!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

По САД, и Израел најави повлекување од УНЕСКО


Ерусалим, 12 октомври, 2017 - 21:03 (META) 

Премиерот на Израел, Бенјамин Нетанјаху, денеска дал инструкции на министерството за надворешни работи да го подготви повлекувањето на земјата од УНЕСКО, јавуваат светските медиуми.

Ова го соопштила израелската влада неколку часа откако САД најавија дека се повлекуваат од УНЕСКО поради „состојбата во организацијата, потребата за реформа и особено поради антиизраелскиот однос на организацијата“.

Нетанјаху ја поздрави одлуката на претседателот на САД, Доналд Трамп, за повлекувањето, оценувајќи ја како храбра и морална.

„Тоа е храбра и морална одлука бидејќи УНЕСКО стана театар на апсурдот. Наместо да ја чува историјата, таа ја искривува“, рекол Нетанјаху, пренесуваат израелските медиуми.

Нетанјаху претходно оваа година ја критикуваше УНЕСКО поради прогласувањето на стариот град во Хеброн на Западниот Брег за палестинско светско наследство.


Заев – Нетанјаху: Македонија и Израел заедно стојат на страната на мирот во светот


Ерусалим, 4 септември, 2017 - 16:03 (META) 

Владина делегација предводена од премиерот Зоран Заев денеска се сретна со премиерот на Израел, Бенјамин Нетанјаху. Двајцата лидери испратиле порака дека стојат заедно на страната на мирот во светот.

– Гледаме заедно кон подобра иднина. Ги разгледуваме начините и полињата каде што можеме да соработуваме во интерес на луѓето и на нашите земји. Научивме од минатото како да ја обезбедиме иднината. Израел е технолошки развиена земја и ќе ѝ помогне на Република Македонија – вели Нетанјаху.

Заев соопштил дека новата Влада ќе ги употреби израелските искуства за квалитетен живот на граѓаните на Македонија.

– Со Израел немаме отворени прашања, пријателски земји сме. Нашата соработка со Израел се надеваме дека ќе биде на две нивоа, безбедноста и светскиот мир, она за што е Израел добар пример во светот. Се надеваме дека низ организациите како што е НАТО – целиме да бидеме членка на НАТО – ќе продолжиме да соработуваме, бидејќи заканите од радикализмот и од екстремизмот се присутни овде, во Израел, и во овој регион, но исто така и во Македонија и во регионот на Западен Балкан. Соработувавме на полето на безбедноста и на одбраната досега и знам дека ќе ја зголемиме соработката, бидејќи е интерес на сите граѓани и нации – рече Заев.

Во изјавата за медиумите Заев нагласил дека Македонија со голема почит го негува културното богатство на Евреите.

Двајцата лидери се договориле за продлабочување на економската соработка, разговарале за израелски инвестиции во Македонија и за директна авионска линија на релација Скопје – Тел Авив.


Сослушана сопругата на Нетанјаху поради трошење јавни пари за приватни цели


Тел Авив, 3 август, 2017 - 16:18 (META) 

Израелската полицијата два часа ја испитувала сопругата на премиерот Бенјамин Нетанјаху поради сомнеж дека користела јавни пари за приватни трошоци.

Како што пренесува израелското јавно радио, таа е испитана вчера во седиштето на Националната единица за разоткривање проневери во Тел Авив, поради обвинението дека користела јавни пари за лични трошоци за водење на домаќинството во официјалните и во приватните резиденции.

Како и во претходните кругови од испитувањето на премиерот и на неговата сопруга, полицијата не издала никакво соопштение за сослушувањето на Сара Нетанјаху.


Израелскиот обвинител побара истрага против премиерот Нетанјаху


Ерусалим, 11 јули, 2016 - 15:40 (META) 

Израелскиот обвинител Авишај Менделблит побарал да се отвори истрага против премиерот на земјата, Бенјамин Нетанјаху, соопштило вчера израелското министерство за правда, јавуваат локалните медиуми.

Според медиумите, станува збор за сомнежи дека израелскиот лидер или некој од неговото семејство примил голема сума пари од странство.

Сепак, од министерството за правда не соопштиле за каква истрага точно станува збор.

Израелските медиуми минатата недела пишуваа дека големата сума пари не била за политички цели.

Портпаролот на Нетанјаху во реакција на соопштението истакнал дека „како и во претходните случаи, кога се работело за неосновани тврдења против Нетанјаху, така и сега, нема да има ништо“.

Како што пишува „Ерусалим пост“, пратеникот во израелскиот Кнесет (парламент) од редовите на Ционистичката унија, Ерел Маргалит, зборувајќи за истрагата, во саботата рекол дека политичкиот систем треба да се подготви за избори наскоро бидејќи Нетанјаху по сè изгледа нема да го заврши својот мандат неизвалкан.

„Нетанјаху потроши 80 отсто од својот мандат на замолчување на сомневањата и на истрагите за поврзаност со некои од најголемите измамници во Европа. Актуелната загриженост за примање пари кои не се поврзани со изборите е повеќе од сомнителна“, рекол Маргелит.


13-годишна Израелка избодена до смрт на спиење


Ерусалим, 30 јуни, 2016 - 19:56 (META) 

Тринаесетгодишна Израелка била избодена со нож до смрт, во напад кој се случил денеска во еврејска населба во окупираниот Западен Брег, јавуваат светските медиуми.

Халел Јафа Ариел била нападната додека спиела во својата соба, во населбата Кирјат Арба. Чуварите на населбата го убиле напаѓачот, а при интервенцијата еден од нив бил потешко повреден со нож во лицето.

Израелското министерство за здравство го идентификувало напаѓачот како 19-годишниот Палестинец Мухамед Трајра, од селото Бани Наим во близина на населбата.

Израелскиот премиер Бенјамин Нетанјаху го осуди нападот, оценувајќи го како „гнасно убиство“, кое „ја илустрира крвожедноста и недостатигот од хуманост на терористите“ со кои тие се соочуваат.

Тој додал дека светот мора „да го осуди убиството, како што претходно ги осуди убиствата во Орландо и во Брисел“

Нетанјаху го повика и палестинското раководство јасно и недвосмислено да го осуди бруталното убиство и да работи на итен прекин на насилствата.

Од октомври минатата година досега 34 Израелци се убиени во бранот напади со ножеви, огнено оружје и со возила. Повеќе од 200 Палестинци, главно напаѓачи, се убиени во истиот период, пренесуваат медиумите.


Израел планира смртни казни за палестинските екстремисти


Ерусалим, 21 мај, 2016 - 14:50 (META) 

Идниот министер за одбрана на Израел, Авигдор Либерман, инаку лидер на ултранационалистичката партија „Израел наш дом“ како клучен услов за негово влегување во владејчката коалција го поставил воведувањето смртна казна за палестинските екстремисти, јавуваат светските медиуми.

Извори блиски на неговата и на владејчката партија Ликуд навеле дека израелскиот премиер Бенјамин Нетанјаху се согласил со барањето на Либерман.

Во Израел досега на смртна казна е осудено и погубено само едно лице – архитектот на т.н. „конечно решение“ на нацистичка Германија во Втората светска војна, Адолф Ајхман. Тој во 1962 година беше осуден и обесен за геноцид.

Според договорот меѓу Либерман и Нетанјаху, пишуваат изралеските медиуми, просто мнозинство од двајца судии во воениот суд ќе биде доволно да му се одреди смртна казна на Палестинец кој извршил смртоносен напад.

Во Израел и досега постоеше можност за изрекување на смртна казна, но обвинителите не ја бараа бидејќи за тоа беше потребно сите судии во судскиот совет да бидат едногласни во одлуката.


Израелскиот министер за одбрана поднесе оставка


Тел Авив, 20 мај, 2016 - 9:53 (META) 

Израелскиот министер за одбрана Моше Јалон денеска поднесе оставка бидејќи „нема доверба“ во премиерот Бенјамин Нетанјаху.

Премиерот предложи смена на министерот за одбрана за да го прошири составот на владејачката коалиција.

– Го информирав премиерот дека поради неговото однесување и неодамнешните случувања, но и поради тоа што не му верувам, јас се повлекувам од владата и парламентот и ќе се повлечам од политичкиот живот, твитна Јалон на Твитер.


Нетанјаху ја објави својата платa на „Твитер“


Тел Авив, 18 март, 2016 - 12:34 (META) 

Израелскиот премиер Бенјамин Нетанјаху денеска на „Твитер“ ја објави својата плата за февруари, објаснувајќи дека тоа го направил за транспарентност, јавуваат израелските медиуми.

Од листата за плата се гледа дека Нетанјаху примил 11.270 евра за еден месец работа. Тоа, според податоците од Централното биро за статистика на Израел, е околу пет просечни плати во Израел.

Сепак, даноците во Израел се високи, па откако го платил данокот за приход, здравственото осигурување и придонесите за социјално осигурување, израелскиот премиер дома однел околу 4.000 евра.
Странските медиуми наведуваат дека во споредба со другите светски лидери, Нетанјаху има мала плата.

Според истражувањето на „Си-ен-ен“, американскиот претседател Барак Обама минатата година месечно заработувал по 33.000 долари, заедно со додатоците за патувања и за забава.

Германската канцеларка Ангела Меркел, според истото истражување, заработува околу 17.000 евра месечно, а рускиот претседател Владимир Путин околу 9.500 евра.


Нетанјаху одбил средба со Обама


Тел Авив, 8 март, 2016 - 14:42 (META) 

Израелскиот премиер Бенјамин Нетанјаху денеска изјави дека одбил месецов да се сретне со американскиот претседател Барак Обама во Белата куќа поради острата предизборна кампања во САД.

Белата куќа вчера соопшти дека Нетанјаху одбил да се сретне со Обама, што е потег кој се толкува како нова епизода во нарушените односи меѓу двете земји, особено по склучувањето на договорот со Техеран за иранската нуклеарна програма, кој беше инициран од САД.

Портпаролот на Белата куќа рече дека Израел пред две недели побара состанок и оти на израелскиот премиер му бил понуден 18 март како датум за средба, но американските власти подоцна од медиумите дознале дека Нетанјаху ја откажал посетата.

Канцеларијата на Нетанјаху соопшти дека премиерот ја „цени желбата на Обама да се сретне со него“, но оти тој одлучил да „не оди во Вашингтон во овој момент, на кулминацијата на примарните изборни кампањи во САД“.

Израелскиот премиер за време на кампањата во 2012 година го фаворизираше противкандидатот на Обама, републиканецот Мит Ромни, и сега не сака да остави впечаток дека поддржува одреден кандидат.


Нетанјаху: Со Обама ќе разговараме за унапредување на безбедноста на Израел


Тел Авив, 8 ноември, 2015 - 15:14 (META) 

Израелскиот премиер, Бенјамин Нетанјаху, најави дека со претседателот на САД, Барак Обама, на состанокот во Вашингтон в понеделник, прв по повеќе од една година, ќе разговара за начинот на кој може да се подобри безбедноста на Израел.

Една од централните теми на разговорите ќе биде обновата на десетгодишниот меморандум за разбирање, кој истекува во 2017 година, на чија основа Израел добива 3,1 милијарда долари помош од САД годишно.

Израел очекува договорот да се обнови, но сака да се зголеми на 50 милијарди долари во период од десет години, наведуваат израелските медиуми.

– Тој состанок е важен за да се појасни продолжувањето на американската помош на Израел во претстојната деценија. Тоа ќе биде уште еден чекор кон реализација и разбирање во тој правец – рече Нетанјаху на денешната седница на владата.

Тој додаде дека неговиот разговор со Обама ќе биде насочен на неодамнешните случувања на Блискиот Исток и можниот напредок со Палестина или барем стабилизација во односите со нив, како и зајакнување на безбедноста на Израел.