Општината загрижена за намалениот водостој на Охридското езеро


Охрид, 8 ноември, 2018 - 16:13 (META) 

Јавното претпријатие „Водовод и канализација“ на барање на локалната самоуправа ги исклучи пумпите со кои се зема вода за пиење од каптажата Билјанини извори и ја пренасочи во каналот Студечишта за да се спаси плашицата од помор. После апелите од екологистите и објавите во медиумите и од општината апелираат до надлежните итно да преземат соодветни мерки за надминување на проблемот со моменталниот водостој на Охридското езеро.

Нивото на езерото кое е на минимална дозволена кота ја загрижи локалната самоуправа. Во делот кај Студенчишкиот канал и поплитките делови на крајбрежјето на Охридското езеро, рибата поради нискиот водостој излегува на површина и наскоро може да се случи масовно да угинува поради недостаток на кислород. Од Општина Охрид испратија барање до Министерството за транспорт и врски да преземат соодветни мерки, со кои превентивно би се избегнале поголеми еколошки проблеми.

„Како општина, апелираме до надлежните институции и ја апострофираме сериозноста на проблемот со моменталниот водостој на Охридското езеро, особено на делот на каналот Студенчишта. Проблемот ескалира веќе одреден период наназад, што резултираше со намален водостој во езерото и каналот, што може да има сериозни последици врз рибниот фонд“, велат од општината.

За да се надмине оваа состојба, општината побарала од ЈП „Водовод и канализација“ да се исклучат пумпите со кои се зема вода за пиење од каптажата Билјанини Извори и истата да се пренасочи во каналот Студечишта за дотур на свежа вода и за да се зголеми нивото на вода и количеството на кислород.

Од Општината стравуваат од натамошно намалување на водостојот со оглед на тоа што временската прогнозата за наредниот период не најавува врнежи од дожд.

Претходно, еколозите побараа ЕЛЕМ да прекине со испуштање на вода од езерото и потенцираа дека нема вода во Билјанини Извори, а од пумпите на ЈП „Водовод“ нема дотур на свежа вода во каналот, што може да доведе до несакани последици.


Нивото на водата на Охридско езеро се наближува до дозволената минимална кота


Охрид, 7 ноември, 2018 - 15:30 (META) 

Нивото на Охридското езеро од мај до денес е намалено за околу 80 сантиметри. Екологистите предупредуваат дека причина за ова се климатските промени и испарувањето на водата.

Екологистот Лазо Наумоски објаснува дека на годишно ниво од езерото испаруваат преку 350 милиони кубни метри вода годишно. Наумоски додава дека доколку продолжи ваквата состојба, најмногу ќе биде погоден живиот свет во езерото.

„Со климатскиве промени ќе се соочиме не само со намален водостој, туку да се намали и приливот на води. Доколку се изградат мини акумулации во Дебрца ќе може да интервенираме на езерото“ рече Наумоски.

Според него изградбата на две акомулации во Дебрца ќе биде решение за регулацијата на езерото, но треба што поскоро истото да се имплементира за да нема вакви големи осцилации со водата.

Активистите на „Охрид СОС“ неодамна соопштија дека големите разлики се резултат на несоодветниот начин на регулирање на истекот на Охридското езеро во реката Црн Дрим, по чие течение на македонска страна се наоѓаат две хидроцентрали.

„Затворете ги испустите на Дрим кај Струга. Водата во Охридското езеро е значително намалена. Во каналов „Студенчишта” има влезено поголема количина на плашица која може да угини поради недостаток на кислород. Билјанини извори секнаа од пумпите на Водовод, па нема дотур на свежа вода во каналов” стои во објавата на „Охрид СОС“.

Од ЕЛЕМ пак се, децидни дека испустот е на минимум. Велат дека место за паника нема, бидејќи најновите мерења покажуваат дека нивото водата е 16 сантиметри над дозволената минимална кота, а состојбата постојано се следи. Од ЕЛЕМ очекуваат пораст на нивото на езерото со најавата на есенските дождови.


Започнува реконструкцијата на „Долни Сарај“, една од најрепрезентативните сцени во Охрид


Охрид, 28 септември, 2018 - 11:55 (META) 

„Долни Сарај“, една од најубавите и најрепрезентативни сцени во Охрид ќе добие нов, функционален и модерен изглед со реконструкцијата што следува во текот на наредниот период.

„„Долни Сарај“ која е една од најубавите сцени во градот ќе го добие заслужениот лик и ќе претставува најсоодветното место за настапите на уметниците од целиот свет кои учествуваат на најреномираниот музичко-сценски фестивал во Македонија, „Охридско лето“. Од друга страна, таа ќе биде и удобно катче за публиката. Планирано е, градежните активности да завршат во декември“, изјави директорката на Националната установа „Охридско лето“, Наташа Поповиќ.

Според Поповиќ, сцената ќе претпрпи комплетна и темелна санација со нивелирање и зголемување на површината за 10 проценти, како и вградување полиуретански под за подобрување на перформансот и заради заштита од атмосферски влијанија.

Што се однесува до гледалиштата на „Долни Сарај“, ќе биде извршена комплетна санација на постоечките, а ќе се постават и ново западно и ново централно гледалиште, со што, капацитетот наменет за публиката ќе се зголеми за околу 40 отсто. Исто така, проектот предвидува и проширување на пристапниот влез за товарни возила до самата сцена.

Комплетно санирана ќе биде и терасата на „Долни Сарај“ која лежи над самото Охридско Езеро. Таму ќе се реновира подот, како и постоечката бетонска ограда. Проектната документација предвидува и комплетно реновирање и проширување на пристапните скали кон терасата.

Предвидено е и некоклукратно зголемување на капицитетот на електричната моќност, а целиот простор ќе добие и ново хортикултурно уредување.

Целокупниот проект за реконструкција и санација на сцената „Долни Сарај“ вреди 2,3 милиони денари, од кои 1,4 милиони денари ги обезбеди Министерството за култура преку програмата за култура за 2018 година, а останатите средства, фестивалот ги обезбеди претходно со цел сцената да добие модерен изглед според сите светски стандарди.


Во Охрид фестивал на виното и сирењето


Охрид, 10 август, 2018 - 9:40 (META) 

Во Охрид денеска и утре ќе се одржи фестивал на виното и сирењето. На малиот плоштад Крушевска Република од 17 часот туристите и локалното население ќе може да ги разгледа штандовите на производителите на вино и сирење, а свеченото отворање на овој настан, организиран од Општина Охрид, е предвидено за 21 часот.

Само 15 минути подоцна ќе почне презентацијата и дегустацијата на производи, а за музичката програма сè до полноќ е задолжен ансамбл „Билјана Јуниор“.

Фестивалот на виното и сирењето продолжува следниот ден, сабота, со почеток во 17 часот. Сè до 21 часот настанот ќе има комерцијален карактер, а потоа ќе почне презентацијата и дегустацијата, како и музичкиот дел, во  кој гостите до полноќ ќе ги го слушаат оркестарот „Климе Садило“.


Со перформанс „Мора мораториум“ се протестираше за заштита на Охридско Езеро


Охрид, 31 јули, 2018 - 16:13 (META) 

Со мирен протестен перформанс, кој тргна од Лагадин, и застанувајќи на неколку места, заврши пред зградата на Општина Охрид, денеска балерината Гарсиа Елена од театарот „Баљшој“ од Москва, Охрид SOS и здружението Стар Лагадин, поддржани од Go green – Биди зелен, Фронт 21/42 и Здружението за заштита на животните и животната средина Е.Д.Е.Н., заедно со туристи од Белгија, Италија, Франција, Русија, Молдавија, Грузија, Србија и други држави, побараа прекинување на прекумерната и непланската урбанизација на бреговите на Охридското Езеро.

Карванот кој тргнувајќи од Лагадин, застана кај Горица, Свети Стефан и Студенчишко Блато имаше една порака за Општина Охрид – прогласување на мораториум според шестата препорака на УНЕСКО, како и поништување на Општиот акт за Лагадин, односно стопирање на сите издадени дозволи за градење и стопирање на издавање нови.

Балерината Гарсиа Елена изведе дел од сцената „Умирање на лебедот“ од балетот „Лебедово езеро” на Чајковски. Подигањето на црните згради со црвени покриви ја симболизираше разуларената урбанизација, која го „убива“ лебедот како симбол на убавината и сето живо во природата, како симбол на Охридското Езеро.

Поетот Бруно од Франција, пак, рецитираше поема која ја напишал за Охридското Езеро и неговата одбрана од урбанизацијата.

Организаторите на протестот побараа да престане префрлувањето на одговорноста меѓу државната и локалната власт и итно преземање на сите потребни чекори за целосно спроведување на шестата препорака на Реактивната мисија на УНЕСКО –запрогласување на мораториум на сите крајбрежни и урбани трансформации на пoдрачјетo на Светскoтo наследствo, сè додека не се изработат сите релевантни плански документи, додека не се прифати соодветна правна регулатива и се воспостават ефикасни механизми за контрола.

Организаторите на протестот укажаа и на незаконитоста на Општиот акт за Лагадин со кој се овозможи урбанизација на овој дел на крајбрежјето и побараа да не се дозволи  спорниот хотел во Лагадин да се изгради.


МЗШВ: Започнати се постапки за доделување на концесии за повеќе риболовни води


Скопје, 18 јули, 2018 - 12:41 (META) 

Владата на вчерашната седница донесе одлуки за започнување на постапки за доделување на рибите по пат на концесија за повеќе риболовни води, информираат од Министерство за земјоделство, шумарство и водостопанство (МЗШВ).

„Започнатите постапки за доделување концесии на рибите за органзирање рекреативен риболов се однесуваат на рекреативните зони на Охридското и Дојранското езеро, риболовните ревири Црна Река 1 – Демир Хисарски, Црн Дрим 2, Злетовска Река, Треска 1 – Кичевски и aкумулација Матка, а за вршење стопански риболов на риболовните подрачја Охридско и Дојранско езеро“, се вели во соопштението на МЗШВ.

Во него се додава дека риболовната основа за риболовнта вода Охридско Езеро во почетокот на 2018 година е изменета во правец на целосна заштита и одржливо користење на рибите во езерото.

„Конкретно, направени се измени во делот на утврдување на периодот на мрест и времето во кое е дозволен риболовот и детално се уредени специфичните локации на мрест на рибите, особено за охридската пастрмка, охридската белвица и крапот. Исто така, заради одржување на популацијата намалени се количините на дозволен улов на видот охридска белвица. Направени се измени кои ги задоволуваат потребите на рекреативните риболовци, а со тоа и развојот на риболовниот туризам“, велат од МЗШВ.


Екологисти бараат целосен мораториум за Охридското Езеро


Охрид, 21 јуни, 2018 - 14:09 (META) 

Активистите на Еколошко здружение на граѓани „Фронт 21/42“ по повод 21 јуни Денот на Охридското Езеро денеска до пратениците во Собранието повторно испратија отворено писмо во кое се бара доследна примена на мораториумот за инфраструктурни проекти на крајбрежјето.

Здружението „Фронт 21/42“ минатата година до пратениците и надлежните институции испратија такво барање, парафирано со потписи на повеќе од осум илјади граѓани за целосна забрана на инфраструктурни проекти во единственото Светско природно и културно наследство во Македонија и доследно спроведување на Законот за управување со Охридскиот регион.

„Денеска по една година Ви се обраќаме повторно – со истото барање и уште поголема загриженост. Тоа што најмногу не загрижува е евидентното избегнување на клучната мерка за спас на единственото УНЕСКО подрачје во нашата земја – итното стопирање на деструкцијата на исклучителните универзални вредности, односно спроведување на приоритетната препорака бр. 6 на Реактивната мониторинг мисија: прогласување на мораториум на сите крајбрежни и урбани трансформации, барем додека не се завршат и спроведат сите релевантни документи“, се наведува во писмото.

Активистите на „Фронт 21/42“ укажуваат дека спроведувањето на мерката ја налага националното законодавство, оти за истата не се потребни никакви финансиски средства, човечки ресурси, време, туку единствено политичка волја.

Истовремено тие посочуваат дека изминатата година од последната Одлука на Комитетот за светско наследство до денес единствено конкретно е делувано само со Одлуката за прекин на постапката за менување на Планот за управување на Националниот парк „Галичица“. За останатото како формирањето работна група за измени и дополнувања на Законот за управување со Охридскиот Регион, Одлуката за спроведување на Стратешка оцена за влијанието врз животната средина на Планот за управување со заштитеното подрачје, тие сметаат дека попусто ќе бидат потрошени финансии и изгубено драгоцено време доколку истите не бидат проследени со доследна конечна одлука за прогласување целосен мораториум.

„Во февруари 2018 Владата усвои информации кои јасно покажуваат планови за продолжување на дел од постоечките проекти како и за нови крајбрежни трансформации; – Во јуни 2018, на Италијанско – македонскиот бизнис форум, Премиерот покани италијански компании да инвестираат во постоечкиот проект за Коридор VIII, за кој Мисијата има дури три Препораки со кои се бараат суштински измени на трасите; – Во јуни 2018 Министерството за транспорт и врски објави Нацрт Стратегија за транспорт за период 2018 – 2030, во која не се инкорпорирани гореспоменатите Препораки 1, 2 и 3 за Коридорот VIII; – Општините Струга и Охрид и понатаму дозволуваат градежни зафати, како трансформации на струшкото крајбрежје, хотелот во Лагадин, итн“, се наведува во писмото.

Истовремено еколозите се повикуваат на изјавата на претставникот на регионалната канцеларија на УНЕСКО во Венеција Синиша Шешум, кој недвосмислено истакна дека доколку не се спроведе препораката останува опасноста Охрид да се најде на Листата на светски наследства во опасност.

Оттаму активистите на „Фронт 21/42“ во писмото до претседателот на Собранието, пратениците во неформалната група „Пријатели на УНЕСКО“ и собраниската Комисија за култура апелираат и бараат суштински заклучоци од надзорната расправа за Законот за управување со Охридскиот регион и спроведување на препораките од УНЕСКО, односно заклучоци кои недвосмислено ќе им наложат на сите засегнати институции итно спроведување на сите препораки, започнувајќи од приоритетните – мораториум за сите крајбрежни и урбани трансформации и справување со илегалните градби.


Екологистите бараат од владата мораториум за градење на брегот на Охридското Езеро


Охрид, 20 април, 2018 - 13:43 (META) 

Еколошките здруженија, „Фронт 21/42“, „ОхридSOS“ и „Еко-свест“ преку отворено писмо побараа од премиерот Зоран Заев итно воведување мораториум на сите крајбрежни и и урбани трансформации во Охридскиот регион, според препораките на УНЕСКО.

Во дописот, здруженијата укажуваат на активности на терен кои веќе значат непочитување на препораката од УНЕСКО – како продолжување на изградбата на спорниот хотел во Лагадин, тампонирање, уништување на трската и поставување на бетонска основа во строго заштитениот крајбрежен појас.

„Бараме од Владата на Република Македонија во најбрз можен рок, не подоцна од 30 дена, да прогласи мораториум за сите крајбрежни и урбани трансформации на територијата на Светското природно и културно наследство – Охридскиот регион. Очекуваме Владата да ги напушти одамна застарените концепти за развој кои јасно покажаа дека завршуваат со деструкција токму на вредностите кои се основа за одржлив економски развој, односно недвосмислена определба за заштита на нашето најголемо национално природно богатство, во согласност со современите економски и еколошки стандарди“, се вели во дописот.

Здруженијата потсетуваат дека мораториумот морало да биде прогласен најдоцна до 2 февруари годинава, како што минатата година побарале реактивната мониторинг мисија на УНЕСКО и Комитетот за светско наследство на УНЕСКО, но тоа е игнорирано.

„Препораката за прогласување на мораториум беше во групата на итни мерки, кои Владата требаше да ги спроведе до 01.02.2018. Сепак, токму оваа препорака беше целосно игнорирана од страна на Владата во Извештајот за напредокот во спроведувањето на препораките од УНЕСКО. Владата на Република Македонија не само што ја испочитува оваа препорака, туку на својата 53та седница одржана на 06.02.2018 Владата усвои информации кои се однесуваат на активности во Охридскиот регион, а кои предвидуваат крајбрежни трансформации на Охридското езеро“, посочуваат еколошките здруженија.


Охридското езеро 26 сантиметри над дозволениот водостој


Охрид, 4 април, 2018 - 10:43 (META) 

Нивото на Охридското езеро и денеска е 26 сантиметри над дозволениот максимален водостој.
Зголемени се нивоата и на реките низ државата, освен на Крива кај Крива Паланка и на Црна кај Новаци.

Нивото на Дојранското Езеро е три сантиметри под договорениот максимален водостој.


ЕЛЕМ: Нивото на Охридско Езеро не беше причина за поплава на крајбрежјето


Скопје, 21 март, 2018 - 15:04 (META) 

Водата од Охридско Езеро стигна на крајбрежјето поради брановите, а не поради разликата во сантиметри во нивото на езерото, реагираат од ЕЛЕМ на обвинувањата од страна на ВМРО-ДПМНЕ.

„Минатите месеци се карактеризираа со големи дотоци, при што состојбата се менаџира максимално одговорно, за да не се надмине максималната кота на Охридското Езеро од 694 мнв која е одобрена со водостопанската дозвола. Да наведеме дека оваа вредност е надмината при појава на слични дотеци во 2010 и 2013 година“, се вели во соопштението.

Од компанијата додаваат дека се прават максимални напори за да не се направи штета на граѓаните на Охрид, и на Струга, како и на жителите на населените места околу акумулациите Шпилје и Глобочица.