!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МЗШВ изврши авионско снимање на целата територија


Скопје, 22 август, 2017 - 14:01 (META) 

Mинистерството за земјоделство, шумарство и водостопанство од јуни до средината на август изврши авионско снимање на целата територија на Македонија, по втор пат после 2009 година, информираат оттаму.

Согласно европските регулативи и препораки, авионските снимки се основа за функционирање на Системот за идентификација на земјишни парцели (СИЗП).

„Со просторната идентификација на земјишните парцели се определуваат границите и големината на обработливата површина за која земјоделците аплицираат за финансиска поддршка во земјоделството и руралниот развој. На овој начин, ќе се овозможат прецизни контроли од страна на Агенцијата за финансиска поддршка во земјоделството и руралниот развој, во однос на површините кои земјоделците ги пријавуваат за субвенции и фактичката состојба на терен“, информираат од МЗШВ.

Во рамките на процесот ќе бидат направени „ортофото“ карти, дигитален модел на теренот на целата држава и ќе биде направена иницијална дигитализација на земјоделските површини според употребата на земјиштето.

Новите просторни податоци ќе овозможат ажурирање на промените настанати на земјишните парцели во периодот помеѓу двете снимања.

Активностите на изработка на авионските снимки, „ортофото“ картите, дигиталниот модел на теренот, како и дигитализацијата на земјоделското земјиште финансиски е помогнато од страна на Европската Унија преку ИПА-фондовите.


Музејот на ВМРО на „Гугл“ стана „Музеј на жртвите на Жмроизмот“


Скопје, 17 јули, 2017 - 16:40 (META) 

Уште еден локалитет во Скопје доби ново име на апликацијата „мапи“ на светскиот интернет-гигант „Гугл“. Овојпат станува збор за Музејот на ВМРО. Доколку на мапата го пребарувате овој музеј, ќе ви прикаже „Музеј на жртвите на Жмроизмот/(Museum of the victims of Zhmroism)“, а дури потоа како втора опција се прикажува вистинското име.

Претходно на оваа апликација, големиот скопски плоштад Македонија, на англиски беше преименуван во „Плоштад Вардарска“. Апликацијата за подобро снаоѓање, особено на туристите, ги дава имињата на локациите и на македонски и на англиски јазик.

Сепак, зад овие измени на имињата не стои самиот „Гугл“, туку корисниците. Компанијата во јули минатата година им овозможи на корисниците да споделуваат и да едитираат локации за да ја подобри апликацијата „мапи“ и да ги обележи неозначените места. Едитираните локалитети по автоматизам не се појавуваат во апликацијата, туку чекаат да бидат верификувани од повеќе корисници.

Оттука, голема е веројатноста дека станува збор за герила-акција на повеќе корисници кои одлучиле да го прекрстат музејот изграден од претходната влада, предводена од ВМРО-ДПМНЕ.

Компанијата „Гугл“ минатата година соопшти дека повеќе од една милијарда лица ја користат апликацијата „мапи“ и сите тие имаат можност да едитираат и да придонесуваат за развој на истата.

Инаку, досега на микро-мрежата „Твитер“, хаштагот „Ж“ се користеше за поранешниот премиер Никола Груевски, а по објавувањето на бомбите, ВМРО-ДПМНЕ на оваа социјална мрежа беше именувана како „ЖМРО“.


ДИК: Избирачкиот список е заклучен, може да се пребарува само со матичен број


Скопје, 8 декември, 2016 - 12:43 (META) 

Во апликацијата на ДИК за проверка на граѓаните во избирачкиот список, единствената активна можност за пребарување на избирачите од вчера е само преку матичниот број на граѓаните. Дополнителните две опции за пребарување, преку адреса и име и преземе, повеќе не се активни.

Од ДИК за „Мета“ велат дека избирачкиот список за предвремените парламентарни избори в недела, на 11 декември, е заклучен и затоа единствено секој лично, преку матичниот број може да провери на кое гласачко место гласа.

– Не може да се пребарува по име и презиме и по адреса бидејќи избирачкиот список е заклучен, па оттука може само да се пристапи со внесување матичен број или тоа, со други зборови, значи дека ќе можете само вие лично да си проверите на кое гласачко место гласате, а да не може друг во ваше име да го стори тоа – вели портпаролката на ДИК, Аријета Џемаили.

Пред три дена ДИК соопшти дека имале технички проблеми со апликацијата за проверка на граѓаните во избирачкиот список. Од Комисијата тогаш наведоа дека техничките проблеми немаат никакви последици ниту влијание врз избирачкиот список, организацијата, како и врз спроведувањето на претстојното гласање за избор на пратеници во Собранието на Република Македонија.

ДИК избирачкиот список го заклучи на 28 ноември кога го одреди и изгледот на гласачкото ливче. Тогаш од Комисијата соопштија дека според избирачкиот список, на изборите кои се закажани за 11 декември право на глас ќе имаат 1.784.416 полнолетни државјани на Република Македонија.

Државната изборна комисија во март оваа година ја промовираше новата апликација за проверка на граѓаните во избирачкиот список, со која освен според матичниот број, граѓаните можеа да ги проверуваат податоците и доколку внесат име и презиме или адреса на живеење. Оваа можност на апликацијата откри бројни недостатоци, нелогичности и контроверзии – десетици граѓани на иста адреса, непостоечки адреси, починати гласачи, двојни адреси и слично.


ДИК имала технички проблеми со апликацијата за проверка на граѓаните во избирачкиот список


Скопје, 5 декември, 2016 - 21:43 (META) 

Државната изборна комисија вечерва соопшти дека во текот на денешниот ден имале одредени технички проблеми со апликацијата за проверка на граѓаните во избирачкиот список.

„Информираме дека апликацијата за проверка на податоците во избирачкиот список за граѓаните кои ќе гласаат во избирачките места на територијата на Република Македонија веќе е функционална и достапна. Во текот на утрешниот ден ќе биде достапна и апликацијата за проверка на податоците во избирачкиот список за лицата кои ќе гласаат во дипломатско-конзуларните претставништва и во конзуларните канцеларии во странство“, стои во соопштението.

Од Комисијата наведуваат дека техничките проблеми немаат никакви последици ниту влијание врз избирачкиот список, организацијата, како и врз спроведувањето на претстојното гласање за избор на пратеници во Собранието на Република Македонија.


Вкупно 11 граѓани од дијаспората до денеска се пријавиле за гласање на изборите


Скопје, 22 октомври, 2016 - 15:33 (META) 

До денеска, заклучно до 14 часот, вкупно 11 македонски државјани што живеат во странство се пријавиле за гласање на изборите на 11 декември во дипломатско-конзуларните преставништва на земјава, преку апликацијата поставена на интернет-страницата на Државната изборна комисија (ДИК), соопштија денеска од Комисијата.

Од пријавите, како што информираат од ДИК, 10 биле прифатени, а една пријава е во фаза на обработка.

„Државната изборна комисија Ве известува дека во тек е пријавувањето за гласање за предвремените избори за пратеници во Собранието на Република Македонија, во дипломатско-конзуларните претставништва на Република Македонија во странство, односно конзуларните канцеларии. Заклучно со 22 октомври 2016 година, до 14 часот, можноста за пријавување преку електронската апликација ставена во интернет-страницата на Државната изборна комисија, ја искористиле вкупно 11 граѓани на Република Македонија, од кои 10 пријави се прифатени, додека една пријава е во фаза на обработка“, се вели во соопштението на ДИК.

Пријавувањето на дијаспората за гласање почна на 19 октомври, еден ден откако претседателот на Собранието, Трајко Вељаноски, ја потпиша одлуката за распишување на предвремените парламентарни избори, и ќе трае до 11 ноември.


Македонските државјани во странство од денеска може да се пријавуваат за гласање


Скопје, 19 октомври, 2016 - 9:13 (META) 

Пријавувањето за гласање на македонски државјани што живеат во странство може да почне денеска зашто Државната изборна комисија (ДИК) има подготвено посебна апликација, соопштија вчера од Комисијата. Пријавувањето на овие граѓани ќе трае до 11 ноември.

Државната изборна комисија на вчерашната седница го усвои роковникот за извршување на изборните дејства, откако ја доби одлуката за распишување предвремени парламентарни избори на 11 декември, што вчера ја потпиша претседателот на Собранието, Трајко Вељаноски.

Во документот на Комисијата се наведува дека избирачкиот список ќе биде ставен на увид на 28 октомври, а увидот ќе заврши на 11 ноември. ДИК на 1 декември треба да ги потпише изводите од избирачкиот список.

За време на јавниот увид, право да се пријават за гласање ќе имаат 30.447 гласачи кои беа со спорни записи за време на последното прочистување на избирачкиот список.

Од ДИК соопштија дека политичките партии и независните кандидати треба да ги достават листите на кандидати за пратеници до Комисијата најдоцна до 11 ноември на полноќ. Ждрепката за редоследот треба да се одржи на 20 ноември, по што од следниот ден почнува изборната кампања, која ќе трае до 9 декември.

Членовите на ДИК на вчерашната седница усвоија барање што ќе биде доставено до Министерството за внатрешни работи за доставување податоци за граѓаните.


ВМРО-ДПМНЕ објави повик за кандидати за градоначалници на локалните избори во 2017 година


Скопје, 26 август, 2016 - 12:42 (META) 

Владејчката ВМРО-ДПМНЕ објави јавен повик за кандидати за градоначалници за престојните локални избори, кои треба да се одржат догодина. Како што стои во повикот, тој се однесува на сите 84 општини, а кандитат за градоначалник може да биде секој граѓанин што ги исполнува условите за кандидирање пропишани со Устав и со закон, да е член на ВМРО-ДПМНЕ или граѓанин кој не е член на ниту една политичка партија, но се согласува и ги поддржува политиките, идеологијата, заложбите и програмата на ВМРО-ДПМНЕ.

Според повикот, кој е објавен со одлука на извршниот комитет на партијата од 24 август оваа година, заинтересираните кандидати потребно е да поседуваат углед, авторитет и морален дигнитет во местото каде живеат и работат, односно во општината за која аплицираат.

„За поднесување кандидатура не се потребни потписи, туку доставување стандардизирана биографија со фотографија на не повеќе од 3 страници, детална програма за работа на општината на не повеќе од пет страници со конкретни проекти, мерки и идеи, за која се поднесува кандидатурата, како и пополнување на стандардна апликација“, стои во повикот.

По поднесувањето на кандидатурата, секој кандидат дополнително ќе биде контактиран од партиското седиште, а разговорите со нив ќе ги води специјална комисија која ќе биде формирана за таа цел.

Според повикот, сите кандидати имаат еднакви шанси да бидат избрани во „зависност од личните квалитети и успеси во минатото, како и од визијата за иднината“. Во повикот стои дека ВМРО-ДПМНЕ го задржува правото да ги провери податоците доставени во биографијата и апликацијата на секој кандидат.

povik za kandidati za gradonacalnici na vmro dpmne

 


Во ДИК до денеска се пријавиле 5.526 спорни гласачи


Скопје, 16 август, 2016 - 12:57 (META) 

Вкупно 5.526 граѓани, чии записи во избирачкиот список, по спроведени вкрстени и теренски проверки, се спорни, до денеска напладне се пријавиле во Државната изборни комисија (ДИК), соопштија оттаму.

Од нив, 2.473 се пријавиле во подрачните одделенија и канцеларии, како и во дополнителните канцеларии на ДИК, додека 3.053 за пријавување ја искористиле веб-апликацијата на интернет-страницата на Државната изборна комисија.

Најмногу граѓани со спорни записи во избирачкиот список се пријавиле во општините Чаир, Куманово, Сарај и Аеродром.


На Светскиот ден на емотиконите, првиот речник на емотикони за македонски јазик


Скопје, 17 јули, 2016 - 18:11 (META) 

По повод прославувањето на 17 јули, Светскиот ден на емотиконите, се одбележа официјалното пуштање во употреба на првиот речник за емотикони на македонски јазик.

Емотикони се мали сликички што се испраќаат во кратки пораки директно од тастатурата на телефон. Сè досега, не постоеше лесен начин за тие кои говорат македонски јазик да ги најдат потребните емотикони.

„EmojiWorldBot“ е бесплатна алатка која е изградена за популарната платформа „телеграм“ за размена на инстант пораки, за корисниците да можат да најдат емотикони кои се поврзани со поими на повеќе од 70 јазици. Ако напишете „мајмун“ на македонски, ќе ви се појави сликичка на мајмун која може да ја искористите во вашите пораки и разговори.

Франческа Чиусароли, професор по лингвистика на Универзитетот „Мачерта“ во Италија и еден од основачите на алатката, вели дека луѓето користат слики за да раскажат некоја приказна уште од времето на пештерските цртежи.

„Пишувањето се разви од слики, па хиероглифи и идеограми на писма и писма. Сега светот им се враќа на сликите за некои основни комуникации, со користење на емотикони да ги поврзе луѓето преку границите и без оглед на различните јазици“, вели Чиусароли.

Сметка која е бесплатна и без реклами е сè што ви треба за да ја користите алатката. Апликацијата „телеграм“ може да биде инсталирана на кој било уред или да се користи на веб.


УСАИД доделува 3 милиони долари за унапредување на медиумите во Македонија


Скопје, 23 март, 2016 - 15:41 (META) 

Агенцијата за меѓународен развој на САД (УСАИД) објави повик, односно конкурс, за доделување грантови за медиуми од Македонија.

УСАИД ќе додели повеќе грантови во вредност од најмногу еден милион долари, со вкупно расположливи средства за финансирање од три милиони долари, за проекти во времетраење од 12 до 36 месеци.

Повикот за доделување средства е компетитивен, а апликации може да поднесат локални, македонски приватни непрофитни организации (или профитни доколку се подготвени да се откажат од профитот), вклучувајќи приватни доброволни организации, универзитети, истражувачки организации, професионални здруженија и здруженија со посебен интерес.

Конкурсот е отворен до 16 мај.

Според образложението во повикот, сите главни индекси за слободата на медиумите покажуваат сериозен пад во македонската медиумска средина, како и дека Македонија е со најлоши резултати во Југоисточна Европа и се приближува на статусот на помалку развиени, авторитарни држави. Рангирањето на „Фридом хаус“ за слободата на печатот во 2015 година ја сместува Македонија во категоријата делумно слободни земји. Според „Репортери без граници“, Македонија во 2015 година беше на 117. место од 180 земји според индексот на слободата.

„И покрај големиот број на медиуми и изобилството од медиумски производи, граѓаните имаат ограничени можности да бидат добро информирани за клучните прашања од јавен интерес“, се вели во документот, каде е нагласено дека „главната цел на програмата е да се зголеми плурализмот и транспарентност во медиумската средина“.

„Програмата ќе се фокусира на зголемување на пристапот до информации преку производство на содржина која овозможува широка распространетост на знаење и на објективно презентирани информации во земјата“, се вели во повикот.

Предлог-апликациите може да вклучуваат активности како што се: креирање вести на телевизија кои ќе презентираат фер и балансирано известување за најчестите прашања во Македонија, вклучувајќи вести за политика, начин на живот, бизнис, здравство, наука и поп-култура; креативни програми за вести со помош на уникатен новинарски стил; продукција на документарни телевизиски серии за важни прашања и воспоставување на ТВ-емисии за презентирање приказни со кои ќе се создаде интерес и дискусија преку користење на сатира, помеѓу другите можни пристапи.