕЛЕМ


Охрид, 24 септември, 2017 - 16:26 (META) 

„Годината беше сушна, дотеците се многу мали. Затекнавме загрижувачка состојба на сите акумулации во земјата, но ќе се потрудиме нивоата на водата да ги задржиме во некаква оптимална состојба и да искористиме максимум од потенцијалот“, изјави денеска во Охрид директорот на ЕЛЕМ, Драган Миновски.

Тој додаде дека производството на електрична енергија од акумулациите „Глобочица“ и „Шпилје“ не смее да влијае негативно врз водостојот на Охридското Езеро, а со тоа и врз езерскиот еко-систем.

Миновски информираше дека минатата недела се сретнал со претставници на еколошките здруженија од Охрид и од Струга, при што било договорено формирање работни групи што координирано ќе работат на подобрување на состојбите со нивото на Охридско Езеро.

Директорот на ЕЛЕМ додаде дека во време на видливи климатски промени и изменети хидролошки услови, работна група со експерти од Македонија и од Албанија координираат активности за оптимизација на користењето на водниот потенцијал на Охридско Езеро.


Триесет килограми марихуана пронајдени во глисер кај Калишта, Струшко


Струга, 16 септември, 2017 - 12:11 (META) 

Струшката полиција синоќа, околу 22 часот, кај селото Калишта, на околу 300 метри од брегот на Охридско Езеро, во мал глисер пронашла и запленила 30 килограми марихуана, соопшти денеска МВР.

„Во мал бел чамец, со должина од околу 4 до 4,5 метри, со мотор, врзан со бова, биле пронајдени две црни торби, секоја со 14 пакувања од опојна дрога марихуана, со вкупна тежина од околу 30 килограми“, стои во соопштението на МВР.

Дрогата била подигната од местото и пренесена во полициската станица во Струга за понатамошна постапка.

Од полицијата додаваат дека работат на целосно расчистување на случајот.


Книга за Охридско Езеро од комедиографот Бранислав Нушиќ


Скопје, 11 септември, 2017 - 10:52 (META) 

Во издание на „Везилка 2011“, излезе од печат книгата на знаменитиот српски писател Бранислав Нушиќ „Покрај бреговите на Охридското Езеро“, чиешто прво издание е публикувано во Белград во далечната 1892 година. Ова издание на македонски јазик го преведе писателот Ристо Лазаров.

Станува збор за ретка книга, со повеќе белешки со кои се опишуваат Охридското Езеро и околината. Во предговорот кон книгата самиот Нушиќ наведува дека најмногу се служел со советите и со упатствата на Стојан Новаковиќ и на Љубо Ковачевиќ, во тоа време академици.

Бранислав Нушиќ шестпати патувал по крајбрежјето на Охридското Езеро и напишал книга записи која содржи драгоцени документи за животот во Охрид и во Охридско во тоа време, за разликите на Македонците од другите балкански народи, за етнографските и културно-историските богатства на овој крај. Нушиќ бил конзул и службеник во конзултатот на Србија во Битола, како и директор на Народниот театар во Скопје во времето на Кралството СХС.


Граѓани утре ќе протестираат против спорниот хотел во Лагадин


Охрид, 3 август, 2017 - 14:10 (META) 

Со почеток точно напладне, утре пред градилиштето на спорниот хотел во охридската населба Лагадин и во непосредна близина на планираната локација за Медитеранска плажа, група граѓани ќе одржат протест за одбрана на Лагадин и на охридското крајбрежје од понатамошна урбанизација и девастација.

И покрај тоа што повод за овој мирен протест е изградбата на спорниот хотел, протестот има цел да го сврти вниманието на институциите и на јавноста кон сите обиди за уништување на крајбрежјето, езерото и на Националниот парк Галичица, кои најчесто се прават под превезот на развојот и на унапредувањето на туризмот.

„Ги повикуваме сите што не се согласуваат со урбаното, еколошко, звучно и секакво друго насилство врз Охридскиот Регион, да дојдат и заедно со нас, преку еден симболичен чин, гласно да ги повикаат добрите духови на езерото и на планината, во одбрана на автентичното природно, културно и амбиентално богатство на Охрид и на крајбрежјето“, велат граѓаните во своето соопштение.


Средовечен маж се удавил во Охридско Езеро


Охрид, 19 јуни, 2017 - 10:32 (META) 

Безживотно машко тело, синоќа околу 17.50 часот, е забележано во водите на Охридското Езеро, на плажата Сараиште, информираат од СВР-Охрид.

Телото се наоѓало на дното на езерото на околу четири метри длабочина и на оддалеченост од околу десетина метри од езерскиот брег.

По извршениот увид на местото на настанот, предводен од јавен обвинител и од полициски екипи, констатирано е дека удавеното лице е Димитри А. (61 ) од Охрид.

На безживотното тело не се забележани траги на насилство. По наредба на јавен обвинител, денеска врз телото на починатиот ќе биде извршена обдукција.


Холандските туристи ја отворија летната сезона во Охрид


Охрид, 2 мај, 2017 - 13:32 (META) 

Првиот сезонски чартер-лет со 180 патници од Амстердам, кои допатуваа со авиокомпанијата „Корендон“ на аеродромот „Св. Апостол Павле“, ја отвори летната сезона во Охрид.

– Покрај редовните линии кои ги имаме преку целата година на охридскиот аеродром – за Базел, Цирих и за Лондон, како и традиционалните чартер-летови од Холандија, ова лето ќе продолжат сезонските летови кои ги отворивме во 2016 година од Белград, Брисел и од Тел Авив, додека нови чартер-летови од Полска ќе почнат од 22 јуни. Еднаш неделно 200 полски туристи ќе доаѓаат на Охридското Езеро, благодарение на договорот што го потпишавме со еден од најголемите полски тур-оператори – изјави генералниот директор на „ТАВ Македонија“, Алпер Ерсој.

Ова лето на охридскиот аеродром се очекува да слетаат 183 авиони од Амстердам, со авиокомпаниите „Корендон“ и ТУИ, кои ќе донесат повеќе од 28.000 холандски туристи, информираат од компанијата.

Во исто време, од мај до октомври 2017 година, со сезонските летови, на охридскиот аеродром се очекуваат околу 2.000 патници од Брисел со „Томас Кук“, потоа 2.300 патници од Белград со „Ер Србија“ и околу 2.600 патници од Тел Авив со „Аркиа“.