Италијанските компании заинтересирани за учество во развојни капитални проекти


Скопје, 3 декември, 2018 - 13:48 (META) 

Искуствата, технологиите и знаењата на италијанските компании во фазите на проектирање, изведба и надзор на градежните проекти кои се планира да се реализираат во Македонија се добродојдени, порача вицепремиерот за економски прашања Кочо Анѓушев на отворањето на бизнис-форумот кој го организира канцеларијата на италијанската Агенција за трговија во Скопје.

На бизнис-форумот присуствуваа претставници од 15 италијански компании, со меѓународно искуство во реализација на проекти од патна и железничка инфраструктура, енергетски како и проекти за заштита на животната средина.

Вицепремиерот ги информираше присутните за тековните и планирани инфраструктурни проекти, при што потенцираше дека заинтересираните италијански компании треба да ги следат јавните повици за реализација на проектите, нивното присуство ќе доведе до дополнителен квалитет и конкурентност во самите постапки.

Амбасадорот на Италија во Македонија Карло Ромео нагласи дека ова е втор бизнис-форум кој се организира во Македонија само во 2018 година, со што се докажува големиот интерес на италијанските компании за учество во развојни проекти во транспортот, енергетиката и животната средина. Тој нагласи дека претставниците на компаниите кои се присутни претставуваат здруженија кои работат во 90 земји и годишно реализираат приходи од околу 14 милијарди евра.

Италија е шести трговски партнер на Македонија, трговската размена помеѓу двете земји во првите девет месеци од 2018 година, во однос на истиот период лани, бележи раст од над 14,2 проценти, со вкупен обем од 448 милиони евра, а голем придонес за зголемување на економската соработка има порастот на извоз на производи од 11,7 проценти.

Бизнис форумот е во организација на Италијанската Агенција за трговија (ICE), во соработка со Италијанското здружение на приватни градежни компании (ANCE) и Италијанското здружение за инжинерство и градежништво (OICE).


Непродадени стојат 5.000 станови, а се градат над 10.000 нови (инфографик)


Скопје, 28 ноември, 2018 - 13:51 (META) 

Не стивнуваат реакциите во јавноста по најавата дека висококатници ќе се градат на паркингот спроти Градскиот трговски центар во Скопје кои ќе уриваат нови рекорди во височина по објектите на „Џеваир“ во општина Аеродром. Кој ќе ги купува овие станови и дали на пазарот воопшто има потреба од толкава станбена експанзија ако сега зад трговскиот центар „Рамстор“ исто така во центарот на главниот град се гради деловно-станбениот комплекс „Дајмонд“, како и дека се спомнуваат продажни цени на становите до 1.800 евра по квадрат?

Во Македонија, а посебно во Скопје понудата на станови одамна ја надминува побарувачката, а најдобар показател за тоа се извештаите од Регистарот на цени и закупнини на Агенцијата за катастар на недвижности кои откриваат дека иако пазарот има над 5.000 непродадени станови, во моментов се градат двојно повеќе.

„Во периодот јули – септември 2018 година, на целата територија на Република Македонија се продадени 792 новоизградени станови. Согласно со статистиката на Агенцијата за катастар на недвижности заклучно со септември, на целата територија на Република Македонија има 5.345 станови кои се изградени, а сè уште не се продадени и се нудат на пазарот на недвижности. За разлика од минатиот квартал, во овој квартал има зголемување на непродадените станови за 55 стана. Исто така, во Агенцијата за катастар на недвижности се издадени 10.875 листови за предбележување на градба што укажува дека овие објекти се во фаза на градба и наскоро ќе се најдат на пазарот на недвижности. Може да се констатира дека бројот на новоградби моментално ја задоволува побарувачката на нови станови“, се вели во последниот извештај од Регистарот на цени и закупнини.

Високите профитни маргини на градежните компании се главната причина за ваквата експанзија. Според економската логика, зголемената понуда на станови би требало да придонесе кон значително намалување на цените на станбениот квадрат со оглед на тоа што побарувачката не ја следи страната на понудата со исто темпо. Сепак, иако податоците на Државниот завод за статистика покажуваат дека во изминатиов период има благо намалување на цената на станбениот квадрат тоа се уште не е доволно за да можат повеќе млади лица да дојдат до сопствен стан.

Конкретно за Скопје, каде што пазарот на недвижности е најразвиен, претставниците на агенциите за недвижности во разговор велат дека има намалување на цените на становите во периферните делови на градот, додека цената на новите станови во условно кажано поатрактивните населби како Центар, Водно, Тафталиџе е зацементирана со години наназад и се движи меѓу 1.100 и 1.350 евра за квадрат.

Од Народната банка велат дека во изминатиот период, македонските банки даваат значаен придонес во пресретнување на понудата и побарувачката на станови, преку кредитна поддршка и на компаниите коишто се јавуваат како инвеститори или изведувачи на изградба на станови, и на населението, преку станбени кредити.

„Почнувајќи од средината на 2015 година па наваму, станбените кредити се најбрзорастечкиот сегмент од кредитното портфолио на банките, со годишни стапки на раст коишто тековно достигнуваат 15 отсто. Тековно, речиси 30 отсто од кредитите одобрени на физички лица отпаѓаат на станбените кредити. Банките ги нудат станбените кредити по историски најниски каматни стапки. Вообичаено, од клиентите се бара да имаат свое учество во купувањето на станот со кредит и да имаат месечен доход којшто ќе овозможи соодветна покриеност на месечните обврски за кредитот. Во овој контекст треба да се има предвид дека физичките лица можат да добијат финансиски средства и од државата, за дел од учеството или за дел од ануитетот за отплата на станбен кредит под услови и на начин пропишани со Законот за субвенционирање станбен кредит. Имено, овој владин проект (попознат како „Купи куќа, купи стан“) започна во 2012 година и секако дава определен придонес за позасиленото станбено кредитирање во нашата земја“, велат од НБРМ.

Оттаму додаваат дека во нашата регулатива, согласно барањата на Базелските капитални спогодби, станбените кредити (поточно кредитите коишто се покриени со хипотека на станбен објект и коишто исполнуваат одредени пропишани критериуми) се вклучуваат со пондер од 35 отсто во пресметката на капиталните барања за покривање на кредитниот ризик, што е еден од пониските пондери предвидени во регулативата (колку е повисок овој пондер, толку банките треба да ангажираат поголем износ на капитал), споредено со останатите сегменти од кредитната активност на банките, што генерално делува во насока на поттикнување на овие кредити.

„Преземањето на други мерки од НБРМ, исклучиво наменети за поттикнување на станбеното кредитирање (поточно, за намалување на каматните стапки на станбените кредити, како што гласи вашето прашање) спаѓа во доменот на т.н. неконвенционални мерки кои излегуваат од стандардната рамка на монетарната или макропрудентната политика. Тие се преземаат претежно во исклучителни околности, кога пазарите за одредени битни финансиски инструменти се „замрзнати“ или релативно неразвиени. Имајќи ги предвид погоре презентираните податоци за станбеното кредитирање во нашата земја, таквите околности не се случај во Република Македонија, каде станбените кредити солидно и стабилно растат веќе повеќе години наназад. Се разбира, квалитетот на ова портфолио постојано го следиме, како и неговите ефекти врз вкупната економија, со цел навремено да се идентификуваат евентуални ризици“, велат од НБРМ.


Градежниците очекуваат пад на бројот на вработени


Скопје, 18 октомври, 2018 - 16:25 (META) 

Намалени порачки, пад на бројот на вработени и влошена економска состојба во градежниот сектор очекуваат раководителите на градежните компании во Македонија, открива најновата анкета на Државниот завод за статистика.

Во наредниот период се очекува продажните цени да се зголемат, a бројната состојба и квалитетот на механизацијата и опремата се над нормалата.

Најголемо влијание врз ограничувањето за подобрување на тековната градежна активност имаат следните фактори: зголемени трошоци за материјали со 22,4 отсто, нема побарувачка со 20,3 отсто, конкуренција во сопствениот сектор со 13,8 отсто и недостиг на обучен кадар со 12,1 отсто.


Анѓушев: Изградбата на автопатиштата и железницата ќе го раздвижат градежништвото


Скопје, 10 септември, 2018 - 10:24 (META) 

Вицепремиерот за економски прашања Кочо Анѓушев рече дека зголемениот домашниот бруто-производ (БДП) од 3,1 проценти се должи на влијателните фактори како што се индустријата, градежништвото, земјоделството и трговијата, каде што се бележи најголем пораст.

– Во делот на градежништвото кога имавме пад од 40 проценти, БДП беше зголемен за 0,1 процент во првиот квартал. Градежништвото се уште има помали резултати во споредба со минатата година од 20 отсто, а веќе имаме 3,1 зголемен БДП во споредба со првиот квартал. Градежните проекти ги ставаме во колосек. Главните проекти се автопатиштата Кичево – Охрид, Миладиновци – Штип и новите кои почнаа да се градат како и железницата кон Бугарија и гасоводот, во кои што проекти има една милијарда евра. Тоа се проекти кои ќе го раздвижат градежништвото – појасни Анѓушев и нагласи дека со нивна реализација се очекува дополнително зголемување  на БДП.


Владата најавува интензивна изградба на автопатот Кичево – Охрид


Скопје, 6 септември, 2018 - 13:01 (META) 

Владата денеска усвои предлог-закон за нов анекс на Договорот за изградбата на автопатот Кичево – Охрид во должина од 57 километри со кинески „Синохидро“. На овој начин се овозможува ослободување на 205 милиони евра од претходно обезбедените финансии за проектот, со што ќе се интензивираат градежните активности на терен и ќе се овозможи исплата на домашните компании ангажирани како подизведувачи.

Со предлогот е предвидено со нов, трет анекс, пак, што би се склучил околу 10 следниот месец, да се утврдат цените за дополнителните градежни работи, неопходни за одблокирање на проектот што беше во застој поради проблеми со проектната документација, несоодветни геомеханички испитувања, нерешена експропријација на земјиштето.

Вицепремиерот за економски прашања Кочо Анѓушев и министерот за транспорт и врски Горан Сугарески по денешната седница на Владата најавија дека законот уште денеска ќе биде испрати во Собранието.

Со тоа, како што истакнаа, почнува да се решава проблемот за овој капитален проект, кој заедно со планираното интензивирање на работите за железничката делница Куманово – Бељаковце и за гасоводот треба да овозможи подобрување на состојбите во градежништвото по големиот пад во изминатиот период.

Сугарески информираше дека за изградбата на автопатската траса во должина од 57 километри ќе треба да се примени целосно нова технологија за изградба на тунелот кај Врбјани  во должина од четири километри, кој со првиот проект бил предвиден за градба на земјиште со прва категорија, наместо со шеста, односно на меко змејиште а не на карпест дел како што се препорачува од експретите. Воедно ќе треба да се градат девет нови клучки и регионални патишта, бидејќи со постојниот проект не е предвидено поврзување на околните населени места со автопатската делница.

Изградбата на автопатот стартуваше во февруари 2014 година и според постојниот договор требаше да чини  околу 400 милиони евра. Со продолжувањето на рокот за изградба автопатот треба да биде готов до средината на 2021 година.


Сугарески: Предвидени се 300 милиони евра инвестиции во патишта во Источниот регион


Штип, 5 април, 2018 - 15:06 (META) 

Должината на експресниот пат Штип – Кочани кој е во изградба, изнесува 28 километри и предвидено е да се гради во две фази, информираше денеска министерот за транспорт и врски, Горан Сугарески кој направи увид во градежните работи.

– Во тек е изградба на првата фаза од Штип до Крупиште во должина од 14,3 километри, инвестиција со вредност од преку 20 милиони евра. При изградбата на оваа фаза, наидовме на потешкотии при реализацијата на проектот, но успеваме да ги надминеме и во моментов вкупниот прогрес на градежните работи изнесува 20 отсто – изјави Сугарески.

Во однос на втората фаза од реализацијата, во тек е одобрување на тендерската документација.

– Источниот регион е токму оној во кој се предвидени најголеми инвестиции во изградба и реконструкција на патната мрежа. Тука ќе реализираме инвестиции од околу 300 милиони евра во изградба на автопати, два експресни патишта и реконструкција на регионалните патишта. Вкупниот прогрес на градежните работи на автопатот Миладиновци – Штип изнесува 77 отсто и согласно анекс-договорот што го потпишавме, очекуваме да биде завршен до септември оваа година – додаде Сугарески.


НБРМ: Економијата закрепнува по падот во првата половина од 2017 година


Скопје, 14 февруари, 2018 - 18:08 (META) 

Економијата во четвртиот квартал од 2017 година закрепнала со подобро темпо во однос третиот, било заклучено на редовната седница на Комитетот за оперативна монетарна политика на Народна банка.

„Во однос на активноста во економијата, по падот во првата половина на 2017 година и умереното закрепнување во третиот квартал, во четвртиот има закрепнување со нешто подобро темпо. На ваква констатација посочуваат податоците за најновите остварувања во индустријата и трговијата, додека градежната активност продолжи да се намалува. Анкетните истражувања укажуваат на натамошно задржување на довербата на економските субјекти“, се вели во соопштението на Народна банка.

Во него се додава дека инфлацијата е во рамки на проекциите.


Последиците од кризата најмногу се почувствуваа во градежништвото


Скопје, 4 декември, 2017 - 15:28 (META) 

Градежните активности во првите девет месеци се намалени, а градежниците имаат помалку работа и во странство, информираа од Здружението на градежништвото, индустријата на градежни материјали и неметали.

Според претседателот на Здружението, Андреа Серафимовски, последиците од политичката криза најмногу се почувствувале во овој сектор, кој беше главен двигател на економијата во последните неколку години.

– Проблемите речиси и да не се решаваа, а постоеја административни пречки во донесувањето одлуки и решенија, кои имаа финансиска импликација врз проектите, додека доспеаните долгови тешко и нередовно се исплаќаа. Наведените причини најмногу придонесоа да дојде до стагнација на работењето и до намалена активност во однос на минатата година, имајќи предвид дека државните органи, односно Владата и локалната самоуправа, беа главните инвеститори и двигатели на градежните активности – рече Серафимовски.

Ваквиот тренд во градежништвото ќе продолжи до крајот на годината, а за следната година градежниците се надеваат дека секторот повторно ќе влијае на порастот на домашниот бруто-производ.


Економијата во Турција ќе ги надмине предвидувањата од 4,4 проценти пораст на БДП


Анкара, 12 септември, 2017 - 14:26 (META) 

Домашниот бруто-производ (БДП) во Турција во периодот април-јуни се зголемил за 5,1 отсто во однос на претходните месеци, покажуваат податоците на турскиот Институт за статистика.

Пораст на економијата е евидентиран во сите клучни области, при што земјоделското производство се зголемило за 4,7 отсто, индустриското за 6,3 отсто, градежништвото за 6,8 отсто,  а трговските дејности за 5,7 отсто.

За оваа година, владата во Анкара предвидува економски пораст од 4,4 проценти, а турскиот премиер Бинали Јилдирим најави дека предвидувањата ќе бидат надминати.


Просечната месечна нето-плата во јуни изнесувала 22.808 денари


Скопје, 23 август, 2017 - 13:47 (META) 

Просечната месечна исплатена нето-плата по вработен, во јуни изнесувала 22.808 денари, а бруто-платата 33.509 денари, објави Државниот завод за статистика. Платата во јуни во однос на лани истиот месец е зголемена за 2,7 проценти.

Ваквото зголемување на нето-платата се должи, пред сè, на зголемувањето на просечната месечна исплатена нето-плата по вработен во секторите уметност, забава и рекреација (20 проценти), стручни, научни и технички дејности (9,8 проценти) и рударство и вадење на камен (7,4 проценти).

Намалување на просечната месечна исплатена нето-плата по вработен во однос на претходниот месец е
забележано во секторите рударство и вадење на камен (7,5 проценти), градежништво (4,1 проценти) и трговија на големо и трговија на мало (3 проценти).

Во јуни, 1,1 процент од вработените во Република Македонија не зеле плата.