Градот Скопје два пати ги проверил големите загадувачи и им пишал четири казни


Скопје, 27 декември, 2018 - 11:32 (META) 

Според планот за работа на инспекторите за животна средина на Град Скопје, извршени се по две редовни контроли на сите 40 инсталации кои подлежат на Б–интегрирана еколошка дозвола, за кои е надлежен Град Скопје, информираат од таму.

– Во месец декември овластените инспектори за животна средина на Град Скопје, извршија вонредни контролни мерења на четири инсталации што подлежат на Б–интегрирана дозвола, како и на четири субјекти што подлежат на Eлаборат за заштита на животната средина. При вонредните контроли на овластените инспектори за животна средина со овластена лабораторија досега е утврдено пречекорување на граничните вредности кај четири инсталации кои се под надлежност на Град Скопје и истите ќе бидат санкционирани согласно со Законот за заштита на животната средина – одговори градоначалникот Петре Шилегов на вчерашната седница за советнички прашања.

Од Град Скопје велат дека секторот Инспекторат вовел и сменско работење (дежурства) кое започнува од 6 часот наутро, како и после полноќ, се до раните утрински часови, како и за време на викендите, сé со цел попрецизно и пореално да се утврди можното загадување на амбиенталниот воздух.

„Исто така, контролите се интензивирани на градилиштата, со посебен акцент на централното градско подрачје, но и другите поголеми градилиштa во другите општини, како и на територијата на Општина Аеродром каде што се сконцетрирани поголемиот број од градилиштата. Притоа се контролирани 51 градилиште и врачени се осум казни и записници за миење на гумите, миење на улиците пред градилиштата и покривање на камионите кои излегуваат од градилиштата со церади. Во периодот октомври-февруари кога има зголемено загадување на воздухот на територијата на Град Скопје се врши секојдневна контрола на градилиштата“, се додава во соопштението.

Од Град Скопје информираат дека бројот на изречени казни изминативе четири месеци, во однос на истиот период 2017 година е речиси двојно зголемен.

„Направена е координација со општинските инспекторати за зајакнување на контролата и координацијата помеѓу градските и општинските комунални редари. Во координирана акција со МВР, пазарната инспекција и Општината Чаир континуирано се спроведува дежурство на Бит-пазар секој работен ден и викенди од 8.00 до 14.30 часот од каде што се отстранети дивите продавачи од булеварот пред пазарот и пред дуќаните. Воведена е втора смена на комунални редари заедно со комунален инспектор на ул. Македонија и плоштад Македонија. Во координирана акција заедно со Еко патрола од комунална хигиена е спроведено дежурство од 8.30 до 15.30 часот на најкритичните точки низ сите општини на Градот Скопје. Исто така, во кординирана акција беше спроведено викенд дежурство на комуналните редари на Град Скопје на Вардариште, и во Градскиот парк на повеќе локации каде што граѓаните беа првично опоменувани, а некои и казнети за сторен прекршок по законот за јавна чистота“, информираат од Град Скопје.


Општина Тетово сокрива податоци за Општинскиот инспекторат


Тетово, 4 декември, 2018 - 14:05 (META) 

Општина Тетово одбива да разоткрие детали за работата, структурата и за вработените во Општинскиот инспекторат, непочитувајќи го своето ветување дека ќе биде транспарентна, пишува „Порталб“, посочувајќи дека овие податоци треба да бидат јавни, бидејќи вработените се плаќаат од народни пари.

Редакцијата пред повеќе од еден месец, врз основа на Законот за слободен пристап до информации од јавен карактер, поднела барање од Општина Тетово за доставување информации за работата и вработените на Општинскиот инспекторат.

„Но, она што ги добивме како одговор не е воопшто задоволително“, пишува „Порталб“.

Од Општина Тетово било побарано да достави информации за:
• Бројот на вработени во инспекцискиот оддел на Општинскиот инспекторат во Тетово.
• Бројот на вработени кои ја имаат позицијата „инспектор“ (со име, презиме и телефон за контакт).
• Бројот на други вработени, освен инспектори, и описот на нивните работни места.
• Бројот на возила што се на располагање на Општинскиот инспекторат.
• Платите на вработените и дали им се исплаќа надоместок за прекувремена работа.
• Распоредот на работа на инспекторите (во часови).
• Дали има некој вработен којшто постојано работи вон работното време, односно има ли дежурен во вечерните часови?

На тие прашања, од Општина Тетово одговориле со куса информација за вкупниот број вработени и бројот на инспектори.

„Врз основа на табеларната контрола на работните места во општинската администрација се вработени 42 лица, од кои 24 се општински инспектори; 19 се референти или или професионални официјални административни асистенти“, одговориле од општината.

„Порталб“, незадоволен што најголемиот дел од прашањата не се одговорени, поднел жалба до Комисијата за заштита на правото за слободен пристап до информации од јавен карактер.

„Нашата редакција никако нема да престане да бара одговори и транспарентност од општина Тетово за нашите граѓани, а ние ќе ја вршиме нашата работа. Потсетуваме дека во последното интервју за „Порталб.мк“ и „Вистиномер.мк“, градоначалничката на Тетово, Теута Арифи вети дека ќе биде транспарентна и нејзиниот тим за односи со јавноста ќе го стори истото.
Истото го вети и претходно во дебатата Животот во Македонија, како и во претходниот. Оваа општина не е на листата на најтранспарентни општини во Македонија“, порачуваат од  „Порталб“.

Во Тетово постојано се случува палење на ѓубрето, но сторителите ретко или никогаш не се откриваат.

„Ова се должи на ненавременото делување на органите на редот и Општинскиот инспекторат. Последниот случај беше на 11 октомври оваа година, кога некои луѓе запалија отпад на неформална депонија во ромската населба, односно во коритото на реката Пена. Порталб.мк, го пријави случајот до општинските власти, но сторителите не беа фатени. На 20 септември оваа година, за време на утринските часови жителите во некои тетовски населби пријавиле дека чувствуваат лош мирис, што веројатно потекнувал од горењето отпадоци.  Сепак, инспекторите задоцниле премногу и не успеале да ги фатат загадувачите. Случај што треба да се спомене е и случајот на масовно горење на депонијата на влезот на Тетово – и по една година, органите на редот и прогонот сè уште не успеале да ги најдат сторителите и да ги изнесат пред лицето на правдата“, пишува „Порталб“.


МВР врши истрага за директорувањето на Дејан Пројковски во МНТ


Скопје, 30 август, 2018 - 11:50 (META) 

Одделението за борба против организиран криминал од МВР по налог на Јавното обвинителство од минатата седмица вршат истрага во Македонски народен театар (МНТ), поради сомнение за злоупотреби направени во периодот од 2015 до 2017 година, кога директор бил Дејан Пројковски.

Минатата седмица инспекторите одзеле документи од правната служба.

Според информациите, Пројковски се товари за злоупотреба на службената положба со сомнителна набавка и ненаменско трошење во износ од 150.000 евра.

Од Министерството за култура велат дека поднеле пријава во МВР откако сегашната в. д. директорка  на МНТ, Симона Угриновска, која беше назначена во февруари, побарала ревизија на работата на претходниот директор.

МВР во овој момент собира и анализира документи и во интерес на истрагата не даваат повеќе детали.


Инспекторатот со дрон го снимал и следел дивото фрлање и палење отпад


Скопје, 1 февруари, 2018 - 11:23 (META) 

На подрачјето на Скопје состојбата со загадениот воздух е веќе под прагот на алармирање, извести Државниот инспекторат за животна средина на својата Фејсбук страница, повикувајќи се на податоците од Државниот автоматски мониторинг систем за квалитет на воздухот од 31 јануари.

„Се прекинува епизодата за надминување на прагот за алармирање за две мерни места во Скопје Лисиче и Ректорат за два последователни дена, бидејќи концентрациите за PM10 се под дефинираниот праг согласно легислативата“, соопшти Инспекторатот.

Оваа институција вчера вршела набљудување со изнајмен дрон над местата од кои може да се создава загадување на воздухот и откривање на прекршителите.


Алаѓозовски: Музичките субвенции биле алатка за купување послушност на уметниците


Скопје, 12 јануари, 2018 - 15:30 (META) 

Министерството за култура испратило инспектори во Македонската радио-телевизија (МРТВ) во врска со одлуките за субвенции за поддршка на домашната музичка продукција, кои констатирале дека роковите за носење на овие одлуки биле „длабоко пробиени“ и поради тоа треба да бидат поништени, соопштија од Министерството од каде велат и дека не само што нема да одобрат исплата на парите за избраните композиции, туку дека ќе спроведат истрага и за претходните конкурси.

Како што изјави министерот за култура, Роберт Алаѓозовски во Битола, инспекторите го предупредиле раководството дека се соочува со кривична одговорност поради незконски донесени одлуки, со кои се создава „штета по буџетот и кои претставуваат злоупотреба и несовесно работење во службата“.

Истоа така било констатирано дека во комисиите наместо музички уредници со работно искуство на таа позиција од најмалку пет години, дел од членовите воопшто не го исполнувале тој критериум, односно никогаш не работеле како музички уредници.

Алаѓозовски вели дека на некои автори им било овозможено да добиваат пари и преку категоријата „изведувачи“, а некои други за истата причина биле одбивани од конкурсот, а биле забележани и случаи на судир на интереси каде што сопружници биле членови на комисија, која доделила средства на група во која членувал нивниот син.

– Со оваа настаната ситуација уште еднаш се покажа колку бил штетен овој закон, кој постојано создавал долгови по буџетот на граѓаните, бил спроведуван на несоодветен начин и со неправилности, а воопшто не ги постигна декларираните ефекти, ниту пак придонесе за зголемување на квалитетот, развој на музичката индустрија и поголема присутност на домашните артисти на нашите медиуми, туку се претвори во алатка за клиентелизам и за купување послушност на музичките уметници – изјави Алаѓозовски.


Од големите загадувачи, инспекторите утврдиле проблеми и ја казниле само „Дрисла“


Скопје, 4 јануари, 2018 - 14:06 (META) 

Инцинераторот, односно направата во која гори медицински отпад во скопската депонија „Дрисла“ е единствениот од 15-те големи капацитети контролирани од Државниот инспекторат за животна средина (ДИЖС), за кој во последниов период се изречена казнени мерки.

„Дрисла“ доби казна од 8.500 евра и обврска до средината на февруари да вгради соодветни филтри.

Директорот на инспекторатот, Мирослав Богдановски денеска, презентирајќи ги програмата за работа и буџетот на Инспекторатот во 2018 година ги повика граѓаните на бројот 193 да ги пријавуваат сите случаи на оган на отворено, но и на други извори на загадување на животната средина, порачувајќи дека со зголемениот буџет државниот инспекторат годинава ќе работи засилено.

Инспекторите и по неколку пријави за загадување на територијата на општина Карпош не утврдиле прекршоци, објасни директорот на ДИЖС.

– Во последниот период се направени 15 вонредни контроли на големи капацитети е притоа е изречена една мерка – рече Богдановски.

Буџетот на Државниот инспекторат за животна средина за 2018 година е поголем за 10 милиони денари, односно 60 отсто повеќе отколку во 2017 година, што ќе овозможи вработување нови 6-7 инспектори, а ќе се набави и нова опрема.

За малењето на медицинскиот отпад во Дрисла тој рече дека ќе се врши до средината на февруари само по три часа дневно, и тоа само кога има поволни метеоролошки услови.

– Не можеме целосно да го затвориме, оти тоа е единствениот таков капацитет во земјава, и ќе се јави голем проблем ако се натрупа медицински отпад – рече Богдановски.

 


Инцидент меѓу полицаец и инспектори од СВР Битола


Битола, 16 декември, 2017 - 17:45 (META) 

На ден 15.12.2017 година во 23.30 часот Полицаецот И.Д. од Битола синоќа во 23.30 часот во СВР Битола пријавил дека истиот ден околу 21.45 часот на крстосница од ул. „Партизанска“ и ул. „Методија Андонов Ченто“ во Битола управувајќи го сопственото патничко возило „ауди“ бил сопрен од полициските службеници Б.Б. и А.Ј. од СВР Битола кои со приватно возило „цитроен“ вршеле службени дејствија.

Откако претходно возеле зад него и му давале светлосен знак да сопре, во моментот кога на крстосницата во намерата да сврти лево бил сопрен од истите со попречување на патот. При тоа во обид да им се легитимира на инспекторите кои лично ги познавал и се обидувал да им се претстави дека и тој е полициски службеник, инспекторот В.Б. го извлекол од неговото возило, укажувајќи му дека во моментот извршуваат службени дејствија по одредена акција истиот го оттурнал кон возилото и, според пријавеното, го удрил. Веднаш после тоа го напуштиле местото на настанот и се упатиле во непознат правец.

Полицаецот И.Д. настанот го пријавил во СВР Битола за што приложил и медицинска документација за повредите за сторено кривично дело „малтретирање во вршење на службени дејствија“, а инспекторите В.Б. и А.Ј. во 01.30 часот во СВР Битола пријавиле кривично дело „спречување на службено лице во вршење на службени дејстија“ за истиот настан со појаснување дека додека се упатувале кон местото каде требало да постапуваат за друг настан , истите биле најпрво попречувани да го престигнат возилото „ауди“, а потоа им бил попречен патот кај споменатата крстосница.

Откако му се легитимирале на возачот кој им соопштил дека и тој е полициски службеник, јасно му укажале дека се на службена задача и дека ги спречува во акција која е во тек. Освен вербалната комуникација истите го негираат нападот кој го пријавил полицаецот И.Д. За настанот на ден 15.12.2017 година во 23.50 часот известен е јавен обвинител од Битола и Одделот за внатрешна контрола,криминалистички работи и професионални стандарди Скопје, стои во извештајот на МВР.


Kомуналните инспектори во Аеродром ќе работат во две смени


Скопје, 28 ноември, 2017 - 12:37 (META) 

Од утре комуналните инспектори на Општина Аеродром ќе работат во две смени, секој ден од 8.30 до 22.30 часот, вклучувајќи ги и викендите, информираат од локалната самоуправа. .

Како дел од проектот „Пријави загадувач“ за почист воздух во општината, ќе биде ангажирана целата инспекциска служба, односно осум комунални инспектори и четири комунални редари, а активирана е телефонска линија за пријавување загадувачи, ‎075/316-515.

Од Општината велат дека двосменското работење на инспекторите е по барање на граѓаните за поголема ефикасност на инспекциските служби.

„Целта на акцијата „Пријави загадувач“ е што побргу да се детектираат и соодветно да се регулираат загадувачите на територијата на Општина Аеродром. Ги охрабруваме граѓаните активно да учествуваат и редовно да пријавуваат загадувачи на општинските инспекциски служби“, велат од Општината.


Забрана за работа на 84 работодавци кои не ги почитувале препораките за топлотен бран


Скопје, 7 август, 2017 - 15:11 (META) 

Министерството за труд и социјална политика информираше дека од 4 до 6 август државните инспектори за труд од областа безбедност и здравје при работа, извршиле вкупно 207 инспекциски надзори кај работодавци за почитување на препораките за топлотен бран, при што донеле 84 забрани за работа на работодавци кои не ги почитувале препораките да не се работи на отворено од 11 до 17 часот.

Инспекциски надзори кај работодавци биле вршени во дејностите градежништво, земјоделство, отпади, комунални услуги, конфекциски погон.

Најголем број од казните се за работодавци во градежништвото (67) и земјоделска дејност (13, пред сè овошни насади), додека по две забрани има во преработувачката индустрија и на локации за вадење мермер и песок, додаваат од Министерството.

Забраната за работа се однесува на конкретниот ден кога е регистрирано непочитување на препораките, потоа следи контрола и ако се увиди дека препораките повторно се кршат, следи прекршочна постапка.


МТСП: Работодавците да ги почитуваат препораките за заштита од топлото време


Скопје, 1 јули, 2017 - 10:26 (META) 

Министерството за труд и социјална политика (МТСП) денеска ги повика работодавците да ги почитуваат и да се придржуваат до препораките за заштита на работниците во деновите со неповолни временски услови за работа, односно од топлотниот бран кој ја зафати земјава.

На работодавците, како што стои во соопштението од МТСП, им се препорачува да го реорганизираат работното време во насока на избегнување активности на отворено во периодот од 11 до 17 часот.

Од Министерството информираат дека Државниот инспекторат за труд, во текот на овој викенд ќе работи со дежурни екипи од 30 инспектори. Прекршувањата на препораките може да се пријават на телефонскиот број 075 402 856, додаваат од МТСП.

„Потсетуваме дека согласно акцискиот план за превенирање на последиците од топлотни бранови врз населението во Република Македонија, а со цел заштита на здравјето на луѓето, се препорачува од работни обврски да бидат ослободени бремените жени и хронично болните лица на возраст над 60 години“, стои во соопштението од Министерството за труд и социјална политика.

Министерството за здравство, исто така, препорачува да не се одржуваат спортски активности на отворено во периодот од 11 до 17 часот, а особено се препорачува на установите за згрижување на деца (детските градинки) да не ги изнесуваат децата на отворено и да не практикуваат физичка активност во истиот период.